Syal vin̈aj Oseas to smeltzaj Israel dꞌa Jehová
14
Ex vetisraelal, meltzajan̈ec dꞌa Jehová co Diosal, vachꞌchom ix ex telvi val yuj e mul.2 Meltzajan̈ecxi dꞌa Jehová, tzex tevi dꞌay icha tic: Acꞌ tup co mul, tza chaan quejmelal yedꞌ co aloj vachꞌ lolonel scal dꞌayach.
3 A Asiria max yal co coljiel yuuj. ¿Toc val syal pax co colchajel yuj nocꞌ chej? Man̈xo ol caloch juntzan̈ tas sco bꞌo co diosaloc, yujto an̈ej val dꞌayach ach Jehová syicꞌ snivanil scꞌol ebꞌ unin man̈xa smam snun, xe chi.
A Jehová ol yacꞌn̈ej sqꞌuinal ebꞌ israel
4 Syalan Jehová icha tic: Ol vacꞌ ja spensar ebꞌ dꞌa spitalil. Vachꞌchom man̈ smojoc, palta ol in xajanej ebꞌ, yujto man̈xo ol vacꞌcot yoval in cꞌol dꞌa ebꞌ.
5 Ichaval tzꞌaj xumaquil an̈ chochol yuj yal acꞌval, ma icha teꞌ cꞌuteꞌ dꞌa sjolomtac vitzal Líbano to najat sbꞌat schꞌan̈al yibꞌ, icha chiꞌ ol vutej ebꞌ israel.
6 Yuj chiꞌ te vachꞌ ix aj yel mayan icha val scꞌabꞌtac teꞌ olivo, lajan pax sjabꞌ icha val sjabꞌ teꞌ cꞌuteꞌ dꞌa Líbano.
7 Ol in yacꞌxioch ebꞌ yipoc scꞌool. Vachꞌxo ol aj sqꞌuibꞌ icha sqꞌuibꞌ ixim trigo, vachꞌxon̈ej xumacan icha teꞌ uva. Te bꞌinajnac ol aj ichaval vino scot dꞌa Líbano chiꞌ.
8 Ex aj Efraín, ¿toc ay yopisio juntzan̈ comon dios chiꞌ? A in ol in tacꞌvoc dꞌayex, ol ex in tan̈vejpaxi. Icha junoc teꞌ taj yax xiil, icha chiꞌ vaj eyuuj. Vuuj val, vachꞌ tzex elcꞌochi, xchi Jehová.
Slajvubꞌal
9 A ebꞌ jelan yedꞌ ebꞌ aj pensar ol nachajel juntzan̈ in lolonel tic yuj ebꞌ. A sbꞌe Jehová, te tojol. A ebꞌ vachꞌ spensar, a ebꞌ sbꞌat dꞌa yol jun bꞌe chiꞌ, axo ebꞌ te pit, stelvi ebꞌ dꞌay.