A slajvubꞌal
12
A dꞌa jun tiempoal chiꞌ, a ángel Miguel, sat ángel yaji, stan̈vumal ebꞌ etchon̈abꞌ israel, ol och vaan.A dꞌa jun tiempoal chiꞌ te ay val nivan yaelal. Manta juneloc ix uji jun chiꞌ yictax ix el yich spitzviqꞌue vaan juntzan̈ nación. A dꞌa jun tiempoal chiꞌ, ay ebꞌ etchon̈abꞌ ol colchajoc, syalelcꞌochi, aton ebꞌ tzꞌibꞌabꞌil sbꞌi dꞌa yol chꞌan̈ libro yic Dios.
2 Tzijtum ebꞌ chamnacxo ol pitzvocpaxi. Ay juntzan̈ ebꞌ ol chaan sqꞌuinal dꞌa juneln̈ej. Ay pax juntzan̈xo ebꞌ ol bꞌatcan dꞌa scal qꞌuixvelal, ol yajchajcanel ebꞌ dꞌa juneln̈ej.
3 A ebꞌ jelan, ebꞌ ix cuchbꞌan tzijtum anima dꞌa vachꞌ bꞌeybꞌal, ol checlaj ebꞌ dꞌa masanil tiempo icha scopopial yilji qꞌuen cꞌanal ay dꞌa satchaan̈.
4 Palta a ach tic Daniel, maccan jun libro tic. Tza sicꞌancani masanto ol javoc slajvubꞌal tiempo chiꞌ, tzacꞌancanoch sello dꞌay. Tzijtum anima ol bꞌat tic, ol bꞌat tic yuj snibꞌan yojtaquejeli tas van yuji, xchi jun ángel chiꞌ dꞌayin.
5 Ix vilan chavan̈xo ebꞌ vinac lin̈anecꞌ dꞌa stiꞌ aꞌ nivan Tigris, junjun ebꞌ dꞌa junjun stitac aꞌ. 6 A junoc ebꞌ chiꞌ ix cꞌanbꞌan dꞌa jun vinac ayoch pichul lino yuuj, lin̈anecꞌ dꞌa yibꞌan̈qꞌue ebꞌ, ix yalan icha tic: ¿Bꞌaqꞌuin̈ val ol lajvoc juntzan̈ tas ayxo smay yilji tic? xchi dꞌay. 7 Axo jun vinac ayoch pichul lino yuuj chiꞌ, ix yicꞌchaan̈ scꞌabꞌ, ix yacꞌan stiꞌ dꞌa yichan̈ Dios ayn̈ejeqꞌui, ix yalani: Ayic ol lajvoc nan̈al schan̈il abꞌil, ayic man̈xalaj yip ebꞌ schon̈abꞌ Dios ol can yuj ebꞌ ajcꞌol chiꞌ, ichato chiꞌ ol lajvoquecꞌ masanil juntzan̈ tic, xchi.
8 Ix vabꞌ val tas ix yalaꞌ, palta maj nachajel-laj vuuj. Yuj chiꞌ ix in cꞌanbꞌej dꞌay icha tic: Mamin, ¿tas val ol aj slajviecꞌ masanil juntzan̈ tic? xin chi. 9 Ix yalan dꞌayin icha tic: Manto a na yuj juntzan̈ tic Daniel, yujto masanil juntzan̈ tic, ton̈ej ol sicꞌchajcanoc masanto ol javoc slajvubꞌ. 10 Yuj juntzan̈ yaelal chiꞌ tzijtum ebꞌ anima ol icꞌjoccanel smul, ol tojolbꞌoccan spensar, axo ebꞌ chuc jun, ol qꞌuen̈ejchaan̈ ebꞌ scꞌulan chucal. Man̈ ol nachajel yuj ebꞌ tas van yuji chiꞌ. Axo ebꞌ anima jelan chiꞌ, ol nachajel yuj ebꞌ. 11 Ayic ol yamchajoch vaan yacꞌchaj silabꞌ dꞌa junjun cꞌu yedꞌ yic ol acꞌchajoch tas yajbꞌil yuj Dios dꞌa yol stemplo yic tzꞌixtaxeli, ichato chiꞌ bꞌian, ol el yich jun mil 290 cꞌual. 12 Te tzalajcꞌolal yic ebꞌ tecꞌan ol yutej sbꞌa masanto ol tzꞌacvoc mil 335 cꞌual. 13 Palta a ach tic, tecꞌann̈ej tzutej a bꞌa masanto dꞌa slajvubꞌal, ichato chiꞌ ol icꞌan ip. Ato dꞌa slajvubꞌ cꞌual, ol ach pitzvocxi, axo a chaan spac chiꞌ, xchi dꞌayin.