Syal ebꞌ israel to ol meltzajxoc ebꞌ dꞌa Dios
6
Ol yal ebꞌ chon̈abꞌ icha tic: Cotan̈ec e masanil, con̈ meltzajec dꞌa Jehová. A ix on̈ chocꞌtzilanbꞌati, an̈ejaꞌ ol on̈ an̈tanpaxoc. Ix on̈ yacꞌ echnajoc, an̈ejaꞌ a ol an̈tanpax quechen chiꞌ.2 A val yecꞌbꞌat chabꞌ cꞌual, ichato chiꞌ ol yacꞌan co qꞌuinal. Axo dꞌa yoxil cꞌual, ol on̈ yacꞌanpax pitzvoc, ol on̈ cajnaj dꞌa yichan̈.
3 Caqꞌuec quip cojtacanel Jehová. Icha cojtacaneli to ol sacbꞌoc, cojtac to ol jax dꞌayon̈ tato sco na co bꞌa. Ol yacꞌcot svachꞌcꞌolal dꞌa quibꞌan̈, icha tzꞌaj syaxbꞌi sat lum luum yuj bꞌabꞌel n̈abꞌ yedꞌ slajvubꞌ n̈abꞌilqꞌuinal, xcham ebꞌ.
A spac ol yacꞌ Jehová dꞌa ebꞌ
4 Icha tic yalan Jehová: ¿Tas vachꞌ ol ex vutoc ex aj Efraín? ¿Tas vachꞌ ol ex vutoc ex aj Judá? A bꞌaj tzin e xajanej, lajan icha asun dꞌa qꞌuin̈ibꞌalil, lajan icha yal acꞌval dꞌa ayto sqꞌuin̈ibꞌi, axo sqꞌuin̈ibꞌi, satemi.
5 Yuj in lolonel ix vacꞌ yal ebꞌ in checabꞌ, ol ex in sateli. Nivan chequel ol aj eyaelal chiꞌ icha val yoc cꞌu.
6 A val tas in gana tze cꞌulej to tzꞌocꞌ e cꞌol dꞌa eyetanimail yedꞌ in eyojtacaneli to e Diosal in, man̈ocn̈ej e n̈usantzꞌa silabꞌ dꞌayin in gana.
7 A ex in chon̈abꞌ ex tic, maj e cꞌanabꞌajej in trato eyedꞌoc, icha yutejnac sbꞌa vin̈aj Adán. Chuc ix eyutej e bꞌa dꞌayin.
8 A ebꞌ anima dꞌa chon̈abꞌ Galaad, an̈ej chucal scꞌulej ebꞌ, masanil bꞌaj ay chicꞌ yuj bꞌaj smilvaj ebꞌ.
9 A ebꞌ sacerdote, icha junoc molan̈ elcꞌum yecꞌ ebꞌ. Smac anima ebꞌ yic smacꞌanchamoc. Dꞌa sbꞌeal Siquem smacꞌvicham anima ebꞌ, scꞌulanpax masanil chucal ebꞌ.
10 A ebꞌ aj Efraín ix och ebꞌ ajmulal. Ix yixtejbꞌat sbꞌa ebꞌ yedꞌ ebꞌ yetisraelal. Yuj chiꞌ te yajbꞌentac yilji ebꞌ svilaꞌ.
11 Yedꞌ ex pax ex aj Judá, van sjavi scꞌual eyaelal.
Tzin nibꞌej tzin qꞌuex tas ayoch dꞌa yibꞌan̈ in chon̈abꞌ Israel,