Ol lajvoc em chon̈abꞌ Israel
13
Ayic slolonnac ebꞌ yichamtac vinaquil chon̈abꞌ Efraín dꞌa pecaꞌ, axo juntzan̈xo yin̈tilal Israel chꞌoxannac to ay yelcꞌoch dꞌa yol sat ebꞌ. Axo ticnaic, ol cham ebꞌ aj Efraín chiꞌ yuj smul ix yacꞌochi, ix och ebꞌ ejmelal dꞌa Baal.2 Tzato qꞌuen̈ej chaan̈ ebꞌ yacꞌanoch smul. Sbꞌoqꞌue qꞌuen plata ebꞌ sdiosaloc, icha val tas snibꞌej scꞌool ebꞌ, icha pax tas scot dꞌa spensar ebꞌ, icha chiꞌ syutej ebꞌ sbꞌoan sdiosal. Slajvi chiꞌ syalanpaxqꞌue ebꞌ: Aqꞌuec e silabꞌ dꞌay, xchi ebꞌ. Axo ebꞌ anima jun, stzꞌubꞌelta stiꞌ jun yechel ebꞌ lajan yilji icha vacax chiꞌ.
3 Yuj chiꞌ lajann̈ej ol aj ebꞌ icha asun ayemi ayic sqꞌuin̈ibꞌi, icha pax yal acꞌval ayemi ayic te acꞌvalto to spet satemi. Lajan pax ebꞌ icha matzꞌil trigo tzꞌicꞌchajbꞌat yuj icꞌ, ma icha te tabꞌ tzꞌel dꞌa junoc ventena.
4 Ix yalan Jehová icha tic: A in Jehová e Diosal in, atax yic ayex ecꞌ dꞌa Egipto, malaj junocxo tas tzeyacꞌoch e diosaloc, palta a inn̈ej. A inn̈ej e Columal vaji.
5 Te vachꞌ ajnac ex in tan̈van dꞌa taquin̈ luum, bꞌaj te ay cꞌacꞌ.
6 Palta a val yic ix yacꞌan sobre e vael, ix e te iqꞌuejchaan̈ e bꞌa, ix in bꞌatcan satcꞌolal eyuuj.
7 Yuj chiꞌ icha junoc nocꞌ choj ol vutej in bꞌa dꞌayex, ma icha junoc nocꞌ tzꞌibꞌchoj smacvaj dꞌa yoltac bꞌe.
8 Ol in elta jucnaj dꞌa eyichan̈, icha junoc nocꞌ nun oso to toxo ix icꞌchajbꞌat yuneꞌ. Ol ex vacꞌan chocꞌbꞌocbꞌat taꞌ, icha junoc nocꞌ choj schianbꞌat schibꞌej, ma icha tzꞌaj schocꞌ jecchitanbꞌat schibꞌej junoc nocꞌ chium nocꞌ.
9 Ol ex vacꞌ satel a ex israel ex tic, malaj mach ol yal stenaneqꞌui.
10 Ix e cꞌan e reyal yedꞌ e cuchbꞌumal, palta ¿tom a ebꞌ syal tan̈van masanil e chon̈abꞌ tic?
11 Aycot voval dꞌayex ayic ix vacꞌan e reyal chiꞌ, an̈ejaꞌ aypaxcot voval dꞌayex ayic ix vicꞌanpaxecꞌ ebꞌ e reyal chiꞌ.
12 Chequel yaj schucal chon̈abꞌ Efraín. Tzꞌibꞌ ix ajcan smul chiꞌ.
13 A chon̈abꞌ Israel, scꞌoch scꞌual yic sna sbꞌa, palta te malaj spensar, icha junoc unin man̈ vachꞌoc syutej sayancot sbꞌa ayic tzꞌalji dꞌa snun, icha chiꞌ yaji.
14 Ol in colcanel in chon̈abꞌ dꞌa yol slumal chamel. Ol in colcanel dꞌa yol scꞌabꞌ chamel. A in ol vacꞌ satel chamubꞌ. Man̈xo ol in chꞌox voqꞌuelcꞌolal dꞌa chon̈abꞌ Efraín chiꞌ.
15 Vachꞌchom sqꞌuen̈ejchaan̈ dꞌa scal ebꞌ yetisraelal, palta ol cot voval dꞌay. Lajan ol aj scot voval chiꞌ icha cꞌacꞌ dꞌa yichchaan̈, icha yecꞌ chacxuxum icꞌ dꞌa tzꞌinan luum, yuj chiꞌ ol tup sjajtac a aꞌ, axo ebꞌ ajcꞌool ol icꞌanbꞌat masanil sbꞌeyumal.
16 A chon̈abꞌ Samaria ol yicꞌ pax syaelal, yujto pit syutej sbꞌa dꞌayin. Ol cham ebꞌ yuj qꞌuen espada. A yuninal ebꞌ ol tenchajem dꞌa sat luum chiꞌ, xchi Jehová.