2 A dꞌa juntzan̈ cꞌual chiꞌ, oxeꞌ semana ix in och dꞌa cuscꞌolal. 3 Malaj vael vachꞌ ix in vaꞌa, maj in nibꞌej jabꞌoc chibꞌej, maj vucꞌ pax vino, malaj val jabꞌoc perfume ix vacꞌoch dꞌayin, masanto ix ecꞌ oxeꞌ semana chiꞌ. 4 Ayic 24 yoch bꞌabꞌel uj dꞌa yic abꞌil chiꞌ, ayinecꞌ dꞌa stiꞌ aꞌ nivan Tigris. 5 Ix in bꞌat qꞌuelan, ix vilan jun vin̈ vinac ayoch spichul nabꞌa lino yedꞌ jun stzecꞌul nabꞌa oro te vachꞌ. 6 Toxon̈ej scopopi snivanil icha qꞌuen topacio, toxon̈ej copopi yilji sat icha lebꞌlon. A yol sat, sqꞌue n̈iln̈on yoc icha teꞌ cꞌacꞌ. A scꞌabꞌ yedꞌ yoc, copopi yilji icha qꞌuen bronce vachꞌ yaj sn̈icchaji, axo sjaj, ichaval yoch sjaj junoc nivan n̈ilan̈ anima.

7 A inn̈ej ix yal vilan jun chiꞌ, axo masanil ebꞌ anima ayecꞌ vedꞌoc, maj yil-laj ebꞌ, yujto ix javi xivelal dꞌa ebꞌ, ix bꞌat ebꞌ scꞌubꞌejel sbꞌa. 8 A inxon̈ej ayinecꞌ in chꞌocoj ayic ix vilan jun chiꞌ, ix tup in chiqꞌuil, man̈xa vip ix vabꞌi. 9 Ayic ix vabꞌan slolonqꞌue jun chiꞌ, ix te pax vip, ix satel in cꞌool, ix in em n̈ojnaj dꞌa sat luum. 10 Axo ix aji, ix och yubꞌyubꞌ jun cꞌabꞌ dꞌayin, ix in squetzanqꞌue vaan, masanto ix yal in qꞌue cuman yedꞌ sjolom in penec yedꞌ in cꞌabꞌ. 11 Ix yalan dꞌayin icha tic: Daniel, ach xajanabꞌil yuj Dios, schamval abꞌan tas ol valaꞌ. Qꞌuean̈ vaan, yujto in checjicot dꞌayach, xchi.

A val yic ix lajvi yalan juntzan̈ lolonel chiꞌ, toxon̈ej tzin lucloni, ix in qꞌue lin̈an. 12 Ichato chiꞌ ix yalan dꞌayin: Daniel, man̈ ach xivoc. Yictax ix a chaanel yich och ejmelal, yic tza cꞌanan a jelanil, yic snachajel tas ajaltac uuj, a Dios ix abꞌan a lesal. Yuj chiꞌ in checjicot dꞌayach. 13 A jun ángel yajal yaj dꞌa yol yic Persia, aꞌ ix in yamanoch vaan dꞌa 21 cꞌual. Axo pax Miguel, aton jun sat ángel yaji, aꞌ ix javi yic scolvaj vedꞌoc, ix can yacꞌ oval yedꞌ jun yajalil Persia chiꞌ. 14 Yuj chiꞌ a ticnaic, tzul vacꞌ nachajel uuj tas ol ecꞌ dꞌa yibꞌan̈ a chon̈abꞌ tic dꞌa slajvubꞌ tiempoal. A jun ol chꞌoxchaj ilaꞌ, a yuj tas ol ujoc dꞌa slajvubꞌ tiempoal syalaꞌ, xchi. 15 Ayic van yalan juntzan̈ lolonel chiꞌ dꞌayin, majxo yal-laj in loloni, toxon̈ej ix in em qꞌuelan dꞌa sat luum. 16 Axo ix aji, ay jun lajan yilji icha anima, elan̈chamel ix syam in tiꞌ. Axo ix valan dꞌa jun lin̈anoch dꞌa vichan̈ chiꞌ: Mamin, a yuj jun tas ix vil tic, ix och val pitzꞌan dꞌa in cꞌool, man̈xalaj vip svabꞌi. 17 Mamin, ¿tas val ol aj in lolon edꞌoc a in a checabꞌ in tic, yujto man̈xalaj vip, maxtzac yal-laj vicꞌan vicꞌ svabꞌi? xin chi.

18 Axo jun lajan yilji icha anima chiꞌ, ix ochxi yamyam dꞌayin, ix vicꞌanxi vip. 19 Ix yalan dꞌayin icha tic: Man̈ ach xivoc, man̈ acꞌ pensar. Te xajan ach yuj Dios. An̈ej to tza tecꞌbꞌej a bꞌa, xchi.

Yacbꞌan vanto slolon chiꞌ dꞌayin, ix vicꞌan val vip ix vabꞌi, ix valani: Mamin, lolonan̈ dꞌayin, yujto ix ochxi vip junelxo uuj, xin chi dꞌay. 20-21 Ix yalan dꞌayin: ¿Ojtac ama tas yuj tzin javi dꞌayach? Ol val dꞌayach tas tzꞌibꞌabꞌilem dꞌa yol chꞌan̈ libro to yel. A ticnaic ol vacꞌpax oval yedꞌ jun ángel yajal yaj dꞌa Persia. Ayic ol lajvoc vacꞌan oval chiꞌ yedꞌoc, ol ja jun ángel yajal yaj dꞌa Grecia. A dꞌa jun oval chiꞌ, an̈ej val Miguel scolvaj vedꞌoc, aton jun ángel yajal yaj dꞌa a chon̈abꞌ Israel.