Tas ix yil vin̈aj Daniel dꞌa svayich
7
A dꞌa yic bꞌabꞌel abꞌil yoch vin̈aj Belsasar reyal dꞌa Babilonia, ay jun acꞌval, ay juntzan̈ tas ix acꞌji vil a in Daniel tic dꞌa in vayich. Axo ix in qꞌue vaan, ix in tzꞌibꞌan tastac nivan yelcꞌoch dꞌa in vayich chiꞌ. Aton juntzan̈ tic ix in tzꞌibꞌejcani:2 Ix vil dꞌa in vayich to a dꞌa schan̈ pacꞌan̈il yolyibꞌan̈qꞌuinal, ix cot pon̈naj icꞌ dꞌa yibꞌan̈ a aꞌ, ix ibꞌxiqꞌue aꞌ nivan mar chiꞌ yuuj. 3 Axo ix aji, ix checlajqꞌue chan̈van̈ nocꞌ nivac nocꞌ dꞌa yol aꞌ mar chiꞌ, chꞌocchꞌoc yilji junjun nocꞌ. 4 A jun nocꞌ ix bꞌabꞌlaj qꞌueuli, lajan yilji nocꞌ icha nocꞌ choj, palta ay scꞌaxil nocꞌ icha yic nocꞌ dꞌiv. Ayic van vilan nocꞌ chiꞌ, ix jecchitajel scꞌaxil nocꞌ chiꞌ. Ix acꞌchajqꞌue lin̈an dꞌa sat luum, icha tzꞌajqꞌue lin̈an anima ix ajqꞌuei. Ix qꞌuexvi spensar, icha spensar anima ix aji.
5 Axo nocꞌ schabꞌil, lajan yilji nocꞌ icha nocꞌ oso, tzꞌeyanqꞌue jun pacꞌan̈ snivanil nocꞌ dꞌa yichan̈ junxo pacꞌan̈. A dꞌa yol stiꞌ nocꞌ, ay oxeꞌ bꞌaquil costil. Ix vabꞌan yalchaj dꞌa nocꞌ: Ixic, tza chiꞌan jantac chibꞌej snibꞌej a cꞌool, xchi dꞌa nocꞌ.
6 Axo nocꞌ yoxil, lajan yilji nocꞌ icha nocꞌ tzꞌibꞌchoj. Ay chan̈eꞌ scꞌaxil nocꞌ dꞌa snan̈al yich spatic. Ix vilanpaxi to ay chan̈eꞌ sjolom nocꞌ, ix acꞌchaj spoder nocꞌ yacꞌan yajalil.
7 Axo nocꞌ schan̈il ix vil dꞌa in vayich chiꞌ, te chuclaj yilji nocꞌ. Te ay smay quilan nocꞌ, te ay yip nocꞌ. Te nivac qꞌuen ye nocꞌ, nabꞌa hierro. Chocꞌ tzꞌaj masanil tas yuj nocꞌ, sbꞌucꞌanem nocꞌ, axo jantacto scan yuj nocꞌ, stecꞌcanem nocꞌ. Yelxo te chꞌoc yilji jun nocꞌ chiꞌ dꞌa yichan̈ juntzan̈xo nocꞌ ix vil dꞌa sbꞌabꞌelal. Ay lajun̈eꞌ schꞌaac nocꞌ.
8 Yacbꞌan qꞌuelan in och dꞌa juntzan̈ schꞌaac nocꞌ chiꞌ, ix vilani, ix qꞌueul junxo syuneꞌ chꞌaac nocꞌ dꞌa scal juntzan̈xo chiꞌ. Ayic ix qꞌueul junxo schꞌaac nocꞌ chiꞌ, ix stenancanel oxeꞌ chꞌaac aytaxon chiꞌ. Axon̈ej jun chiꞌ ix can sqꞌuexuloc juntzan̈ chiꞌ. A jun chꞌaac chiꞌ, ay yol sat yedꞌ stiꞌ icha yic anima, ix yicꞌchaan̈ sbꞌa yedꞌ tas ix yalaꞌ.
A sbꞌeycꞌolal Dios
9 Ix vilann̈ej, masanto ix acꞌchajem juntzan̈ cꞌojnubꞌ yic ebꞌ yajal, axo Dios, Jun Aytaxoneqꞌui, ix em cꞌojan dꞌa scꞌojnubꞌ. Te sac yilji spichul icha yilji qꞌuen sacbꞌacom. Axo xil sjolom, te sac yilji icha nocꞌ sacsac lana. A scꞌojnubꞌ chiꞌ yedꞌ sruedail, ichato sqꞌue n̈iln̈on scꞌacꞌal.
10 Ay jun cꞌacꞌ tzꞌelta dꞌa yichan̈ icha sbꞌey a aꞌ. A ebꞌ tzꞌacꞌan servil, lin̈anoch ebꞌ dꞌa yichan̈, millonalxo sbꞌisul ebꞌ. Ix lajvi chiꞌ ix el yich schꞌolbꞌitaj juntzan̈ nación, ix jacvi juntzan̈ chꞌan̈ libro.
11 Qꞌuelan inn̈ejoch yuj juntzan̈ bꞌuchval lolonel van yalan jun yuneꞌ chꞌaac chiꞌ. Yacbꞌan van vilan chiꞌ, ix macꞌjicham jun nocꞌ chiꞌ. Chocꞌxon̈ej ix aj nocꞌ, ix yumjibꞌat nocꞌ dꞌa scal cꞌacꞌ, ix tzꞌabꞌat nocꞌ. 12 Axo juntzan̈xo nocꞌ chiꞌ, ix icꞌchajecꞌ yopisio nocꞌ, palta ixto chajiecꞌ nocꞌ jabꞌocxo.
13 Ix vilann̈ej dꞌa in vayich chiꞌ:
Ix vilani to ay jun mach ix cot dꞌa scal asun, lajan yilji icha anima. Ix cꞌoch bꞌaj ayecꞌ Dios Jun Aytaxonecꞌ chiꞌ, ix och dꞌa yichan̈.*
14 Ix acꞌchaj yopisio, spoder yedꞌ snivanil yelcꞌochi. Masanil anima, yaln̈ej tas tiꞌal tzꞌacꞌan servil. A spoder ayn̈ejecꞌ dꞌa juneln̈ej, malaj bꞌaqꞌuin̈ ol lajvoc yopisio chiꞌ.
15 Ix in xivcanqꞌuei ayic ix vilan juntzan̈ tic, ix somchaj in pensar yuuj. 16 Ix in och dꞌa stzꞌey junoc lin̈anoch taꞌ, ix in cꞌanbꞌan dꞌay tas syalelcꞌoch juntzan̈ chiꞌ. Ix tacꞌvi dꞌayin icha tic: 17 A chan̈van̈ nocꞌ nocꞌ ix il chiꞌ, aton chan̈eꞌ nación ol checlajqꞌue dꞌa yolyibꞌan̈qꞌuinal tic. 18 Ayic ol lajvoquecꞌ juntzan̈ nación chiꞌ, a ebꞌ yicxo Dios, Jun Te Nivan Yelcꞌochi, ol acꞌjoccanoch ebꞌ yajalil dꞌa juneln̈ej, man̈xalaj bꞌaqꞌuin̈ ol icꞌjoquecꞌ yopisio ebꞌ chiꞌ, xchi.
19 Ix in cꞌanbꞌejxi dꞌay, tas yaj nocꞌ schan̈il nocꞌ chiꞌ, te chꞌoc yilji nocꞌ dꞌa yichan̈ juntzan̈xo nocꞌ chiꞌ. Nabꞌa hierro qꞌuen ye nocꞌ, nabꞌa bronce yech nocꞌ. Masanil tas chocꞌ tzꞌaj yuj nocꞌ, sturanbꞌat nocꞌ, axo jantacto scani, stecꞌcanem nocꞌ. 20 An̈ejtonaꞌ, ix in cꞌanbꞌejpaxi tas syalelcꞌoch lajun̈eꞌ schꞌaac nocꞌ chiꞌ yedꞌ junxo schꞌaac nocꞌ tzacꞌanto ix qꞌueul chiꞌ, jun ix tenanel oxexo ayic ix qꞌueuli. Te nivan pax yelcꞌoch dꞌa yichan̈ juntzan̈xo chꞌaac chiꞌ. A jun toto ix qꞌueul chiꞌ, ay yol sat, ay pax stiꞌ, syalan bꞌuchval lolonel. 21 Ix vilani to a jun chꞌaac chiꞌ, syacꞌ oval yedꞌ ebꞌ yicxo Dios. Ix acꞌji ganar ebꞌ yuuj, 22 masanto ix cꞌoch Dios, Jun Aytaxoneqꞌui. Ix sbꞌoan yaj dꞌa ebꞌ, yujto ix cꞌoch scꞌual schaan yopisio ebꞌ. 23 Ix yalan dꞌayin icha tic:
A nocꞌ schan̈il chiꞌ, aton jun schan̈il nación ol checlajqꞌue dꞌa yolyibꞌan̈qꞌuinal tic. Chꞌoc yel dꞌa yichan̈ juntzan̈xo nación ol ecꞌoc. Ol smaquecꞌ masanil yolyibꞌan̈qꞌuinal tic, ol yacꞌan yajalil dꞌa malaj yoqꞌuelcꞌolal.
24 A lajun̈eꞌ schꞌaac chiꞌ, aton lajun̈van̈ ebꞌ vin̈ yajal. A ebꞌ vin̈ ol acꞌan yajalil dꞌa lajun̈ macan̈ yaj jun nación chiꞌ. A dꞌa scal juntzan̈ ebꞌ vin̈ chiꞌ, ol qꞌue vaan junxo rey te chꞌoc yel dꞌa yichan̈ juntzan̈xo ebꞌ vin̈ dꞌa sbꞌabꞌelal chiꞌ, ol icꞌjoquel oxvan̈oc ebꞌ vin̈ rey chiꞌ dꞌa yopisio yuuj.
25 Ol te bꞌuchvaj dꞌa Dios Te Nivan Yelcꞌochi, ol yixtejn̈ej ebꞌ yicxo Dios chiꞌ. Ol yacꞌlan sqꞌuexan juntzan̈ ley yedꞌ juntzan̈ qꞌuin̈ albꞌilcan yuj Dios. Ol acꞌchajcan ebꞌ yicxo Dios chiꞌ dꞌa yol scꞌabꞌ dꞌa nan̈al schan̈il abꞌil.
26 Palta ayic ol javoc scꞌual, ol chꞌolbꞌitajoc, ol icꞌchajel spoder chiꞌ, ol satel dꞌa juneln̈ej.
27 Axo yajalil yedꞌ spoder yedꞌ snivanil yelcꞌoch juntzan̈ nación dꞌa yolyibꞌan̈qꞌuinal tic, ol acꞌchaj dꞌa ebꞌ yicxo Dios chiꞌ, aton Jun Te Nivan Yelcꞌochi. A Dios ol acꞌan yajalil dꞌa juneln̈ej. Masanil ebꞌ ayoch yajalil dꞌa yolyibꞌan̈qꞌuinal tic ol acꞌan servil, ol scꞌanabꞌajan ebꞌ dꞌay, xchi dꞌayin.
28 Aton slajvubꞌal juntzan̈ tas ix alchajcan dꞌayin a in Daniel in tic. Ix te somchaj in cꞌool. Ix tup in chiqꞌuil yuj xivelal, palta malaj junoc mach bꞌaj ix val juntzan̈ lolonel tic.