Ix yumchajem vin̈aj Daniel dꞌa scal nocꞌ choj
6
Ix yacꞌanoch 120 ebꞌ vin̈ gobernador vin̈aj Darío chiꞌ, yic syil junjun macan̈ chon̈abꞌ ebꞌ vin̈ dꞌa yol smacbꞌen. 2 Ix yacꞌanoch oxvan̈xo sat yajal vin̈ dꞌa ebꞌ vin̈ gobernador chiꞌ, yic syilan ebꞌ vin̈ yedꞌ stan̈van masanil tastac, yic vachꞌ tzꞌacan tzꞌaj yacꞌchaj qꞌuen tumin syacꞌ ebꞌ vin̈ dꞌa vin̈ rey chiꞌ. Dꞌa scal ebꞌ vin̈ sat yaj chiꞌ ayoch vin̈aj Daniel chiꞌ. 3 Ix checlajel vin̈aj Daniel chiꞌ dꞌa scal ebꞌ vin̈ yetyajalil chiꞌ, yujto vachꞌn̈ej syutej sbꞌa vin̈. Yuj chiꞌ ix sna vin̈ rey chiꞌ to tzꞌoch vin̈ sat yajalil dꞌa yol smacbꞌen chiꞌ. 4 Axo juntzan̈ ebꞌ vin̈ yetyajalil vin̈ chiꞌ, ix say modo ebꞌ vin̈ tas tzꞌaj yemta vin̈ dꞌa yopisio chiꞌ. Palta te cꞌanabꞌajum vin̈, max elcꞌan vin̈ dꞌa tas scꞌulej, ayoch spensar vin̈ dꞌa yopisio chiꞌ. Yuj chiꞌ malaj junoc tas syal yalanqꞌue ebꞌ vin̈ dꞌa spatic vin̈. 5 Yuj chiꞌ ix ochn̈ej ijan ebꞌ vin̈ snaani, ix yalan ebꞌ vin̈: Malaj val junoc tas syal calanqꞌue dꞌa spatic vin̈, an̈ej yuj scꞌanabꞌajan sDiosal vin̈, xchi ebꞌ vin̈.6 Yuj chiꞌ ix slajtiej sbꞌa ebꞌ vin̈ yajal chiꞌ, yic bꞌat yalan ebꞌ vin̈ dꞌa vin̈aj Darío chiꞌ. Ayic ix cꞌoch ebꞌ vin̈ dꞌa yichan̈ vin̈, ix yalan ebꞌ vin̈ icha tic:
—Mamin rey Darío, ayocabꞌn̈ej opisio dꞌa juneln̈ej. 7 Ix co mol lajtiej co bꞌa co masanil a on̈ yajal on̈ tic dꞌa yol a macbꞌen tic. Ix co naani to tzaqꞌuelta junoc ley yic tzꞌalchajel dꞌa scal masanil anima dꞌa masanil yol a macbꞌen tic to malaj junoc mach scꞌanan scolval sdiosal, ma dꞌa junocxo yetanimail dꞌa junoc ujal, palta an̈ej dꞌayach syal sbꞌa mamin rey. A mach max cꞌanabꞌajan jun ley chiꞌ, tojoln̈ej syumjicanem bꞌaj macbꞌil nocꞌ choj. 8 Yuj chiꞌ, mamin rey, acꞌ tzꞌibꞌchaj jun ley chiꞌ, tzacꞌanoch a sello dꞌay yic vachꞌ malaj mach syal sqꞌuexani. Aꞌ co ley a on̈ medos yedꞌ persas on̈ tic, max yal-laj yecꞌbꞌati, xchi ebꞌ vin̈.
9 Yuj chiꞌ ix schec vin̈aj rey Darío chiꞌ tzꞌibꞌchaj jun ley chiꞌ, ix yacꞌanoch vin̈ dꞌa yopisio. 10 Axo ix yabꞌan vin̈aj Daniel to toxo ix alchajel jun ley chiꞌ, ix qꞌuen̈ej vin̈ dꞌa yol spat dꞌa chaan̈, ix sjacanxi sventena vin̈ qꞌuelanbꞌat dꞌa stojolal Jerusalén. Ix em cuman vin̈, ix lesalvi vin̈ dꞌa Dios, ix yacꞌan yuj diosal vin̈ dꞌay. Oxel slesalvi vin̈ dꞌa junjun cꞌu, ichataxon scꞌulej vin̈. 11 Axo juntzan̈ ebꞌ vin̈ chiꞌ, ix smolbꞌej sbꞌa ebꞌ vin̈, ix yilan ebꞌ vin̈ to van slesalvi vin̈ yedꞌ stevi vin̈ dꞌa Dios. 12 Yuj chiꞌ ix bꞌat ebꞌ vin̈ dꞌa vin̈ rey chiꞌ. Ix bꞌat yalan ebꞌ vin̈ yuj jun ley toxo ix alchajel chiꞌ, ix yalan ebꞌ vin̈ icha tic:
—Toton ix a chec alchajel jun ley tzꞌalan icha tic: Yaln̈ej mach syal sbꞌa dꞌa sdiosal, ma dꞌa junocxo chꞌoc animail dꞌa junoc ujal, tato man̈oc dꞌa vin̈ rey syal tas snibꞌej, yovalil syumchajem bꞌaj macbꞌil nocꞌ choj, xchi. ¿Man̈ am yeloc icha chiꞌ? xchi ebꞌ vin̈.
—Ichaton chiꞌ ix aji. A jun ley chiꞌ yovalil scꞌanabꞌajaji, a co leyal a on̈ medos yedꞌ persas on̈ tic, max yal-laj yecꞌbꞌat tas syalaꞌ, xchi vin̈ rey chiꞌ.
13 Yuj chiꞌ ix ochn̈ej ijan ebꞌ vin̈ yalan icha tic:
—A vin̈aj Daniel, vin̈ icꞌchajnaccot dꞌa Judá, max scꞌanabꞌajejlaj vin̈. Mamin rey, man̈ jabꞌoc xiv vin̈ dꞌayach, malaj pax jabꞌoc yelcꞌoch jun ley chiꞌ dꞌa vin̈. Toxo ix quilaꞌ to oxel slesalvi vin̈ dꞌa sDiosal dꞌa junjun cꞌu, xchi ebꞌ vin̈.
14 Ayic ix yabꞌan vin̈ rey chiꞌ icha chiꞌ, ix och vin̈ dꞌa cuscꞌolal. Masanil jun cꞌual chiꞌ, ix sayecꞌ vin̈ tas tzꞌaj scolchajel vin̈aj Daniel chiꞌ. 15 Axo yic vanxo sbꞌat cꞌu, ix smolbꞌanxi sbꞌa juntzan̈ ebꞌ vin̈ vinac chiꞌ dꞌa yichan̈ vin̈ rey chiꞌ, ix yalan ebꞌ vin̈:
—Mamin rey, ojtac val to a co ley a on̈ medos yedꞌ persas on̈ tic, ta ay junoc lolonel, ma junoc ley toxo ix yalel vin̈ rey, maxtzac yal-laj yecꞌbꞌati, xchi ebꞌ vin̈.
16 Ix lajvi chiꞌ, ix schecan vin̈ rey chiꞌ icꞌchajcot vin̈aj Daniel chiꞌ yic syumchajem vin̈ bꞌaj macbꞌil nocꞌ choj chiꞌ. Ayic manto yumchajem vin̈, ix yalan vin̈ rey chiꞌ dꞌa vin̈:
—Comonoc val ol ach coljoc yuj a Diosal to ayachn̈ejoch acꞌan servil, xchi vin̈.
17 Ayic toxo ix yumjicanem vin̈ dꞌa scal nocꞌ choj chiꞌ, ix acꞌjicanem jun qꞌuen qꞌueen smaculoc. Ix acꞌjicanoch sello yic yopisio vin̈ rey chiꞌ dꞌa qꞌueen yedꞌ sello ebꞌ vin̈ nivac yajal yaj yedꞌ vin̈, yic vachꞌ max tenjiecꞌ tas ix alchaj dꞌa spatic vin̈aj Daniel chiꞌ. 18 Ix lajvi chiꞌ, ix bꞌat vin̈ rey chiꞌ dꞌa spalacio, palta majxo valaj vin̈, majxo schec vin̈ icꞌchajcot ebꞌ tzꞌacꞌan tzalajbꞌoc scꞌool. Ix bꞌat vay vin̈, palta juneln̈ej maj ochlaj svayan̈ vin̈ dꞌa jun acꞌval chiꞌ. 19 Ix pet qꞌue vaan vin̈, ix bꞌat lemnaj vin̈ dꞌa stiꞌ bꞌaj macbꞌil nocꞌ choj chiꞌ. 20 Ayic ix cꞌoch vin̈ dꞌa slacꞌanil chiꞌ, ix avaj vin̈ dꞌa vin̈aj Daniel chiꞌ. Cuseltac ix yutej avaj sbꞌa vin̈, ix yalan vin̈:
—Daniel, ach schecabꞌ jun Dios pitzan, aton jun Dios tzacꞌn̈ej servil ¿ix am yal ach scolanel a Diosal dꞌa nocꞌ choj chiꞌ? xchi vin̈.
21 Ix tacꞌvi vin̈aj Daniel chiꞌ icha tic:
—Mamin rey, ayocabꞌ opisio dꞌa juneln̈ej. 22 Ix scheccot jun yángel in Diosal yic smacan stiꞌ nocꞌ choj tic. Yuj chiꞌ malaj val jabꞌoc tas ix in yutej nocꞌ, yujto yojtac to malaj jabꞌoc in mul dꞌa yichan̈. Malaj pax tas chuc ix in cꞌulej dꞌayach, xchi vin̈.
23 Yuj chiꞌ ix te tzalajqꞌue vin̈ rey chiꞌ, ix schecan vin̈ icꞌchajqꞌueta vin̈aj Daniel bꞌaj ay nocꞌ choj chiꞌ. Axo yic ix qꞌueul vin̈, ix yilan ebꞌ to malaj jabꞌoc bꞌaj ix lajvi vin̈, yujto a sDiosal vin̈ ayoch yipoc scꞌool. 24 Ix lajvi chiꞌ, ix yalan vin̈ rey chiꞌ to sbꞌat icꞌjicot ebꞌ vin̈ ix alanqꞌue jun lolonel dꞌa spatic vin̈aj Daniel chiꞌ. Ix yumjicanem ebꞌ vin̈ dꞌa scal nocꞌ choj chiꞌ yedꞌ yetbꞌeyum yedꞌ yalyuninal junjun ebꞌ vin̈. Manto emcꞌochlaj ebꞌ dꞌa scal nocꞌ, ix qꞌueta tzacaljoc nocꞌ dꞌa ebꞌ, chocꞌ ix aj ebꞌ yuj nocꞌ.
25 Ix lajvi chiꞌ, ix yacꞌan tzꞌibꞌchaj vin̈aj rey Darío jun tic dꞌa masanil anima yaln̈ej tas tiꞌal ay dꞌa yol smacbꞌen chiꞌ. Ix yalanbꞌat vin̈ icha tic: Juncꞌolalocabꞌ eyaji. 26 Svalan dꞌayex e masanil dꞌa yol in macbꞌen, nivanocabꞌ yelcꞌoch sDiosal vin̈aj Daniel dꞌa yol e sat.
Yujto a sDiosal vin̈ chiꞌ, pitzan toni, ayn̈ejecꞌ dꞌa juneln̈ej. A yopisio, malaj bꞌaqꞌuin̈ ol sateloc, malaj slajvubꞌ.
27 A Jun Colvajum chiꞌ, a scolan ebꞌ yic yedꞌ spoder. Schꞌoxan tas satubꞌtac dꞌa satchaan̈ yedꞌ dꞌa sat luum tic. A ix colanel vin̈aj Daniel dꞌa nocꞌ choj, xchibꞌat vin̈ rey chiꞌ.
28 Ayn̈ejoch vin̈aj Daniel chiꞌ dꞌa yopisio ayic ayoch vin̈aj Darío dꞌa reyal yedꞌ pax yic ayoch vin̈aj Ciro aj Persia reyal.