Mamin, Vajal ach, te nivan elcꞌochi, te satubꞌtac yilji a poder. Tzaqꞌuelcꞌoch a trato yic tzacꞌan a vachꞌcꞌolal dꞌa ebꞌ tzach xajanani, aton ebꞌ scꞌanabꞌajan a checnabꞌil. 5 Ix och co chucal yedꞌ co pital dꞌayach. Axon̈ej chucal ix co cꞌulej. Ix co patiquejcanel a checnabꞌil yedꞌ a cꞌaybꞌubꞌal. 6 Maj co maclej cabꞌ tas ix yal ebꞌ a checabꞌ. Yalnac a lolonel ebꞌ dꞌa ebꞌ co reyal, dꞌa ebꞌ yajal yaj dꞌa co cal, dꞌa ebꞌ co mam quicham yedꞌ dꞌa masanil ebꞌ quetchon̈abꞌ. 7 Ach Mamin Cajal, te tojol a pensar, xal on̈ israel on̈ tic, qꞌuixvelaltac cajecꞌ scabꞌi. A ebꞌ cotnac dꞌa Judá yedꞌ dꞌa Jerusalén yedꞌ juntzan̈xo ebꞌ quetisraelal cajan dꞌa najat yedꞌ dꞌa lacꞌan, ix on̈ a saclemejcanbꞌati, yujto man̈ cꞌanabꞌajumoc ix cutej co bꞌa dꞌayach. 8 A on̈ tic Mamin Jehová, qꞌuixavtac co cꞌool dꞌa ichan̈, yujto ix och co mul dꞌayach yedꞌ pax ebꞌ co reyal, ebꞌ yajal yaj dꞌa co cal yedꞌ pax ebꞌ co mam quicham. 9 Palta a ach tic Mamin, co Diosal ach, te ay oqꞌuelcꞌolal yedꞌ a nivancꞌolal, vachꞌchom a on̈ tic axon̈ej pitalil sco cꞌulej dꞌa ichan̈. 10 Mamin Jehová co Diosal, maj ach co cꞌanabꞌajej icha ix aj a checan yal ebꞌ a checabꞌ dꞌayon̈. 11 A on̈ tic, co masanil ix co tenecꞌ a checnabꞌil, ix ach co patiquejeli, man̈xalaj co gana ix cabꞌ tas ix alaꞌ. Yuj co mul chiꞌ, ix javi masanil juntzan̈ yaelal dꞌa quibꞌan̈, aton tas tzꞌibꞌabꞌilcan dꞌa yol chꞌan̈ libro stzꞌibꞌejnaccan vin̈ a checabꞌ aj Moisés. 12 Toxo ix elcꞌoch tas ix alaꞌ to ol javoc dꞌa quibꞌan̈ a on̈ tic yedꞌ dꞌa ebꞌ cajalil. Te nivan ix aj acꞌan syaelal Jerusalén dꞌa yichan̈ juntzan̈xo chon̈abꞌ. 13 Masanil juntzan̈ yaelal tzꞌibꞌ yajcan dꞌa chꞌan̈ libro yuj vin̈aj Moisés, ix javi dꞌa quibꞌan̈ ticnaic. Palta an̈ej dꞌa spatic chucal ix on̈ bꞌatcani, majxo co cꞌanabꞌajej a lolonel yic tzacꞌ a vachꞌcꞌolal dꞌayon̈. 14 Yuj val chiꞌ Mamin Jehová co Diosal, ix a naꞌ acꞌcot jun nivan yaelal tic dꞌa quibꞌan̈. A ach tic, tojol ach dꞌa masanil tas tza cꞌulej, a on̈xo tic, maj co bꞌalaj chaej cabꞌ dꞌayach.

15 Ach co Diosal Cajal ach, a chꞌoxnac val a nivan poder ayic icꞌannaquelta ebꞌ co mam quicham dꞌa Egipto. Yuj chiꞌ te bꞌinajnac ach masanto ticnaic, palta a on̈ tic jun, ix och co mul, an̈ej chucal sco cꞌulej. 16 Mamin Cajal, cojtac to tza cꞌulejn̈ej tas tzalaꞌ. Yuj chiꞌ eloc val dꞌa a cꞌol icꞌanel yaelal yedꞌ yoval a cꞌol ayoch dꞌa yibꞌan̈ chon̈abꞌ Jerusalén, yujto a chon̈abꞌ yaji, icpax yaj tzalan Sion. Masanil nación ay dꞌa slacꞌanil sbꞌuchvaj ebꞌ dꞌa a chon̈abꞌ chiꞌ, yujn̈ej co chucal yedꞌ yuj schucal ebꞌ co mam quicham. 17 Ach co Diosal, abꞌ val in lesal yedꞌ bꞌaj tzin tevi a in a checabꞌ in tic. Yuj val a bꞌinaji, chꞌox a vachꞌcꞌolal dꞌa yibꞌan̈ a templo tzꞌinan yajcani. 18 Cha abꞌ Mamin, ilnabꞌ val tas yaji, tzꞌinan yajcan jun a chon̈abꞌ sbꞌinaj to ic yaji. Man̈ yujoc co vachꞌil dꞌa yol quicoꞌ tzon̈ tevi dꞌayach, palta a val yuj a nivan vachꞌcꞌolal. 19 Mamin Cajalil, tacꞌvej on̈, acꞌ lajvoc co chucal. Cotan̈, colvajan̈ quedꞌoc. Yuj val a bꞌinajnaquil, mocabꞌ ecꞌ tiempo on̈ a colani, yujto ojtacabꞌil to ic on̈ yedꞌ a chon̈abꞌ Jerusalén, xin chi dꞌa in lesal chiꞌ.

20 Yacbꞌan vann̈ej in lesalvi, van valanqꞌueta in mul yedꞌ smul ebꞌ vetchon̈abꞌ israel, tzin tevioch dꞌa Jehová in Diosal yuj tzalan Sion yicn̈ej yaji. 21 Yacbꞌan van in lesalvi chiꞌ, axo ángel Gabriel, jun schꞌoxnac sbꞌa dꞌayin dꞌa yalan̈taxo, ix javi jen̈en̈oc bꞌaj ayinecꞌ chiꞌ, ichaval yorail yic tzꞌacꞌji silabꞌ dꞌa Jehová dꞌa yemcꞌualil. 22 Ix yalan dꞌayin icha tic:

Daniel, tzin javi dꞌayach yic tzul vacꞌan a jelanil yic snachajel uuj tas ol javoc dꞌa yibꞌan̈ ebꞌ etchon̈abꞌ. 23 Ayic ix a yamanoch a lesalvi, a Dios ix pacan a lesal chiꞌ, yuj chiꞌ tzin javi ul val dꞌayach, yujto te xajan ach yuj Dios. A ticnaic, maclej abꞌ tas ol val dꞌayach yic ol nachajel uuj tas ol acꞌjoc il tic.