5
Abꞌec val juntzan̈ tic ex sacerdote. Maclejec eyabꞌ ex chon̈abꞌ Israel. Abꞌec pax ex yin̈tilal ex ebꞌ rey: A dꞌa eyibꞌan̈ a ex tic ol och jun yaelal tic, yujto a ex tic, icha junoc chꞌan̈ yaal eyaj dꞌa Mizpa yedꞌ dꞌa jolom vitz Tabor.2 Tzijtum anima ix e macꞌcham yuj e pitalil, yuj chiꞌ ol vacꞌoch yaelal dꞌa eyibꞌan̈.
3 Ex israel ayex dꞌa yol yic Efraín, vojtac tas eyaji. ¿Tom tze naꞌa to man̈ vojtacoc tas eyaj chiꞌ? Ix eyacꞌoch e bꞌa ajmulal, ix eyixtejel e bꞌa dꞌa yajbꞌentaquil.
4 Yuj e chuc bꞌeybꞌal chiꞌ, max yal e meltzajcot dꞌayin. An̈ej dꞌa juntzan̈ comon dios tzeyal e bꞌa. Yuj val to e gana e cꞌulan ajmulal, yuj chiꞌ maxtzac in e na jabꞌoc.
5 Ex aj Efraín, a eyicꞌojchan̈bꞌail schꞌoxanel e chucalil. Ex aj Israel, munil ol ex telvoc yuj eyajmulal chiꞌ. Yedꞌ ex aj Judá lajan ol aj e telvi yedꞌ ebꞌ.
6 Ol bꞌat in e sayeqꞌui, eyedꞌnac nocꞌ e calnel yedꞌ nocꞌ e vacax yic tzeyacꞌ silabꞌil dꞌayin. Palta man̈xo ol in ilchajlaj eyuuj, yujto toxo ix viqꞌuel in bꞌa dꞌa e cal.
7 Yujto te chuc ix eyutej e bꞌa dꞌayin, ay eyuninal mitzꞌ unin yaji. Yuj chiꞌ a dꞌa qꞌuin̈ ayic tzꞌalji qꞌuen uj, ataꞌ ol ex satel yedꞌ e munlajel.
Syaelal chon̈abꞌ Israel yedꞌ chon̈abꞌ Judá
8 Puchajocabꞌ nocꞌ chꞌaac yic oval dꞌa Gabaa, puchajocabꞌpax qꞌuen trompeta dꞌa Ramá. Avajan̈ec dꞌa Bet-avén. Ayocabꞌ xivcꞌolal dꞌa scal ebꞌ anima yic Benjamín.
9 A in sval dꞌa scal masanil ebꞌ yin̈til Israel yuj tas yovalil ol javoc dꞌa yibꞌan̈ ebꞌ: A ebꞌ aj Efraín, ol lajvoquel ebꞌ yuj yaelal ol javoc dꞌa jun cꞌual chiꞌ.
10 A in Jehová in svalaꞌ: A ebꞌ yajal dꞌa Judá, lajan ebꞌ icha juntzan̈ anima tzꞌicꞌanchaan̈ tzꞌacaan̈, yuj chiꞌ ol in satel ebꞌ yedꞌ yoval in cꞌool.
11 A chon̈abꞌ Efraín tic, toxo ix ja dꞌa yibꞌan̈. Man̈xalaj tas ay dꞌay, yujto ix yacꞌoch dꞌa scꞌol yoch tzacꞌan yuj juntzan̈ comon dios.
12 A in ol vixtejbꞌat chon̈abꞌ Efraín icha tzꞌaj yixtax junoc tas yuj nocꞌ aꞌay. Ol vixtanbꞌat chon̈abꞌ Judá icha tzꞌaj scꞌabꞌat junoc tas.
13 Ayic ix yilan chon̈abꞌ Efraín to ya ay, ix yilanpax yechen Judá, ix bꞌat chon̈abꞌ Efraín chiꞌ dꞌa Asiria scꞌan scolval jun rey bꞌinajnac yacꞌan oval, palta maj yal-laj yuj jun rey chiꞌ yacꞌan bꞌoxoc scꞌool, maj yalpaxlaj yan̈tan yechen chiꞌ.
14 Icha val tzꞌaj smacvaj junoc nocꞌ choj, icha chiꞌ ol aj in macvaj dꞌa chon̈abꞌ Efraín yedꞌ dꞌa chon̈abꞌ Judá. A in ol in chocꞌ tzilejbꞌat ebꞌ, ol vactancan ebꞌ bꞌian, axo in bꞌat chiꞌ. Ol in tzacꞌchaan̈ ebꞌ, man̈xa mach ol yal scolan ebꞌ dꞌa yol in cꞌabꞌ.
15 Axo in meltzaj chiꞌ dꞌa elan̈chamel bꞌaj cajan in masanto ol yojtaquejel smul ebꞌ, axo sjavi ebꞌ chiꞌ yal sbꞌa dꞌayin. A dꞌa scal syaelal ebꞌ chiꞌ, ol yal sbꞌa ebꞌ dꞌayin dꞌa smasanil scꞌool.