12
Masanil tas scꞌulej chon̈abꞌ Efraín, nabꞌan̈ej. Ton̈ej syixtejbꞌat sbꞌa. Ste qꞌueval chaan̈ dꞌa ixtoj anima. Comonxon̈ej sbꞌo strato yedꞌ ebꞌ aj Asiria, syacꞌanpaxbꞌat aceite ebꞌ yic smontan Egipto, xchi Jehová.2 A ebꞌ aj Judá ay smul ebꞌ dꞌa yol sat Jehová chiꞌ. A ol acꞌanoch yaelal dꞌa schon̈abꞌ vin̈aj Jacob yuj sbꞌeybꞌal. Ol stup dꞌa ebꞌ, icha val tas sbꞌeybꞌalej ebꞌ.
3 Inatax ayic manto aljoc vin̈aj Jacob chiꞌ, syamnac yich yoc vin̈ yucꞌtac vin̈, axo yic icham vinacxo vin̈, stelajnac sbꞌa vin̈ yedꞌ Dios.
4 Stelajnac sbꞌa vin̈ yedꞌ Dios yedꞌ jun ángel, masanto yacꞌnac ganar jun ángel chiꞌ vin̈. Ocꞌnac vin̈, scꞌanannac svachꞌcꞌolal Dios vin̈ dꞌa yibꞌan̈. A dꞌa Betel schꞌoxnac sbꞌa Dios dꞌa vin̈, lolonnac vin̈ yedꞌ taꞌ.
5 A Jehová Yajal dꞌa Smasanil, aton sbꞌi bꞌinajnac.
6 Palta a ex israel ex tic, meltzajan̈ec dꞌa co Diosal. Cꞌanabꞌajum tzeyutej e bꞌa dꞌay, tojoln̈ej tzeyutej e bꞌeybꞌal. Ayocabꞌn̈ej och yipoc e cꞌool.
7 Icha tic yalan Jehová: A ebꞌ chon̈vajum yic Efraín, a echlabꞌ man̈ tzꞌacanoc scꞌan ebꞌ, yujto scham val ebꞌ yelcꞌani.
8 Syal ebꞌ icha tic: Vachꞌchom toxo on̈ och bꞌeyumal, vachꞌchom bꞌeyum on̈xo, palta malaj mach syal scot yoval dꞌayon̈, yic syalan ebꞌ to on̈ och bꞌeyumal yuj cacꞌan musansatil ebꞌ anima, xchi ebꞌ, xchi Jehová.
9 Syalanxi Jehová chiꞌ icha tic: A in Jehová in, atax yic ayex ecꞌ dꞌa Egipto e Diosal in. Ol ex vacꞌ cajnaj junelxo dꞌa yoltac mantiado, icha dꞌa juntzan̈ cꞌual ayic molan ex ecꞌ dꞌa tzꞌinan luum.
10 A in tic ix in lolon dꞌa ebꞌ in checabꞌ. Tzijtum sbꞌisul tas ix vacꞌ yil ebꞌ. A ebꞌ chiꞌ ix vacꞌ alanel in cꞌaybꞌubꞌal dꞌa chꞌoxnabꞌilal.
11 A dꞌa Galaad ay sdiosal ebꞌ chꞌoc chon̈abꞌil, palta man̈xa jabꞌoc yelcꞌoch ol ajcanoc. A dꞌa Gilgal syacꞌ nocꞌ vacax ebꞌ dꞌa silabꞌil, palta lajanxo ol ajcan yaltar ebꞌ icha qꞌuen qꞌuen molbꞌilqꞌue bꞌulan dꞌa cal munlajel, xchi Jehová.
12 A vin̈aj Jacob, bꞌatnaccan vin̈ elelal dꞌa yoltac yic Aram. Ataꞌ ochnac vin̈ dꞌa tan̈voj calnel yuj yicꞌan ix yetbꞌeyum vin̈.
13 A yedꞌ jun schecabꞌ yicꞌnaquelta chon̈abꞌ Israel Jehová dꞌa Egipto. An̈ejaꞌ yedꞌ jun schecabꞌ chiꞌ, stan̈vejn̈ej.
14 Palta a val anima yic Efraín, ix stzuntzejcot yoval scꞌol Jehová ebꞌ. Ix yacꞌ chabꞌax scꞌol ebꞌ. Yuj chiꞌ ol yacꞌ Jehová chiꞌ stupel ebꞌ jantac chucal ix scꞌulej, an̈ejaꞌ yuj schucal ebꞌ chiꞌ ol em dꞌa yibꞌan̈.