Ayto och oxvan̈ ebꞌ vin̈ rey dꞌa Persia, slajvi chiꞌ ol och junxo vin̈ schan̈il rey. A jun vin̈ chiꞌ, más te bꞌeyum vin̈ dꞌa yichan̈ ebꞌ oxvan̈ chiꞌ. A yuj sbꞌeyumal vin̈ chiꞌ, ol yicꞌ yip vin̈, ol yacꞌan val oval vin̈ yedꞌ vin̈ sreyal Grecia. 3 Slajvi chiꞌ, ol och jun vin̈ sreyal Grecia chiꞌ, te acꞌum oval. Ol te levanbꞌoc smacbꞌen chiꞌ, ol scꞌulan masanil tas snibꞌej. 4 Palta ayic toxo ix yicꞌ yip yopisio vin̈ chiꞌ, chan̈poj ol ajcanbꞌatoc. A yopisio jun vin̈ rey chiꞌ, man̈ ol bꞌeyn̈ejbꞌat dꞌa ebꞌ yin̈tilal. Ol el yip yopisio vin̈ chiꞌ, man̈xo lajanoc ol aj yip icha dꞌa sbꞌabꞌelal, yujto chan̈poj ol ajoc, chꞌocxo pax mach ol ochcan reyal sqꞌuexuloc vin̈.

5 A jun vin̈ ol ochcan sreyaloc sur, ol ste iqꞌuej yip vin̈, palta a junocxo vin̈ yajal soldado te nivan ol aj yopisio dꞌa yichan̈ jun vin̈ sreyal sur chiꞌ, ol yacꞌan yajalil vin̈ dꞌa jun macbꞌen te levan chiꞌ. 6 Axo yic ol ecꞌ jayeoc abꞌil, a ebꞌ vin̈ chavan̈ rey chiꞌ, ol sbꞌo junoc strato ebꞌ vin̈. A jun vin̈ sreyal sur chiꞌ, ol yacꞌbꞌat junoc yisil vin̈ dꞌa vin̈ sreyal norte, yic vachꞌ ay juncꞌolal dꞌa scal chabꞌ macbꞌen chiꞌ. Palta man̈ ol yal yuj ix yicꞌan bꞌey jun trato yedꞌ vin̈ yetbꞌeyum chiꞌ. Yuj chiꞌ ol miljoccham ix yedꞌ vin̈ yedꞌ yuneꞌ ix yedꞌ pax ebꞌ schecabꞌ ix. 7 Palta ay junoc scꞌabꞌ yoc ix ol och reyal, ol yacꞌan oval yedꞌ ebꞌ soldado yic norte. Ol acꞌjoc ganar ebꞌ yuuj yedꞌ chon̈abꞌ bꞌaj cajan jun vin̈ sreyal norte chiꞌ. 8 Ol yicꞌbꞌat sdiosal ebꞌ ay dꞌa norte chiꞌ dꞌa Egipto, aton juntzan̈ bꞌobꞌil dꞌa qꞌuen qꞌueen yedꞌ juntzan̈ syamcꞌabꞌ ebꞌ nabꞌa oro yedꞌ plata. Ol ecꞌbꞌat jayeoc abꞌil, malaj oval ol och dꞌa scal ebꞌ. 9 Ol lajvoc chiꞌ, a jun vin̈ sreyal norte chiꞌ, ol yacꞌ oval vin̈ yedꞌ jun vin̈ sreyal sur chiꞌ, palta man̈ ol yal-laj yuj vin̈, ol meltzaj vin̈ dꞌa schon̈abꞌ.

10 Palta axo ebꞌ yuninal vin̈ sreyal norte chiꞌ, ol qꞌue vaan ebꞌ yacꞌ oval. Man̈ jantacoc sbꞌisul soldado ebꞌ ol smolbꞌej. A junoc ebꞌ yuninal vin̈ chiꞌ ol bꞌat yedꞌ ebꞌ soldado yacꞌ oval yedꞌ vin̈ sreyal sur chiꞌ yic syacꞌan ganar yalani. Ol ecꞌbꞌat ebꞌ icha junoc elumaꞌ, masanto ol cꞌoch ebꞌ dꞌa schon̈abꞌ vin̈ sreyal sur chiꞌ. 11 Yuj chiꞌ ol te cot yoval vin̈ sreyal sur chiꞌ. Ol elta vin̈ yacꞌ oval dꞌa jun n̈ilan̈ soldado ajcꞌol chiꞌ, ol satjoquel ebꞌ smasanil yuj vin̈. 12 Yujto ol satel jun n̈ilan̈ ebꞌ ajcꞌol chiꞌ yuj vin̈, ol yicꞌanchaan̈ sbꞌa vin̈, tzijtumto juntzan̈xo ebꞌ ajcꞌool ol smilcham vin̈, palta man̈ nivanoc tiempo ol yacꞌ yopisio vin̈ chiꞌ. 13 Ayic ol ecꞌbꞌat jayeoc abꞌil, a vin̈ sreyal norte chiꞌ, te ecꞌbꞌal nivan ebꞌ soldado ol smolbꞌej vin̈ dꞌa yichan̈ ebꞌ ix smolbꞌej dꞌa sbꞌabꞌelal, ol bꞌatxoc vin̈ yacꞌ oval yedꞌ vin̈ sreyal sur chiꞌ, yedꞌnac syamcꞌabꞌ ebꞌ yic oval smasanil.

14 A dꞌa jun tiempoal chiꞌ, tzijtum ebꞌ ol och ajcꞌolal dꞌa vin̈ sreyal sur chiꞌ. A dꞌa scal ebꞌ chiꞌ, ay juntzan̈ ebꞌ etisraelal te chuc spensar, ol spac sbꞌa ebꞌ yic tzꞌelcꞌoch tas acꞌbꞌil yil ebꞌ snaani, palta man̈ ol yacꞌlaj ganar ebꞌ. 15 Ol javoc vin̈ sreyal norte chiꞌ, ol och oyan soldado dꞌa spatictac jun chon̈abꞌ te tecꞌan, ol acꞌjoc ganar jun chon̈abꞌ chiꞌ yuj ebꞌ. A ebꞌ soldado te jelan yic sur, man̈ ol yal-laj stecꞌbꞌan sbꞌa ebꞌ dꞌa yichan̈ vin̈ ajcꞌol chiꞌ. 16 A vin̈ ol acꞌan ganar chiꞌ, ol scꞌulejn̈ej vin̈ tas snibꞌej dꞌa jun vin̈ ol acꞌjoc ganar chiꞌ. Man̈xalaj mach ol yal stecꞌbꞌan sbꞌa dꞌa yichan̈ vin̈. Ol can vin̈ dꞌa sat lum luum te vachꞌ, aton Israel, ol satanel vin̈ jantacn̈ej tas sgana. 17 Ol yacꞌ yip vin̈ yedꞌ ebꞌ soldado yicꞌanecꞌ slum vin̈ sreyal sur chiꞌ. Ol yacꞌan jun strato vin̈ yedꞌ vin̈ rey chiꞌ, ol yacꞌanbꞌat junoc yisil vin̈ yetbꞌeyumoc jun vin̈ rey chiꞌ, yic syacꞌan ganar vin̈ yalani, palta man̈ ol elcꞌochlaj icha tas sna vin̈ chiꞌ. 18 Ol lajvoc chiꞌ, ol yacꞌan oval vin̈ yedꞌ juntzan̈ chon̈abꞌ ay dꞌa stitac aꞌ mar. Tzijtum ebꞌ ol acꞌjoc ganar yuj vin̈, palta ay jun yajal soldado ol cachan vanaj vin̈, icha chiꞌ ol aj yel sqꞌuixvelal vin̈ sreyal norte chiꞌ. 19 Ol lajvoc chiꞌ, ol meltzaj vin̈ dꞌa smacbꞌen bꞌaj ay juntzan̈ schon̈abꞌ, te ay yip, palta ol acꞌjoc ganar, ol sateloc.

20 Chꞌocxo junxo vin̈ rey ol ochcan sqꞌuexuloc vin̈, a jun vin̈ chiꞌ, ol schecbꞌat junoc mach vin̈, bꞌat scꞌananel tumin syacꞌ ebꞌ dꞌa vin̈, yic sqꞌuecꞌoch vin̈ yedꞌ yopisio chiꞌ snaani. Palta jayeanto cꞌual yoch vin̈ dꞌa yopisio chiꞌ, ol miljoccham vin̈, man̈oc dꞌa scal oval ol cham vin̈.

21 Ol lajvoc chiꞌ, ay jun vin̈ te malaj yelcꞌoch ol och reyal sqꞌuexuloc vin̈. A jun vin̈ chiꞌ, man̈ smojoc yoch vin̈ dꞌa yopisio. Man̈ naanoc yuj ebꞌ anima ayic ol och vin̈ reyal chiꞌ yuj yacꞌan musansatil ebꞌ anima chiꞌ. 22 Masanil ebꞌ ajcꞌol yajoch dꞌa vin̈, ol satel ebꞌ yuj vin̈, ol satpaxel vin̈ sat sacerdote yic Dios. 23 Ol acꞌjocpax musansatil ebꞌ yuj vin̈, aton ebꞌ ol yacꞌlej sbꞌoan strato yedꞌ vin̈ dꞌa vachꞌilal. Vachꞌchom quenn̈ej anima ayoch yedꞌ vin̈, palta ol yacꞌn̈ej ganar vin̈. 24 Ayic man̈ naanoc yuj ebꞌ anima chiꞌ, ol och vin̈ dꞌa sat sluum ebꞌ, aton lum te vachꞌ. Ol scꞌulejn̈ej vin̈ tastac to maj scꞌulej ebꞌ smam yicham. Masanil tas ol yicꞌ vin̈ dꞌa oval chiꞌ, ol spojecꞌ vin̈ dꞌa scal ebꞌ ajun yedꞌoc. Ol snibꞌej vin̈ yacꞌ oval yedꞌ juntzan̈ chon̈abꞌ to tecꞌan, palta man̈ nivanoc tiempo ol yal yuj vin̈.

25 Ol yacꞌoch sjelanil vin̈ chiꞌ yipoc scꞌool, ol yacꞌan oval vin̈ yedꞌ vin̈ sreyal sur. Nivan sbꞌisul soldado ol och yedꞌ vin̈, palta a vin̈ sreyal sur chiꞌ yedꞌ val yip yedꞌ pax soldado te jelan ol yacꞌan oval yedꞌ vin̈. Palta man̈ ol yal-laj stecꞌbꞌan sbꞌa ebꞌ soldado chiꞌ, yujto ton̈ej ol acꞌjoc musansatil vin̈ sreyal sur chiꞌ. 26 A ebꞌ yetyajalil vin̈ sreyal sur chiꞌ avtabꞌil vael yuuj dꞌa smexa, ipan ebꞌ ol meltzajoch ajcꞌolal dꞌay. Ol lajvoquel ebꞌ soldado chiꞌ, tzijtum ebꞌ ol chamoc. 27 A tas nabꞌil yuj chavan̈ ebꞌ vin̈ rey chiꞌ, an̈ej yacꞌan chucal ebꞌ dꞌay junjun. Ol mol em cꞌojan ebꞌ vael dꞌa smexa. Ol yacꞌan es ebꞌ dꞌay junjun, palta malaj junoc ebꞌ ol elcꞌoch tas snibꞌej, yujto manto cꞌoch scꞌual albꞌilcan yuj Dios. 28 Axo vin̈ sreyal norte chiꞌ, ol meltzajxoc vin̈ dꞌa schon̈abꞌ yedꞌ masanil tas ol yicꞌ vin̈ dꞌa oval chiꞌ. Ol lajvoc chiꞌ, ol och vin̈ ajcꞌolal dꞌa ejmelal syacꞌ ebꞌ israel, aton jun strato Dios sbꞌonac yedꞌ ebꞌ, axo scꞌulan vin̈ masanil tas nabꞌil yuuj chiꞌ. Ol lajvoc chiꞌ, ol meltzaj vin̈ dꞌa smacbꞌen. 29 Ayic ol cꞌoch stiempoal nabꞌil yuj Dios, ol bꞌatxoc vin̈ yedꞌ ebꞌ soldado yacꞌ oval dꞌa sur. Palta a dꞌa junelxo chiꞌ, man̈xo ol yacꞌlaj ganar vin̈ icha dꞌa sbꞌabꞌelal. 30 Yujto a ebꞌ soldado dꞌa stojolal bꞌaj tzꞌem cꞌu, ol javoc ebꞌ dꞌa yol barco. A ebꞌ chiꞌ ol cachanoch vaan vin̈. Icha chiꞌ ol aj xiv vin̈ sreyal norte chiꞌ, axo smeltzaj vin̈ chiꞌ dꞌa spatic. Yuj chiꞌ, axo dꞌa yibꞌan̈ strato Dios yedꞌ ebꞌ israel ol smaqꞌuel yoval scꞌol vin̈. Ol schaan vin̈ yabꞌ tas ol yal ebꞌ actannaccan jun trato chiꞌ.

31 Axo ebꞌ soldado chiꞌ, ol yixtejbꞌat stemplo Dios ebꞌ yedꞌ cuartel junn̈ej yaj yedꞌoc. Ol syamoch vaan ebꞌ yacꞌchaj silabꞌ dꞌa junjun cꞌu. Axo tas yajbꞌilel yuj Dios, a ol yacꞌoch ebꞌ dꞌa yol templo chiꞌ yic syixtanel ebꞌ. 32 Ol smontej ebꞌ etisraelal jun vin̈ rey chiꞌ, aton ebꞌ toxo ix actancan strato Dios. Axo pax ebꞌ chon̈abꞌ xajanan sDiosal, ol stecꞌbꞌej sbꞌa ebꞌ dꞌa yichan̈ tas ol ujoc chiꞌ. 33 Ay ebꞌ jelan dꞌa scal ebꞌ etchon̈abꞌ ol cꞌaybꞌan tzijtumoc ebꞌ etchon̈abꞌ chiꞌ, palta ay ebꞌ ol miljocchamoc, ay ebꞌ ol n̈usjoctzꞌaoc, ay ebꞌ ol elcꞌajbꞌat tastac ay dꞌay, ay pax ebꞌ ol icꞌjocbꞌat checabꞌil. 34 Ayic ol cꞌoch stiempoal spechchaj bꞌeyecꞌ ebꞌ, malaj val mach ol colvaj dꞌa ebꞌ. Tzijtum mach junn̈ej ol yutej sbꞌa yedꞌ ebꞌ, palta chabꞌsat juntzan̈ ebꞌ chiꞌ. 35 Ol miljoccham jayvan̈oc ebꞌ cꞌaybꞌum jelan dꞌa scal a chon̈abꞌ chiꞌ, yic vachꞌ ol acꞌchaj proval juntzan̈xo ebꞌ olto canoc, yic vachꞌ tzꞌicꞌchajel ebꞌ chabꞌsat chiꞌ dꞌa scal ebꞌ, axo stojolbꞌi spensar ebꞌ chiꞌ, masanto ol cꞌoch slajvubꞌ tiempoal nabꞌil yuj Dios.

36 A vin̈ sreyal norte chiꞌ, ol scꞌulej vin̈ icha tas snibꞌej, ichaton chiꞌ ol aj yicꞌanchaan̈ sbꞌa vin̈, ol yalan vin̈ to nivan yelcꞌoch vin̈ dꞌa yichan̈ comon dios. Ol yal bꞌuchval lolonel vin̈ dꞌa Dios te yel. Ol scꞌulejn̈ej masanil tas ol snibꞌej vin̈ masanto ol javoc yoval scꞌol Dios dꞌa yibꞌan̈ vin̈, yujto a tas nabꞌil yuj Dios chiꞌ, ol elcꞌochoc. 37 A jun vin̈ rey chiꞌ, malaj yelcꞌoch sdiosal ebꞌ smam yicham vin̈ dꞌay. Malaj pax yelcꞌoch tas nibꞌabꞌil yuj ebꞌ ix ix dꞌa yol sat vin̈ yedꞌ pax comon dios, yujto a jun vin̈ chiꞌ, ol yal vin̈ to ecꞌbꞌal nivan yelcꞌoch vin̈ dꞌa yichan̈ masanil juntzan̈ chiꞌ. 38 Palta chꞌoc jun dios bꞌaj ol och vin̈ ejmelal, aton dꞌa jun dios bꞌaj man̈ yacꞌnacoquem sbꞌa ebꞌ smam yicham vin̈, aton jun dios stan̈van chon̈abꞌ to tecꞌan. Ol yacꞌan silabꞌ vin̈ dꞌay, aton qꞌuen oro, qꞌuen plata, qꞌuen qꞌueen te vachꞌ yilji yedꞌ juntzan̈xo tastac to te caro stojol. 39 A yuj scolval jun chꞌoc diosal chiꞌ, ol yacꞌ ganar juntzan̈ chon̈abꞌ te ay yip vin̈. A ebꞌ ol yacꞌoch sbꞌa dꞌa yol scꞌabꞌ jun vin̈ rey chiꞌ, ol acꞌjococh ebꞌ dꞌa juntzan̈ nivac opisio yuj vin̈, ol acꞌchaj lum luum stojoloc ebꞌ.

40 Ayic ol cꞌoch slajvubꞌ tiempoal chiꞌ, a vin̈ sreyal sur, ol yacꞌ oval vin̈ yedꞌ jun vin̈ sreyal norte chiꞌ. Palta ol elta vin̈ sreyal norte chiꞌ yacꞌ oval yedꞌ vin̈ yedꞌ val smasanil yipal. Ol elta vin̈ yedꞌ scarruaje yic oval yedꞌ ebꞌ soldado ayqꞌue dꞌa yibꞌan̈ chej. Tzijtum pax barco ol cot yedꞌ vin̈. Tzijtum nación ol yacꞌ ganar vin̈, yujto icha sbꞌey aꞌ elumaꞌ sbꞌey ebꞌ soldado vin̈. 41 Ol ochpax vin̈ dꞌa lum luum te vachꞌ. Tzijtum nación ol yacꞌ ganar vin̈. Axo pax ebꞌ cajan dꞌa Edom yedꞌ dꞌa Moab ol colchajcanel ebꞌ, ecꞌbꞌalto pax nan̈al ebꞌ aj Amón ol colchajoc. 42 Ol yicꞌpaxecꞌ juntzan̈xo nación vin̈, man̈xo ol techajpax scolan sbꞌa Egipto dꞌa vin̈. 43 Ol icꞌchajbꞌat masanil sbꞌeyumal Egipto chiꞌ, icha qꞌuen oro, qꞌuen plata yedꞌ juntzan̈xo tas vachꞌ. Ol canpax ebꞌ aj Libia yedꞌ ebꞌ aj Etiopía dꞌa yol scꞌabꞌ vin̈. 44 Palta ol javoc yabꞌixal ebꞌ cajan dꞌa stojolal bꞌaj sjavi cꞌu yedꞌ dꞌa norte dꞌa vin̈, ol och vin̈ dꞌa xivcꞌolal yuuj. Yuj chiꞌ ol elta vin̈ yedꞌ yoval scꞌool, te nivan anima ol snaꞌ vin̈ smilchamoc. 45 Ol sbꞌoanqꞌue scampamento vin̈ dꞌa scal aꞌ mar yedꞌ jun tzalan bꞌaj ay stemplo Dios, aton taꞌ ol cꞌoch stiempoal satel vin̈, man̈xa junoc mach ol colan vin̈.