Ol juchajem yaltar ebꞌ israel
10
Ex vetisraelal, lajan ex icha jun ibꞌoc teꞌ uva te ay sat yicn̈ej schꞌocoj. Icha satan teꞌ uva chiꞌ, icha chiꞌ eyaltar ix e bꞌoqꞌuei. Axo ix ex te och bꞌeyumal, ix e vachꞌ bꞌoej eyaltar chiꞌ bꞌaj tzeyal e bꞌa dꞌa juntzan̈ e comon diosal chiꞌ.2 A ex tic, chapoj yaj e pixan. Axo ticnaic, ol e tupel e chucal chiꞌ. A Jehová ol juanem masanil eyaltar chiꞌ, ol sjuanpaxem juntzan̈ yechel e diosal chiꞌ.
3 Yuj chiꞌ ol eyal icha tic: Malaj co reyal, yujto malaj yelcꞌoch Jehová dꞌa yol co sat. Palta, ¿tasto val tzꞌoch junoc rey chiꞌ cuuj? xe chama.
4 An̈ej lolonel tzeyacꞌaꞌ, tzeyacꞌan e tiꞌ dꞌa es. Ayic tze chꞌolbꞌitan tas yaj ebꞌ anima, man̈ tojoloc tzeyutej. A tze bꞌoan tas yaj ebꞌ anima chiꞌ, lajan icha junoc oval an̈cꞌultac sqꞌuibꞌqꞌue dꞌa cal munlajel.
5-6 A ebꞌ aj Samaria ol luclon ebꞌ yuj xivelal, ol yalan ebꞌ: ¿Tas ol utaj co diosal? xcham ebꞌ. A jun vacax sdiosal ebꞌ ay dꞌa Bet-avén ol icꞌchajbꞌat dꞌa chon̈abꞌ Asiria, yic tzꞌacꞌchaj dꞌa vin̈ rey nivan yelcꞌochi. Yuj chiꞌ ol cus ebꞌ chon̈abꞌ, ol ocꞌ ebꞌ yedꞌ ebꞌ sacerdote, yujto a svachꞌilal yilji jun chiꞌ, toxo ix sateli. Icha chiꞌ ol can chon̈abꞌ Efraín dꞌa qꞌuixvelal yujto ix yal sbꞌa dꞌa jun yechel vacax chiꞌ.
7 Ol satel chon̈abꞌ Samaria yedꞌ sreyal, icha sbꞌatcan bꞌachachoc junoc cꞌajil teꞌ dꞌa yibꞌan̈ a aꞌ.
8 Ol lajvoquem stemplo sdiosal ebꞌ chꞌoc chon̈abꞌil, aton juntzan̈ bꞌaj ix och chon̈abꞌ Israel dꞌa chucalil. Ol qꞌuibꞌqꞌue teꞌ qꞌuiix bꞌaj ay yaltar ebꞌ chiꞌ. Ol yalan ebꞌ yuj lum vitz yedꞌ yuj lum tzalan icha tic: Comonoc syal scot juynaj dꞌa quibꞌan̈ yic tzon̈ scꞌubꞌejeli, xcham ebꞌ.
Syaelal chon̈abꞌ Israel ix och yuj Jehová
9 Ix yalan Jehová icha tic: A ex israel ex tic, ix e chael yich e cꞌulan chucal dꞌa Gabaa, an̈ejaꞌ icha chiꞌ tze cꞌulej ticnaic. Yuj chiꞌ ol ex satel yuj oval dꞌa Gabaa chiꞌ.
10 A in ol in na bꞌaqꞌuin̈ ol vacꞌoch yaelal yibꞌan̈ jun chon̈abꞌ tic. Ayic ol vacꞌanoch yaelal chiꞌ yuj jantac schucal scꞌulej, ol och oyan juntzan̈ chon̈abꞌ dꞌa spatic yacꞌan oval yedꞌoc.
11 A dꞌa yalan̈taxo, lajan chon̈abꞌ Efraín icha junoc nocꞌ vacax cꞌaynacxo smunlaji, scꞌanabꞌajej stecꞌvi trigo. Axo ticnaic a ebꞌ aj Judá yedꞌ juntzan̈xo ebꞌ yin̈til Jacob ol yabꞌ syail ebꞌ icha junoc nocꞌ vacax bꞌaj tzꞌoch teꞌ yugo dꞌa sjaj yic smunlaj nocꞌ dꞌocoj luum yedꞌ scalan lum yedꞌ qꞌuen rastrillo.
12 A ex tic lajan ex icha junoc luum actabꞌilcani, man̈xa mach smunlaj dꞌay. Palta axo ticnaic bꞌoec e bꞌeybꞌal icha tzꞌaj yavchajxi tas dꞌa jun lum actabꞌilcan chiꞌ. A tas ol eyavej, a tojolal, axo tas ol e jachꞌaꞌ aton bꞌaj tzex in xajanej. Smojxo tzeyacꞌoch e bꞌa dꞌa yol in cꞌabꞌ, masanto ol in javoc vacꞌ e colnabꞌil icha yem n̈abꞌ.
13 Palta a ex xo tic an̈ej chucal tze cꞌulej, yuj chiꞌ van e chaan spac tas man̈ tojoloc tze cꞌulej chiꞌ. Van e chaan spac e lecꞌtial.
Yujto ix eyacꞌoch e carruaje yic oval yedꞌ ebꞌ e soldado tzijtum sbꞌisul yipoc e cꞌool,
14 yuj chiꞌ ol qꞌue somnaj masanil ebꞌ soldado chiꞌ, ol satel e cuartel icha ix aj satel chon̈abꞌ Bet-arbel yuj vin̈aj rey Salmán. Dꞌa jun oval chiꞌ, ix macꞌchaj chojoc ebꞌ ix nunabꞌil yedꞌ yuneꞌ.
15 Ex aj Betel, icha chiꞌ ol ex utaj yuj jantac e chucal. A vin̈ e reyal ol bꞌabꞌlaj cham dꞌa qꞌuin̈ibꞌalil, xchi Jehová.