Jun nocꞌ chꞌac calnel yedꞌ jun nocꞌ mam chiva
8
A dꞌa yoxil abꞌil yoch vin̈aj Belsasar reyal, ay juntzan̈xo tas ix acꞌji vilaꞌ, ayic toxo ix acꞌji vil juntzan̈ dꞌa sbꞌabꞌelal. 2 A ix aj vilani, ichato ayinecꞌ dꞌa chon̈abꞌ Susa, dꞌa yol yic Elam, dꞌa stiꞌ aꞌ Ulai. 3 Axo ix vilani, ay jun nocꞌ chꞌac calnel ayecꞌ dꞌa stiꞌ aꞌ chiꞌ. Ay chabꞌ schꞌaac nocꞌ nivac steel, palta ay jun schꞌac nocꞌ chiꞌ tzacꞌanto ix qꞌueuli, te nivan steel dꞌa yichan̈ junxo chiꞌ. 4 Axo ix vilani, a yedꞌ schꞌac jun nocꞌ calnel chiꞌ, ix yacꞌ lajvoc tastac ay dꞌa stojolal bꞌaj tzꞌem cꞌu yedꞌ dꞌa norte yedꞌ pax dꞌa sur. Malaj junocxo nocꞌ syal stecꞌbꞌan sbꞌa dꞌa yichan̈, malaj mach syal scolanelta sbꞌa dꞌa yol scꞌabꞌ. Scꞌulejn̈ej tas snibꞌej. Ix yicꞌ val chaan̈ sbꞌa.5 Vanto in naan yuj tas ix vil chiꞌ, axo ix vilani, ay jun nocꞌ mam chiva van sjavi dꞌa stojolal bꞌaj tzꞌem cꞌu. Yelcꞌolal scot nocꞌ, icha val to max em jabꞌoc yoc nocꞌ dꞌa sat luum. A jun nocꞌ chiva chiꞌ, ay val jun schꞌaac nocꞌ te chequel. A dꞌa scal yol sat nocꞌ ayqꞌueta. 6 Ayic ix cꞌoch nocꞌ dꞌa slacꞌanil nocꞌ calnel chabꞌ schꞌaac chiꞌ, nocꞌ ix vil dꞌa stiꞌ a aꞌ, ix bꞌat jucnaj nocꞌ dꞌa nocꞌ yedꞌ jantac yoval scꞌool. 7 Ix smacꞌan can̈chaj schꞌaac nocꞌ calnel chiꞌ nocꞌ schabꞌil. Man̈xalaj yip nocꞌ calnel chiꞌ yic stecꞌbꞌej sbꞌa dꞌa yichan̈ nocꞌ chiva chiꞌ. Ix lajvi chiꞌ, ix telvi nocꞌ yuj nocꞌ chiva chiꞌ dꞌa sat luum, ix tecꞌjiem etzan nocꞌ yuj nocꞌ. Malaj mach ix yal scolan nocꞌ.
8 Axo nocꞌ mam chiva chiꞌ, ix ste vachꞌ iqꞌuejchaan̈ sbꞌa nocꞌ. Axo ix aji, ayic te tecꞌan nocꞌ chiꞌ, ix can̈chajbꞌat jun schꞌaac nocꞌ te nivan chiꞌ, axo chan̈exo schꞌaac nocꞌ ix qꞌueul sqꞌuexuloc jun chiꞌ. Ayic ix qꞌueul schꞌaac nocꞌ chiꞌ, ix bꞌatcan qꞌuelan junjun chꞌaac chiꞌ dꞌa stojolal schan̈il pacꞌan̈ yolyibꞌan̈qꞌuinal tic. 9 A dꞌa junoc juntzan̈ chꞌaac chiꞌ, ix paqꞌuelta junxo yuneꞌ chꞌaac. A jun chiꞌ, te nivan ix aji yedꞌ yipalil ix smac juntzan̈ lugar dꞌa sur yedꞌ dꞌa stojolal bꞌaj sjavi cꞌu. Ix smacpax lum luum te nibꞌabꞌil. 10 Yelxo te chaan̈ ix aj sqꞌuibꞌi, masanto ix qꞌuecꞌoch bꞌaj ay qꞌuen cꞌanal. Ix syumanemta jayeoc qꞌuen cꞌanal chiꞌ, ix stecꞌanem qꞌuen dꞌa sat luum. 11 Ix stecꞌbꞌan sbꞌa dꞌa yichan̈ vin̈ yajalil ebꞌ ay dꞌa satchaan̈ chiꞌ. Ix scachanoch vaan yacꞌchaj silabꞌ tzꞌacꞌji dꞌa Dios dꞌa junjun cꞌu. Ix yixtanbꞌat bꞌaj tzꞌochtaxon ejmelal dꞌa Dios chiꞌ. 12 A yuj schuc pensaril jun yajal chiꞌ, ix yacꞌoch soldado bꞌaj tzꞌacꞌjitaxon silabꞌ dꞌa junjun cꞌu yedꞌ scachjioch vaan yacꞌji silabꞌ chiꞌ. Ix satanel jun ejmelal vachꞌ albꞌilcan yuj Dios. Ichato chiꞌ bꞌian ix scꞌulan tas snibꞌej.
13 Ix lajvi chiꞌ, ix vabꞌani to ay jun ángel scꞌanbꞌan dꞌa junxo ángel icha tic: ¿Jantacto tiempo yic ol lajvoc juntzan̈ squil tic? ¿Jantacto tiempo ol yacꞌ jun yajbꞌil yuj Dios tic sqꞌuexan silabꞌ tzꞌacꞌjitaxon dꞌa junjun cꞌu? ¿Bꞌaqꞌuin̈ ol och vaan stecꞌjiem ebꞌ soldado yic satchaan̈ yedꞌ jun Lugar Yicn̈ej Dios Yaji? xchi. 14 Ix tacꞌvi junxo ángel chiꞌ icha tic: Ato yic ol lajvoquecꞌ 2,300 el man̈ ol acꞌchaj silabꞌ dꞌa yemcꞌualil yedꞌ dꞌa qꞌuin̈ibꞌalil. Ato taꞌ ol lajvoc juntzan̈ chiꞌ. Ichato chiꞌ, ol icꞌjoquel jun tas man̈ vachꞌoc ayoch dꞌa Lugar Yicn̈ej Dios Yaji, xchi jun ángel chiꞌ.
15 A in Daniel in tic, vanto in naan tas ix vil chiꞌ, yic snachajel vuuj tas syalelcꞌochi. Axo ix vilani, ay jun icha yilji anima ix schꞌoxqꞌue sbꞌa dꞌa vichan̈. 16 Ix vabꞌan yoch jun av scot dꞌa stiꞌ aꞌ Ulai, icha val sjaj anima, ix yalan icha tic: Gabriel, vachꞌ alej dꞌa jun vin̈ vinac tic yic snachajel yuj vin̈ tas ix yil chiꞌ, xchi.
17 Axo ix javi ángel Gabriel chiꞌ dꞌa in tzꞌey. Ix in em cumnajoc, ix emcꞌoch snan̈al in sat dꞌa sat luum yuj xivelal. Ix yalan dꞌayin: Ach anima, ojtaquejeli to a tas ix il chiꞌ, ato dꞌa slajvubꞌ tiempoal ol ujoc, xchi.
18 Ayic vanto slolon chiꞌ dꞌayin, ix in ecꞌ lian dꞌa sat luum. Ix satel in cꞌool, yuj chiꞌ ix och yubꞌnaj dꞌayin, ix in squetzanqꞌue lin̈an. 19 Ix yalan dꞌayin:
Ol val dꞌayach tas ol ujoc ayic toxo ol lajvoc yoval scꞌol Dios. A jun tas ix il chiꞌ, a lajvubꞌ cꞌual schꞌoxcoti.
20 A nocꞌ calnel chabꞌ schꞌac ix il chiꞌ, aton ebꞌ vin̈ sreyal Media yedꞌ Persia schꞌox nocꞌ. 21 Axo pax nocꞌ mam chiva ix il chiꞌ, aton vin̈ sreyal Grecia schꞌox nocꞌ. A jun schꞌaac nocꞌ nivaquil ayqꞌueta dꞌa scal yol sat, a jun vin̈ bꞌabꞌel rey schꞌoxoꞌ. 22 A chan̈eꞌ chꞌaac ix qꞌueul sqꞌuexuloc jun ix can̈chajbꞌat chiꞌ, syalelcꞌochi to ol spoj snan̈al jun nación chiꞌ. Chan̈eꞌ nacional ol ajelcꞌochoc, palta man̈ lajanoc yip yedꞌ jun bꞌabꞌel.
23 Ayic toxo ol lajvoquecꞌ yopisio juntzan̈ nación chiꞌ, ayic ol tzꞌacvoc chucalil dꞌa yichan̈ Dios, ay jun rey ol acꞌan yajalil, malaj tzꞌoch tas dꞌay, te jelan yacꞌan musansatil.
24 Ol yicꞌ val yip sicꞌlabꞌil, palta man̈oc yedꞌ yip dꞌa yol yicoꞌ. Satubꞌtac ol yutej satanel tastac. Vachꞌ ol elcꞌoch dꞌa tas ol scꞌulej. Ol acꞌjoc ganar ebꞌ soldado te ay yip yuuj yedꞌ ebꞌ yicxo Dios.
25 Yuj sjelanil, ol yal yixtan ebꞌ anima, ol ste iqꞌuejchaan̈ sbꞌa. Tzijtum anima ol sateli ayic malaj jabꞌoc tas sna ebꞌ. Ol stecꞌbꞌej sbꞌa dꞌa yichan̈ Dios, Jun Yajalil ebꞌ yajal. Vachꞌchom icha chiꞌ ol yutoc sbꞌa, palta ol satjoqueloc, man̈ yujoc spoder anima.
26 A tas ix il dꞌa silabꞌ tzꞌacꞌji dꞌa yemcꞌualil yedꞌ dꞌa qꞌuin̈ibꞌalil, tic val ix vachꞌ alchajel dꞌayach. A jun chiꞌ yovalil ol elcꞌochoc. Canocabꞌn̈ej dꞌa a pensar, malajocabꞌ bꞌaj tzalaꞌ, yujto a juntzan̈ chiꞌ, ol elcꞌochoc ayic te nivanxo tiempo ol ecꞌoc, xchi ángel Gabriel chiꞌ.
27 A inxo Daniel in tic, ix te el vip ix vabꞌi. Ix in penaayax jayeꞌ cꞌual. Ix lajvi chiꞌ, ix in qꞌue vaan, ix bꞌat vilanxi vopisio ayoch yuj vin̈ rey. Palta te ilcꞌolal vaj yuj jun ix chꞌoxchaj vil chiꞌ, yujto max nachajel vuj tas val syalelcꞌochi.