A Dios xajan schon̈abꞌ yuuj
11
Ix yal Jehová icha tic: Ayic unin chon̈abꞌto Israel tic, ix in xajanej. Icha vuninal yaji, ato dꞌa Egipto ix vavtejcoti.2 Ayic ix vavtancot chiꞌ, te najat ix el dꞌa in tzꞌey. A dꞌa juntzan̈ dios Baal ix yacꞌ silabꞌ jun in chon̈abꞌ tic. Ix sn̈us incienso ebꞌ dꞌa juntzan̈ yechel.
3 Ayic unin chon̈abꞌto Efraín tic, ichato ix in chelbꞌeyoc. Vachꞌchom icha chiꞌ, palta max yal scꞌool ebꞌ snaꞌa tato a in tzin tan̈vej ebꞌ.
4 Ix in quetzcot Efraín chiꞌ yujto xajan vuuj, icha tzꞌaj squetzchaj junoc nocꞌ vacax. Lajan svutej icha junoc mach tzꞌicꞌanel yugo dꞌa nocꞌ vacax, vachꞌ tzꞌaj yacꞌan svael. Icha chiꞌ ix vutej in bꞌa dꞌa ebꞌ.
5 Palta man̈ jabꞌoc ix in yacꞌoch ebꞌ yipoc scꞌool. A Egipto ix yacꞌoch ebꞌ yipoc scꞌool, palta yuj chiꞌ dꞌa yalan̈ smandar chon̈abꞌ Asiria ol canoc.
6 Ol och oval dꞌa schon̈abꞌ ebꞌ. Yuj oval chiꞌ ol em juynaj scuartel ebꞌ. Ol satel ebꞌ yujto ix yacꞌoch sjelanil ebꞌ yipoc scꞌool.
7 A in chon̈abꞌ tic naan yuuj to tzꞌelcan dꞌa in patic yic syal sbꞌa dꞌa juntzan̈ comon dios. Vachꞌchom tzꞌavaj ebꞌ scꞌanan colval dꞌa juntzan̈ comon dios chiꞌ, palta man̈ ol colvajlaj dꞌa ebꞌ.
8 ¿Tas val ol aj ex vactancan ex chon̈abꞌ Efraín? ¿Tas val ol aj ex vactancan ex yin̈tilal Israel? ¿Ol am yal ex vacꞌan satel icha ix vutej chon̈abꞌ Adma? ¿Ol am ex vutej icha ix vutej chon̈abꞌ Zeboim? Ya syabꞌ in pixan, scus in cꞌol eyuuj.*
9 Man̈ ol in cꞌulejlaj ichaval yoval in cꞌool. Man̈ ol in meltzajlaj ex vacꞌan satel ex chon̈abꞌ Efraín, yujto Dios in, man̈ in animaoc. Ayinecꞌ eyedꞌoc A inxon̈ej Ochi, yuj chiꞌ man̈ ol in javoc ex in sateli.
10 A in Jehová in ol el vav icha junoc nocꞌ choj. Yuj chiꞌ ol te ibꞌxoc ebꞌ vuninal yuj xivelal, ol cot ebꞌ dꞌa bꞌaj tzꞌem cꞌu, ol och tzacꞌan ebꞌ vuuj.
11 Ol cot lemnaj ebꞌ dꞌa Egipto yedꞌ dꞌa Asiria icha nocꞌ cuvajteꞌ. A in Jehová in svalaꞌ, ol vacꞌ cajnaj ebꞌ junelxo dꞌa scajnubꞌ junjun.
A schucal ebꞌ schon̈abꞌ Dios
12 A chon̈abꞌ Efraín yin̈til Israel, an̈ej es scꞌulej dꞌa vichan̈. Dꞌa chabꞌsatil syal sbꞌa dꞌayin. Axo ebꞌ aj Judá, te pit syutej sbꞌa ebꞌ dꞌayin, a in sDiosal in ebꞌ A inxon̈ej Ochi, tzꞌeln̈ejcꞌoch tas svalaꞌ.