A Slolonel Dios Dꞌa Vin̈aj
OSEAS
Ix yetbꞌeyum vin̈aj Oseas yedꞌ ebꞌ yuninal
1
A in Oseas in tic, yuninal in vin̈aj Beeri, ix lolon Jehová dꞌayin ayic ix yacꞌan reyal ebꞌ vin̈ tic dꞌa chon̈abꞌ Judá: Aton vin̈aj Uzías, vin̈aj Jotam, vin̈aj Acaz yedꞌ vin̈aj Ezequías. Axo dꞌa Israel a vin̈aj Jeroboam yuninal vin̈aj Joás ayoch reyal. Aton dꞌa tic tzꞌibꞌabꞌilcan tas ix yal Jehová dꞌayin.2 Ayic ix schaanel yich Jehová slolon dꞌayin, ix yalan icha tic: A ebꞌ etisraelal, te chuc scꞌulej ebꞌ dꞌa vichan̈, ix yiqꞌuel sbꞌa ebꞌ dꞌayin icha junoc ix ajmul ix. Yuj chiꞌ, a junoc ix ajmul ix tzicꞌ etbꞌeyumoc. Ay ebꞌ yuneꞌ ix ol aljoc dꞌa yajmulal, xchi dꞌayin.
3 Yuj chiꞌ ix vicꞌ ix scuchan Gomer yisil vin̈aj Diblaim vetbꞌeyumoc. Ix lajvi chiꞌ ix scuchanoch yuneꞌ ix, ix alji jun in vinac unin yedꞌ ix. 4 Ix yalan Jehová dꞌayin icha tic: Jezreel ol acꞌ sbꞌiej vin̈ unin chiꞌ, yujto dꞌa yic jayeꞌ cꞌual tic, ol vacꞌoch syaelal ebꞌ yin̈tilal vin̈aj rey Jehú yuj jantac anima ix smilcham ebꞌ dꞌa chon̈abꞌ Jezreel. Ol vacꞌpax lajvoquel chon̈abꞌ Israel chiꞌ.* 5 A dꞌa jun cꞌual chiꞌ, ol in satel ebꞌ soldado Israel dꞌa lum schꞌolanil Jezreel chiꞌ, xchi dꞌayin.
6 Ix scuchanxioch yuneꞌ ix Gomer chiꞌ, ix unin jun yuneꞌ ix, ix alji. Ix yalan Jehová dꞌayin icha tic: “Man̈-xajanabꞌiloc” tzacꞌ sbꞌiej ix isil chiꞌ, yujto man̈xo ol ocꞌ in cꞌol dꞌa chon̈abꞌ Israel tic. Man̈xo ol vacꞌlaj nivancꞌolal. 7 Axo pax chon̈abꞌ Judá, ol ocꞌ in cꞌol dꞌay. A in Jehová in sDiosal in ebꞌ ol in coloꞌ, palta man̈oc yedꞌ ebꞌ soldado ayqꞌue dꞌa yibꞌan̈ chej yedꞌnac syamcꞌabꞌ yic oval, palta yedꞌ in poder ol in col ebꞌ, xchi.
8 Axo yic toxo ix el ix unin chiꞌ dꞌa yim, ix scuchanxioch yuneꞌ ix Gomer chiꞌ, ix alji junxo svinac unin ix. 9 Ix yalanxi Jehová dꞌayin icha tic: “Man̈-in-chon̈abꞌoc”, icha chiꞌ tzacꞌ sbꞌiej vin̈ unin chiꞌ, yujto a ex israel ex tic, man̈xo in chon̈abꞌoc eyaji, man̈xo in e Diosaloc.
Ol Bꞌoxiqꞌue chon̈abꞌ Israel
10 Palta ay val jun cꞌual, lajan ol ajxi sbꞌisul ebꞌ israel tic icha yarenail stiꞌ aꞌ mar, malaj mach syal sbꞌisani. A bꞌaj ix val dꞌa ebꞌ icha tic: “Man̈-ex-in-chon̈abꞌoc”, xin chi, ataꞌ ol alchaj dꞌa ebꞌ: Yuninal ex Dios pitzan.
11 Ol smolbꞌej sbꞌa ebꞌ aj Judá yedꞌ ebꞌ aj Israel dꞌa jun tiempoal chiꞌ, junxon̈ej yajalil ebꞌ ol yacꞌochi. Ol te qꞌuechaan̈ ebꞌ, yujto te nivan yelcꞌoch jun cꞌual yic Jezreel chiꞌ.