2
Al dꞌa ebꞌ etchon̈abꞌ icha tic: Schon̈abꞌ Dios caji, xajan on̈ yuuj, xa chi, xchi Jehová.A Jehová xajanan schon̈abꞌ
2 Ix yalan Jehová dꞌayin to svacꞌoch in bꞌa chꞌoxnabꞌiloc yedꞌ ebꞌ vuninal yedꞌ pax ix snun ebꞌ, yuj chiꞌ ix valan icha tic dꞌa ebꞌ unin chiꞌ: A ix e nun chiꞌ man̈xo vetbꞌeyumoc ix, man̈xo in yetbꞌeyumoc pax ix, palta alec dꞌa ix to maxtzac yacꞌoch sbꞌa ix ajmulal, yactejocabꞌcan ebꞌ vin̈ scꞌuman ix chiꞌ.
3 Tato an̈ejaꞌ scꞌulan ix icha chiꞌ, ol vacꞌ qꞌuixvelal ix, ol viqꞌuel spichul ix, ol can bꞌeran ix icha yic ix alji. Ichaval taquin̈ lum ol ajcan ix vuuj, ol champax ix yuj taquin̈tial.
4 Man̈ ol ocꞌpaxlaj in cꞌol dꞌayex, yujto yuneꞌ ex ix dꞌa yajmulal.
5 A ix e nun chiꞌ, ix och ix ajmulal. Ix ixtaxel svachꞌilal ix ayic ix yalan ix icha tic: Ol bꞌat in say mach nibꞌabꞌil vuuj, mach tzꞌacꞌan in vael yedꞌ tas svuqꞌuej, mach tzꞌacꞌan in lana yedꞌ in lino, in perfume yedꞌ in vino, xchi ix.
6 Yuj chiꞌ ichato ol in mac sbꞌe ix dꞌa teꞌ qꞌuiix, ol vacꞌanoch macteꞌ dꞌa spatictac, yuj chiꞌ man̈xo ol ilchaj sbꞌe ix bꞌaj ol bꞌatoc.
7 Ol bꞌat tzacꞌan ix dꞌa spatic mach snibꞌej chiꞌ, palta man̈ ol yamchaj yuj ix. Ol sayecꞌ ix, palta man̈xo ol ilchaj yuj ix. Yuj chiꞌ ol yalan ix icha tic: Ol in meltzaj dꞌa vin̈ vicꞌnac dꞌa sbꞌabꞌelal. Vachꞌtaxon vaj yedꞌ vin̈ dꞌa yichan̈ icha ticnaic, xcham ix, xin chi dꞌa ebꞌ.
8 Yuj tas scꞌulej ebꞌ vetisraelal chiꞌ, yuj chiꞌ ix yal Jehová icha tic: Maj yojtaquejel ebꞌ tato a in svacꞌ strigo ebꞌ, svino ebꞌ yedꞌ sperfume ebꞌ to a in svacꞌ nivanbꞌoc qꞌuen plata yedꞌ qꞌuen oro dꞌa ebꞌ, axo dꞌa juntzan̈ comon dios ix yacꞌ ebꞌ.
9 Yuj chiꞌ ol viqꞌuecꞌ ixim in trigo yedꞌ in vino, ol vicꞌanpaxecꞌ nocꞌ in lana yedꞌ in lino tzꞌoch spichuloc ebꞌ.
10 Qꞌuelanoch juntzan̈ chon̈abꞌ ix montanbꞌat yic syal sbꞌa ebꞌ dꞌa scomon diosal, ol vacꞌan qꞌuixvoc ebꞌ. Man̈xa mach ol colanel ebꞌ dꞌa yol in cꞌabꞌ.
11 Ol vacꞌ lajvoc stzalajcꞌolal ebꞌ yuj qꞌuin̈ yic tzꞌalji qꞌuen uj yedꞌ dꞌa scꞌual icꞌoj ip yedꞌ masanil juntzan̈xo qꞌuin̈ tzꞌochtaxoni.
12 A ebꞌ israel ix alani: A juntzan̈ comon dios ix acꞌan sat teꞌ uva yedꞌ teꞌ higo stojoloc bꞌaj ix caqꞌuem co bꞌa, xchi ebꞌ. Yuj chiꞌ a in Jehová in ol in satel juntzan̈ teꞌ uva yedꞌ teꞌ higo chiꞌ. A bꞌaj avabꞌil chiꞌ ol vacꞌoch vayumtaquil, axo nocꞌ caltacteꞌal nocꞌ ol abꞌlanbꞌat avbꞌen chiꞌ.
13 A in Jehová in svalaꞌ to ol vacꞌoch yaelal dꞌa yibꞌan̈ ebꞌ, yujto nivan tiempo ix yaltej incienso ebꞌ dꞌa juntzan̈ yechel Baal. Ix laj sbꞌoan sbꞌa ebꞌ icha junoc ix ix syacꞌoch yuchiquin yedꞌ ston̈ tzꞌoch tzacꞌan yuj ebꞌ vin̈ nibꞌabꞌil yuuj, syacꞌan sat scꞌool dꞌa vin̈ yetbꞌeyum. Icha chiꞌ in yutej chon̈abꞌ Israel tic.
Te xajan chon̈abꞌ Israel yuj Dios
14 Vachꞌchom icha chiꞌ ix scꞌulej chon̈abꞌ Israel tic, palta ol in montej, ol vicꞌanxibꞌat dꞌa tzꞌinan luum. Ataꞌ ol val vachꞌ lolonel dꞌay.
15 Ol vacꞌanxi sluum bꞌaj avabꞌil yuva. A schꞌolanil ilcꞌolal ol vacꞌoch schꞌolanil yipcꞌolal. Icha yaj dꞌa sbꞌabꞌelal ayic yelnaccot dꞌa Egipto icha chiꞌ ol vutocxicani. Ataꞌ ol tacꞌvoc dꞌayin, ichaval scꞌulej junoc ix cobꞌes ix.
16 A in Jehová in svalaꞌ to a dꞌa jun cꞌual chiꞌ, ol in yal yetbꞌeyumoc. Man̈xo ol yal jun chon̈abꞌ tic to Baal vaj dꞌay.*
17 Juneln̈ej ol viqꞌuel dꞌa stiꞌ yacꞌan bꞌinaj juntzan̈ Baal, man̈xa bꞌaqꞌuin̈ ol yacꞌ bꞌinajoc.
18 A dꞌa jun cꞌual chiꞌ, ol vacꞌ in trato yedꞌ nocꞌ caltacteꞌal nocꞌ, nocꞌ much yedꞌ nocꞌ chan, yic man̈xalaj tas ol utaj yuj nocꞌ. Dꞌa juneln̈ej ol vicꞌcanel qꞌuen lanza dꞌa jun chon̈abꞌ tic yedꞌ juntzan̈xo yamcꞌabꞌ yic oval, yic vachꞌ ol yicꞌ yip in chon̈abꞌ tic, man̈xa tas ol snaꞌa.
19 Ach chon̈abꞌ Israel, ichato ol ach vicꞌ dꞌa juneln̈ej. Toton val icha vetbꞌeyum ol ach aj dꞌa stojolal yedꞌ dꞌa smojalil, yujto ol ocꞌ val och in cꞌol dꞌayach yedꞌ ach in xajanani.
20 Ichato ol ach vicꞌaꞌ, ol in cꞌulejn̈ej tas ix valaꞌ, ichato chiꞌ ol in ojtacaneli to Jehová in.
21 A in Jehová in svalaꞌ: A dꞌa jun cꞌual chiꞌ, ol in tacꞌvoc dꞌayach, ol val dꞌa satchaan̈, axo satchaan̈ chiꞌ ol acꞌancot n̈abꞌ dꞌa sat luum.
22 Ol yacꞌan ixim trigo lum luum, vino yedꞌ aceite. Ichaval chiꞌ ol aj in pacan slesal in chon̈abꞌ bꞌobꞌil vuuj.
23 Ol vacꞌxi cajnaj in chon̈abꞌ dꞌa sat lum luum tic yic tzꞌoch vedꞌoc. Ol ocꞌ in cꞌool dꞌa ix “Man̈-xajanabꞌiloc” yedꞌ dꞌa vin̈aj “Man̈-in-chon̈abꞌoc”, ol valan icha tic: In chon̈abꞌ ach, xin chama. Axo ol alan dꞌayin: In Diosal ach, xchama, xchi Jehová.