A syaelal chon̈abꞌ Israel ix yalel vin̈aj Oseas
9
Ex vetisraelal man̈ ex tzalajoc, man̈ ex qꞌue chennaj yuj tzalajcꞌolal icha ebꞌ chꞌoc chon̈abꞌil, yujto ix eyactejcan co Diosal, icha tzꞌaj yactancan yetbꞌeyum ebꞌ ix ajmul ix. Tzex te tzalaj e chꞌoxani to xajan Baal eyuuj, yujto vachꞌ tzꞌaj sat tas tzeyavej yuuj eyalani.2 Yuj chiꞌ man̈xalaj ixim trigo yedꞌ sat teꞌ uva ol e moloꞌ. A e vino acꞌto man̈xo ol yabꞌlaj.
3 Man̈xo ol yal-laj eyaj dꞌa schon̈abꞌ Jehová. Ayex ol ex meltzaj dꞌa Egipto, ayex ol ex bꞌat dꞌa Asiria. A tas yajbꞌentac dꞌa yichan̈ Jehová ol e va taꞌ.
4 Man̈xo ol yal-laj eyacꞌan vino silabꞌil yuj eyicꞌanchaan̈ Jehová, man̈ ol schalaj e silabꞌ taꞌ. A tas ol e vaꞌa, icha tas svaji ayic ay chamel, yuj chiꞌ a mach ol vaanoc, ol can chucal dꞌa yichan̈ ley. Ol yal yecꞌ svejel ebꞌ yuuj, palta man̈ ol yal-laj yicꞌanbꞌat ebꞌ dꞌa stemplo Jehová.
5 Man̈xo ol yal eyacꞌan qꞌuin̈, juntzan̈ qꞌuin̈ yic Jehová.
6 Ol ex el lemnaj dꞌa jun yaelal ol javoc. Axo ebꞌ aj Egipto ol ex molanbꞌatoc. A dꞌa chon̈abꞌ Menfis ol ex mucchaj yuj ebꞌ. A bꞌaj molbꞌil qꞌuen e plata ayoch e bꞌeyumaloc yedꞌ bꞌaj ix ex ecꞌ cajan, ol qꞌuibꞌqꞌue an̈ an̈cꞌultac, nabꞌa qꞌuiix ol ajcanoc.
7 Ex vetisraelal, van sjavi scꞌual sjavi yaelal. Ol nachajel eyuuj to toxo ix cꞌoch scꞌual yic tze cha e tojol icha smojalil. Tzeyal icha tic: A ebꞌ schecabꞌ Dios, te malaj spensar ebꞌ. A ebꞌ cuchbꞌabꞌil yuj Yespíritu Dios toxo ix och ebꞌ locoal, xe chi. Tzeyal icha chiꞌ, yujto tzꞌalchaj e chucal yuj ebꞌ, yuj chiꞌ schichon e cꞌool dꞌa ebꞌ.
8 A Dios ix yacꞌoch ebꞌ schecabꞌ ex stan̈vej ex aj Efraín, palta tze bꞌoem yaal dꞌa yoltac sbꞌe ebꞌ e tan̈vumal chiꞌ. Inatax dꞌa stemplo Dios schichon e cꞌool dꞌa ebꞌ.
9 Ix ex ixtaxel dꞌa juneln̈ej, icha ix uji dꞌa chon̈abꞌ Gabaa. Palta axo Jehová ol snacot e chucal chiꞌ, ol acꞌchajoch yaelal dꞌa eyibꞌan̈ yuj e mul chiꞌ.*
Ol yabꞌ syail ebꞌ israel yuj smul
10 Syal Jehová icha tic: Ayic ix in chalan in bꞌa yedꞌ ebꞌ israel, ix in te tzalaji, icha mach tzꞌilchaj teꞌ uva yuj dꞌa tzꞌinan luum. A ebꞌ e mam eyicham, icha teꞌ sat higo te nibꞌabꞌil spet eluli, icha chiꞌ ajnac ebꞌ dꞌa yol in sat. Axo scꞌochnac ebꞌ dꞌa chon̈abꞌ Peor, yoch ebꞌ ejmelal dꞌa Baal sdiosal jun chon̈abꞌ chiꞌ, te yajbꞌentac yutejnac sbꞌa ebꞌ icha jun comon dios xajanejnac ebꞌ chiꞌ.
11 A snivanil yelcꞌoch chon̈abꞌ Efraín, ton̈ej ol satqꞌue icha sbꞌat jen̈naj junoc nocꞌ much. Man̈xa unin ol aljoc dꞌay, man̈xa ebꞌ ix ix ol och yabꞌixal, man̈xalaj pax ebꞌ ix ol scuchoch yuneꞌ.
12 Tato ay bꞌaj ol qꞌuibꞌ ebꞌ unin chiꞌ, a inxo ol viqꞌuel sqꞌuinal ebꞌ, man̈xo junoc ol vacꞌcani. Obꞌiltac juntzan̈ anima chiꞌ ayic ol vicꞌanel in bꞌa dꞌa ebꞌ.
13 Ayic ix vilan ebꞌ aj Efraín, lajan icha junoc teꞌ palma avabꞌil bꞌaj te yax sat, icha chiꞌ yaj ebꞌ ix vilaꞌ. Palta a ticnaic, ol yiqꞌuelta yuninal ebꞌ yic smacꞌjichamoc, xchi Jehová.*
14 Mamin Jehová, ¿Tas smoj tzin cꞌan dꞌayach to tzacꞌ dꞌa juntzan̈ anima tic? Vachꞌ ama, tato malaj yuneꞌ ebꞌ ix ix. Tato ay ebꞌ ix ay yuneꞌ jun, vachꞌ ama to malaj yal yim ebꞌ ix yic maxtzac yacꞌ chunoc yuneꞌ ebꞌ ix chiꞌ.
A yoval scꞌol Jehová dꞌa chon̈abꞌ Efraín
15 Ix yalan Jehová icha tic: Dꞌa Gilgal ix chael yich scꞌulan chucal ebꞌ, yuj chiꞌ a pax taꞌ ix el yich voch ajcꞌolal dꞌa ebꞌ. Yuj masanil chucal scꞌulej ebꞌ, yuj chiꞌ ol viqꞌuelta ebꞌ dꞌa lum in luum ix vacꞌ dꞌa ebꞌ. Man̈xo ol in xajanej ebꞌ, yujto smasanil ebꞌ yajal ebꞌ, te pit.
16 A chon̈abꞌ Efraín echenxo yaji. Lajan icha junoc te teꞌ toxo ix tacji schꞌan̈al yip, maxtzac yacꞌ sat. Vachꞌchom ay yuninal ebꞌ, a inxo ol vacꞌcham yuninal ebꞌ chiꞌ to xajanabꞌil yuuj, xchi Jehová.
17 A jun chon̈abꞌ tic, max cha yabꞌ ebꞌ tas syal in Diosal. Yuj chiꞌ a ol paticanel ebꞌ, axo dꞌa scal juntzan̈ chꞌoc chon̈abꞌil ol saclemcanbꞌat ebꞌ.