Ix cot dꞌa yibꞌan̈ chon̈abꞌ Israel yuj Dios
8
Puchajocabꞌ qꞌuen trompeta, yujto sjavi jucnaj ebꞌ ajcꞌol dꞌa yibꞌan̈ in chon̈abꞌ icha junoc nocꞌ chꞌacbꞌa, yujto maj scꞌanabꞌajej in trato ebꞌ ix vacꞌ yedꞌoc. Ix spitej sbꞌa ebꞌ dꞌa in cꞌaybꞌubꞌal.2 Vachꞌchom syal ebꞌ dꞌayin: Co Diosal ach, tzach cojtaquejeli, xchi ebꞌ,
3 palta a ebꞌ israel, toxo ix spatiquejel ebꞌ tas vachꞌ, yuj chiꞌ ol pechchaj ebꞌ yuj ebꞌ yajcꞌool.
4 Ayic ix yacꞌanoch sreyal ebꞌ, maj scꞌanbꞌej ebꞌ dꞌayin mach tzꞌochi. Ix say yajalil ebꞌ, palta man̈oc junoc sicꞌbꞌilel vuuj. Ix sbꞌoqꞌue sdiosal ebꞌ yedꞌ qꞌuen splata yedꞌ qꞌuen yoro. Yuj chiꞌ syicꞌcot ebꞌ dꞌa yibꞌan̈.
5 Tzin yaj jun vacax bꞌobꞌil dꞌa qꞌuen oro bꞌaj tzꞌoch ebꞌ aj Samaria ejmelal. Yuj chiꞌ te aycot voval dꞌa ebꞌ. Machequel bꞌaqꞌuin̈ ol yactej ebꞌ israel scꞌulan jun chucal chiꞌ. 6 Man̈ diosoc jun yechel vacax chiꞌ yujto bꞌobꞌil yuj junoc bꞌoum yechel. Yuj chiꞌ ol macꞌjoc vecchajoc.
7 Chuc tas ix scꞌulej ebꞌ, yuj chiꞌ te nivan yaelal ol javoc dꞌa yibꞌan̈ ebꞌ. Malaj yavbꞌen ebꞌ ol sjachꞌaꞌ, malaj harina ol yicꞌ ebꞌ dꞌa sjolom strigo. Vachꞌchom ay jabꞌoc ol yicꞌ ebꞌ jun, axo ebꞌ chꞌoc chon̈abꞌil ol vaanbꞌat dꞌa ebꞌ.
8 A chon̈abꞌ Israel ol acꞌchaj lajvoc. Man̈xa jabꞌoc ol aj yelcꞌoch dꞌa yol sat juntzan̈xo chon̈abꞌ, icha junoc lum cꞌa chen man̈xa vachꞌ yochi, icha chiꞌ ol ajoc.
9 Malaj spensar ebꞌ, lajan ebꞌ icha junoc nocꞌ caltacteꞌal bꞌuru an̈ej snaan bꞌaj sbꞌati. Ix bꞌat ebꞌ dꞌa Asiria, ix stupan ebꞌ yic scolvaj yedꞌ ebꞌ. Icha junoc ix ix syactejcan vin̈ yetbꞌeyum, stupan junoc vin̈ snibꞌej, icha chiꞌ ix yutej sbꞌa ebꞌ.
10 Vachꞌchom stup juntzan̈xo chon̈abꞌ ebꞌ yic scolji ebꞌ yuuj, a in Jehová in ol in molbꞌej ebꞌ, yic syabꞌan syail ebꞌ yuj junoc rey te ay yip.
11 A ebꞌ aj chon̈abꞌ Efraín, tzijtum altar ix sbꞌoqꞌue ebꞌ bꞌaj syacꞌ silabꞌ ebꞌ yic tzꞌel smul ebꞌ yalani, palta yuj juntzan̈ altar chiꞌ ste och smul ebꞌ.
12 Vachꞌchom tzijtum cꞌaybꞌubꞌal ix vacꞌ tzꞌibꞌchaj dꞌa ebꞌ, palta comon lolonel ix ajcan dꞌa yol sat ebꞌ.
13 Syacꞌ silabꞌ ebꞌ dꞌayin, schiꞌanpax schibꞌejal nocꞌ ebꞌ, palta max in tzalaj yedꞌ ebꞌ. Naan schucal ebꞌ vuuj. Ol vacꞌanoch yaelal dꞌa yibꞌan̈ ebꞌ. Ol vacꞌxi meltzaj ebꞌ dꞌa Egipto.
14 A ebꞌ israel sbꞌoqꞌue cuartel ebꞌ bꞌaj scol sbꞌa, palta man̈xo in naanoc yuj ebꞌ, vachꞌchom a in ix in bꞌo ebꞌ. A Judá tzijtum chon̈abꞌ ayoch smuroal sbꞌoqꞌuei, palta ol in n̈ustzꞌa schon̈abꞌ, yedꞌ scuartel chiꞌ, xchi Jehová.