7
palta ayic van van̈tan in chon̈abꞌ Efraín yedꞌ Samaria valani, ataꞌ snachajel smul ebꞌ yedꞌ schucal ebꞌ vuuj. Yujto junlajanxon̈ej tzꞌaj sbꞌeybꞌalan es ebꞌ. Elcꞌum ebꞌ smasanil, tzꞌoch ebꞌ elcꞌal dꞌa yoltac pat yedꞌ dꞌa yoltac calle.2 Tocval sna ebꞌ tato naan schucal ebꞌ chiꞌ vuuj. A ticnaic a tas scꞌulej ebꞌ a oyanoch dꞌa spatic yichan̈ ebꞌ, yuj chiꞌ an̈ej schucal ebꞌ chiꞌ svilaꞌ.
A smul ebꞌ yajal
3 A ebꞌ rey yedꞌ ebꞌ yajal ste tzalaj ebꞌ yuj chucal yedꞌ yuj yixtum animail ebꞌ.
4 An̈ej ajmulal sbꞌo ebꞌ smasanil. A tas sgana ebꞌ chiꞌ, lajan icha junoc horno jabꞌn̈ej scꞌacꞌal tzꞌochi yacbꞌan spajbꞌi ixim harina, axo yic toxo ix pajbꞌi ixim, tzꞌoch scꞌacꞌal sicꞌlabꞌil.
5 Ayic tzꞌoch qꞌuin̈ yuj vin̈ rey, a ebꞌ ayoch dꞌa yopisio yedꞌ vin̈, syucꞌ an̈ ebꞌ, syacꞌan an̈ ebꞌ yucꞌ vin̈ masanto sqꞌue an̈ dꞌa sjolom vin̈ yedꞌ ebꞌ. Ton̈ej scomon tzalaj vin̈ yedꞌ ebꞌ sbꞌuchvaj dꞌay.
6 Ayn̈ejoch chuc pensaril dꞌa spensar ebꞌ. Lajan yoval ebꞌ icha scꞌacꞌal junoc horno pilan acꞌval ayoch scꞌacꞌal, axo sqꞌuin̈ibꞌi dꞌa junxo cꞌu, spuchajxi chacbꞌoc.
7 Lajan ebꞌ smasanil icha scꞌacꞌal horno chiꞌ, ix satel vin̈ yajalil ebꞌ yuj yoval chiꞌ. Lajan syutej sbꞌa ebꞌ dꞌa smasanil ebꞌ sreyal, palta malaj junoc ebꞌ scꞌanbꞌan dꞌayin tas smoj scꞌulej.
Ix yactejcan sDiosal ebꞌ israel
8 A chon̈abꞌ Efraín toxo ix scalej sbꞌa yedꞌ juntzan̈ chꞌoc chon̈abꞌil. Lajan ebꞌ icha junoc ixim vaꞌil max sutchaji.
9 A ebꞌ chꞌoc chon̈abꞌil ix acꞌan lajvoc yip, palta max yil-laj tas van yutaji. A xil sjolom toxo ix sacbꞌieli, tocval syilochi.
10 A in Jehová sDiosal in ebꞌ israel. Vachꞌchom jantac tas ix ja dꞌa yibꞌan̈ ebꞌ yuj schucal, palta yuj yacꞌumtaquil ebꞌ maxtzac sna sbꞌa scꞌol ebꞌ smeltzajcot dꞌayin.
11 A chon̈abꞌ Efraín malaj jabꞌoc spensar, jun rato sbꞌat scꞌan colval dꞌa Egipto, axo dꞌa junxo rato sbꞌatxi scꞌan colval dꞌa Asiria. Lajan icha junoc nocꞌ uch ton̈ej sat bꞌeyecꞌoc.
12 Palta ayic ol bꞌat ebꞌ taꞌ, ol in yumbꞌat in chꞌan̈ yaal dꞌa yibꞌan̈ ebꞌ. Ol telvoc ebꞌ icha junoc nocꞌ much. Ol vacꞌoch yaelal dꞌa yibꞌan̈ ebꞌ, icha ix aj yalchaj bꞌaj smolbꞌej sbꞌa ebꞌ.
13 Obꞌiltac ebꞌ, yujto ix in spatiquejel ebꞌ. Ol satel ebꞌ yuj yaelal ol javoc, yujto ix och spitalil ebꞌ dꞌayin. Tzin nibꞌej tzin col ebꞌ, palta man̈ yeloc tas syal ebꞌ dꞌayin.
14 Man̈ smasaniloc scꞌol ebꞌ tzin yavtej ayic tzꞌel yav ebꞌ dꞌa sat schꞌat. Spol sbꞌa ebꞌ yic scꞌanan ebꞌ dꞌa Baal yic vachꞌ tzꞌaj strigo ebꞌ, yedꞌ yuva ebꞌ. Yuj chiꞌ tzꞌoch ebꞌ ajcꞌolal dꞌayin.
15 Ix in cꞌaybꞌej ebꞌ, ix vacꞌanpax yip ebꞌ, palta axo ebꞌ, a chucal sna ebꞌ dꞌa in patic.
16 Smeltzaj ebꞌ palta man̈oclaj dꞌayin, a in to A inxon̈ej Ochi. Icha junoc jul-labꞌ coxo, max yamchajlaj tas sjulchaj chiꞌ yedꞌoc, icha chiꞌ ebꞌ. Yuj yacꞌumtaquil slolon ebꞌ yajalil, yuj chiꞌ ol cham ebꞌ yuj qꞌuen espada. Axo ebꞌ aj Egipto, toxon̈ej ol bꞌuchvaj ebꞌ dꞌa ebꞌ.