A yoval scꞌol Jehová dꞌa Israel
4
Ex vetisraelal, abꞌec slolonel Jehová. Van yalan Jehová chiꞌ dꞌa yibꞌan̈ masanil anima cajan dꞌa jun chon̈abꞌ tic, yujto man̈xalaj mach tzꞌelcꞌoch tas syalaꞌ. Man̈xalaj mach vachꞌto spensar, man̈xalaj mach syacꞌoch spensar dꞌay.2 Sqꞌuechaan̈ ebꞌ sqꞌuexan stiꞌ dꞌa tas syalaꞌ, syesan ebꞌ. Smilvaj ebꞌ, tzꞌelcꞌan ebꞌ, an̈ej ajmulal scꞌulej ebꞌ. Slaj yixtej yetanimail ebꞌ, cotac scal smilancham anima ebꞌ.
3 Yuj chiꞌ, a slum jun chon̈abꞌ tic, ol can tzꞌinan. A ebꞌ cajan dꞌay, man̈xalaj yip ebꞌ. Ol cham nocꞌ caltacteꞌal nocꞌ, nocꞌ much yedꞌ masanil nocꞌ chay ay dꞌa yoltac a aꞌ.
Syal smul ebꞌ sacerdote Jehová
4 Syalan Jehová dꞌayin icha tic: Malajocabꞌ mach scot yoval dꞌa ebꞌ chon̈abꞌ tic, yujto a mach ay voval yedꞌoc aton eyedꞌ ex sacerdote.
5 Yuj chiꞌ, a dꞌa cꞌualil ol ex telvoc icha dꞌacꞌvalil. Ol telvoc pax ebꞌ in checabꞌ eyedꞌoc. A in ol vacꞌ lajvoc chon̈abꞌ Israel to icha e nun yaji.
6 Ol in satel jun in chon̈abꞌ tic, yujto man̈xo in naanoc yuuj. A exxo ex sacerdote, yelxo maxtzac in e naꞌa. Yuj chiꞌ ol ex viqꞌuel dꞌa eyopisio. Yujto ix bꞌat in cꞌaybꞌubꞌal satcꞌolal eyuuj, yuj chiꞌ man̈xo ol in nacot ebꞌ eyin̈tilal.
7 Icha ix aj sqꞌuibꞌ e bꞌisul ex sacerdote, icha chiꞌ ix aj sqꞌuechaan̈ smul in chon̈abꞌ. Yuj chiꞌ a e bꞌinajnaquil, qꞌuixvelaltac ol vutejcani.
8 Yuj silabꞌ syacꞌ in chon̈abꞌ yuj smul, vachꞌ e vaꞌi, yuj chiꞌ tze nibꞌej to tzꞌochn̈ej smul in chon̈abꞌ tic dꞌayin.
9 Yuj chiꞌ lajan ol aj yabꞌan syail ebꞌ in chon̈abꞌ eyedꞌoc a ex sacerdote ex tic. Yuj e bꞌeybꞌal chiꞌ ol vacꞌoch yaelal dꞌa eyibꞌan̈ yedꞌ ebꞌ.
10 Yujto maxtzac in yacꞌ servil ebꞌ in chon̈abꞌ, axo jun comon dios scuch Baal syacꞌ servil ebꞌ. Vachꞌchom sva ebꞌ, svay ebꞌ yedꞌ ebꞌ ix ajmul ix dꞌa stemplo scomon diosal chiꞌ, palta man̈ yujoc chiꞌ nivan ol satan smunlajel ebꞌ, man̈ ol qꞌuibꞌpax sbꞌisul ebꞌ.
11 Yuj yajmulal ebꞌ yedꞌ yucꞌuman̈il ebꞌ, yuj chiꞌ ix quistalax spensar ebꞌ.
12 A dꞌa junoc te teꞌ scꞌanbꞌej yabꞌ ebꞌ in chon̈abꞌ tic tas scꞌulej ebꞌ. Axo te teꞌ chiꞌ tzꞌacꞌan srazón ebꞌ yalani. Yuj yajmulal ebꞌ chiꞌ, yuj chiꞌ ix juviel ebꞌ. Icha val tzꞌaj yactancan vin̈ yetbꞌeyum junoc ix ix, smulan yedꞌ junocxo vinac, icha chiꞌ ix in yutej ebꞌ, sbꞌatcan tzacꞌan ebꞌ yuj comon dios.
13 A dꞌa jolomtac vitz yedꞌ dꞌa tzalquixtac, ataꞌ sn̈us incienso ebꞌ yedꞌ yacꞌan silabꞌ ebꞌ dꞌa yalan̈ yen̈ul xil teꞌ álamo, teꞌ ji yedꞌ teꞌ machꞌ. Yuj chiꞌ, slaj em ebꞌ ix eyisil yedꞌ ebꞌ ix eyalibꞌ dꞌa ajmulal.
14 Palta man̈ ol vacꞌochlaj syaelal ebꞌ ix eyisil yedꞌ ebꞌ ix eyalibꞌ yuj yajmulal chiꞌ, yujto a ex jun tze cꞌulej ajmulal chiꞌ, tzeyacꞌan silabꞌ yedꞌ ebꞌ ix ix sbꞌeybꞌalan ajmulal. Yuj chiꞌ, a jun chon̈abꞌ malaj spensar tic, ol ixtaxeloc.
15 Vachꞌchom ix och smul chon̈abꞌ Israel, palta mocabꞌ och smul chon̈abꞌ Judá. Mocabꞌ bꞌat och ebꞌ ejmelal dꞌa Gilgal, mocabꞌ qꞌuepax ebꞌ dꞌa Bet-avén. Mocabꞌ sloc in bꞌi ebꞌ a in Jehová pitzan in tic.*
16 A chon̈abꞌ Israel, te pit, lajan val icha junoc nocꞌ vacax te ov. Tato icha chiꞌ, ¿tom ol yal in tan̈van ebꞌ icha junoc nocꞌ yuneꞌ calnel bꞌaj yax an̈cꞌultac?
17 Axo chon̈abꞌ Efraín ix och tzacꞌan yuj juntzan̈ comon dios, palta olxo yil sbꞌa.
18 Masanil ebꞌ syal sbꞌa dꞌa juntzan̈ comon dios, tzꞌecꞌ tzuyjabꞌ ebꞌ dꞌa scal ebꞌ yetucꞌuman̈il. Maxtzac yactej ebꞌ scꞌulan ajmulal. A ebꞌ yajalil ebꞌ, a tas qꞌuixvelaltac sgana ebꞌ scꞌulan dꞌa yichan̈ to tzꞌalji ebꞌ vachꞌil.
19 Icha tzꞌaj yicꞌchajbꞌat cꞌalem yuj icꞌ, icha chiꞌ ol aj yicꞌchajbꞌat ebꞌ. Malaj ol yacꞌ yal ebꞌ yuj juntzan̈ silabꞌ syacꞌ dꞌa juntzan̈ scomon diosal chiꞌ.