Ol yicꞌxi ix yetbꞌeyum vin̈aj Oseas
3
Ix yalan Jehová dꞌayin icha tic: Xajanejxi ix etbꞌeyum, vachꞌchom smulan ix yedꞌ mach snibꞌej. Icha chiꞌ ol utoc a chꞌoxani tas tzꞌaj in xajanan ebꞌ etisraelal, vachꞌchom syacꞌoch spensar ebꞌ dꞌa comon dios yedꞌ yicꞌanbꞌat taquin̈ uva ebꞌ silabꞌoc dꞌa juntzan̈ comon dios chiꞌ, xchi dꞌayin.2 Yuj chiꞌ, ix in mananxi ix dꞌa 15 siclo qꞌuen plata yedꞌ chan̈eꞌ quintal ixim cebada yic tzꞌochxi ix vetbꞌeyumoc.
3 Ix valan dꞌa ix icha tic: Najtil ol in a tan̈vej dꞌa in pat dꞌa ichn̈ej taꞌ. Man̈xo ach och ajmulal, man̈xo altej a bꞌa dꞌa junocxo vinac. An̈ejtonaꞌ in, ol in tan̈vej yecꞌ jun tiempoal chiꞌ, malaj pax junocxo ix ol in sayaꞌ, ichato chiꞌ ol quicꞌlanxi co bꞌa, xin chi dꞌa ix.
4 Icha pax chiꞌ chon̈abꞌ Israel, najtil ol ecꞌ dꞌa ichn̈ej taꞌ, malaj sreyal, malaj pax yajalil. Man̈xo ol sn̈uslaj silabꞌ dꞌayin, man̈xalaj qꞌuen qꞌueen bꞌaj ol yacꞌ silabꞌ ebꞌ dꞌa juntzan̈ comon dios. Man̈xalaj pichul yic ebꞌ sacerdote, man̈xalaj comon dios dꞌa yol spat junjun ebꞌ.
5 Ol lajvoc chiꞌ jun, a dꞌa slajvubꞌ cꞌual, ol meltzajxoc ebꞌ. Ol in yalanxi ebꞌ sDiosaloc, ol schaan junoc yin̈tilal vin̈aj David ebꞌ sreyaloc. Icha chiꞌ ol aj yoch ebꞌ ejmelal dꞌa vichan̈ a in Jehová in tic yedꞌ schaan svachꞌil ebꞌ tas ol vacꞌaꞌ.