Juntzan̈ tas ix tzꞌibꞌchajoch dꞌa sat pat
5
A vin̈aj Belsasar sreyal Babilonia, ix yavtej mil ebꞌ nivac yopisio vin̈ dꞌa yol snación dꞌa jun nivan vael. A dꞌa jun vael chiꞌ, ix yucꞌ an̈ ebꞌ, ix yucꞌan an̈ vin̈ yedꞌ ebꞌ. 2-3 Vanxo sqꞌue an̈ dꞌa sjolom vin̈ rey chiꞌ, ix schecan vin̈ icꞌchajcot copa yedꞌ ucꞌabꞌ nabꞌa oro, aton juntzan̈ yicꞌnaccot vin̈aj Nabucodonosor smam icham vin̈ dꞌa templo dꞌa Jerusalén. A dꞌa yol juntzan̈ copa yedꞌ juntzan̈ ucꞌabꞌ ix bꞌat icꞌchajcot chiꞌ, ataꞌ ix yucꞌ an̈ vin̈ yedꞌ ebꞌ ix yetbꞌeyum yedꞌ juntzan̈xo ebꞌ ix schabꞌil yetbꞌeyum yedꞌ pax masanil ebꞌ ayoch yedꞌ vin̈ dꞌa vael chiꞌ. 4 Masanil ebꞌ ix cham yuj an̈, ix yicꞌanchaan̈ sdiosal ebꞌ nabꞌa oro, plata, bronce, hierro, te teꞌ yedꞌ qꞌuen qꞌueen.5 A dꞌa jun rato chiꞌ, ix checlaj jun cꞌabꞌ anima bꞌaj sacqꞌuinal yuj candil, ix och ijan stzꞌibꞌanoch dꞌa sat pat chiꞌ. Ayic ix yilan jun cꞌabꞌ stzꞌibꞌan chiꞌ vin̈ rey, 6 sac ix aj sat vin̈ yuj xivelal. Ix luclonqꞌue yoc vin̈, ix el val yip vin̈. 7 Elan̈chamel ix el yav vin̈, ix yavtancot ebꞌ naumel lolonel vin̈, ebꞌ schuman yedꞌ qꞌuen cꞌanal yedꞌ ebꞌ ajchum. Ix yalan vin̈ dꞌa ebꞌ:
—A mach syal yilan juntzan̈ tzꞌibꞌabꞌiloch chiꞌ, syalan dꞌayin tas syalelcꞌochi, tzꞌacꞌchajoch junoc pichul púrpura dꞌay, tzꞌacꞌchajoch junoc cadena oro dꞌa sjaj, tzꞌoch dꞌa yoxil yajalil dꞌa in macbꞌen tic, xchi vin̈.
8 Masanil ebꞌ jelan ayoch yopisio yacꞌan srazón vin̈ rey chiꞌ, ix och ebꞌ dꞌa yol jun cuarto, palta malaj val junoc ebꞌ ix nachajel yuuj tas syalelcꞌochi. 9 Ix te xiv vin̈aj rey Belsasar chiꞌ, sac ix aj yilji sat vin̈. Axo masanil ebꞌ vin̈ vinac ayecꞌ yedꞌ vin̈ taꞌ, ix somchajpax scꞌool ebꞌ vin̈. 10 Ayic ix yabꞌan ix reina, snun vin̈ rey chiꞌ yel yav vin̈ yedꞌ pax ebꞌ avtabꞌil, ix och ix dꞌa yol scuartoal bꞌaj ayoch qꞌuin̈ chiꞌ, ix yalan ix icha tic:
—Ayocabꞌn̈ej opisio dꞌa juneln̈ej. Mocabꞌ acꞌ pensar, mocabꞌ ach sacbꞌielpax yuj xivelal, 11 yujto a dꞌa yol a macbꞌen tic, ay jun vin̈ syal snachajel yuuj, ayoch sjelanil juntzan̈ dios dꞌa vin̈. A dꞌa yol stiempoal vin̈ a mam icham, a jun vin̈ vinac chiꞌ, ix schꞌox val vin̈ to ay spensar vin̈ te vachꞌ, ay spensar vin̈ sicꞌlabꞌil icha yic ebꞌ dios. Yuj chiꞌ, a vin̈aj rey Nabucodonosor a mam icham, a vin̈ ix acꞌanoch jun vin̈ chiꞌ yajaliloc ebꞌ ay spensar, ebꞌ naumel lolonel, ebꞌ schuman yedꞌ qꞌuen cꞌanal yedꞌ ebꞌ ajchum. 12 Daniel sbꞌi jun vin̈ chiꞌ, axo vin̈ a mam icham chiꞌ ix acꞌan scuch vin̈ Beltsasar. Te ay sjelanil vin̈ yedꞌ tas yojtac, yic snachajel vayich yuj vin̈, syal snachajpaxel yuj vin̈ tas syalelcꞌoch junoc lolonel to ajaltac snachajeli yedꞌ sbꞌoan yaj junoc tas to nivan yaji. Avtejcot vin̈ an. A vin̈ ol acꞌan ojtaquejel tas syalelcꞌoch juntzan̈ tzꞌibꞌ dꞌa sat pat tic, xchi ix dꞌa vin̈ rey chiꞌ.
13 Ix avtaj vin̈aj Daniel chiꞌ, ix icꞌchajbꞌat vin̈ dꞌa yichan̈ vin̈ rey chiꞌ, ix scꞌanbꞌan vin̈ dꞌa vin̈:
—¿A ach am tic tza cuch Daniel, aj Judá icꞌbꞌilcot preso yuj vin̈aj Nabucodonosor vin̈ in mam icham? 14 Ix alchaj dꞌayin tobꞌ ayoch sjelanil juntzan̈ dios dꞌayach, tobꞌ ay a pensar, jelan ach. 15 Yuj chiꞌ ix ach vavtej. Ix vavtej masanil ebꞌ vin̈ jelan yedꞌ ebꞌ naumel lolonel, yic syavtej juntzan̈ lolonel ebꞌ tzꞌibꞌabꞌiloch tic yedꞌ yalan ebꞌ dꞌayin tas syalelcꞌochi, palta malaj val junoc ebꞌ snachajel yuuj tas syalelcꞌochi. 16 Ix alchaj dꞌayin tobꞌ syal acꞌan checlajel lolonel ajaltac snachajeli. Yuj chiꞌ ta syal avtan juntzan̈ lolonel tic, tzalan dꞌayin tas syalelcꞌochi, ol acꞌchajoch pichul púrpura dꞌayach, ol acꞌchajpaxoch junoc cadena oro dꞌa a jaj, ol ach och dꞌa yoxil yajalil dꞌa yol in macbꞌen tic, xchi vin̈ rey chiꞌ.
17 Ix yalan vin̈aj Daniel chiꞌ icha tic:
—Canocabꞌ a silabꞌ chiꞌ dꞌayach mamin rey. Syal acꞌan jun opisio chiꞌ dꞌa junocxo, palta ol vavtej jun tzꞌibꞌ tic, ol valan dꞌayach tas val syalelcꞌoch juntzan̈ lolonel tzꞌibꞌabꞌiloch dꞌa sat pat tic.
18 Mamin rey, a Dios Te Nivan Yelcꞌochi, aꞌ ix acꞌan yopisio vin̈aj Nabucodonosor a mam icham yedꞌ snivanil yelcꞌochi, sbꞌinajnaquil yedꞌ stziquiquial. 19 Yuj opisio ix acꞌchaj chiꞌ dꞌa vin̈, ix xiv masanil anima dꞌa junjun nación yedꞌ dꞌa junjun tiꞌal, yujto nivan yelcꞌoch vin̈ rey chiꞌ dꞌa yol sat ebꞌ. A mach sgana vin̈ schami, schamn̈ej, axo mach malaj sgana vin̈ schami, max miljichamoc. Ay pax mach ix icꞌjiel dꞌa yopisio yuj vin̈, ay pax mach ix acꞌjioch dꞌa yopisio, ato aꞌ tas snibꞌej scꞌool vin̈. 20 Palta a val yic ix yicꞌanchaan̈ sbꞌa vin̈, ix ixtaxel sbꞌeybꞌal vin̈. Ix icꞌchajel vin̈ dꞌa yopisio dꞌa reyal chiꞌ yedꞌ snivanil yelcꞌochi. 21 Ix pechchajel vin̈ dꞌa scal ebꞌ yetanimail, ix ochcan spensar vin̈ icha spensar nocꞌ nocꞌ. Junn̈ej ix aj vin̈ yedꞌ nocꞌ caltacteꞌal bꞌuru. Ix scꞌux an̈ an̈cꞌultac vin̈ icha nocꞌ vacax. Ix empax yal acꞌval dꞌa snivanil vin̈, masanto ix yal snachajel yuj vin̈ chajtil val yaj Dios, Jun Te Nivan Yelcꞌochi, yajal pax yaj dꞌa yolyibꞌan̈qꞌuinal tic. A tzꞌacꞌanoch ebꞌ yajal to sgana syacꞌochi. 22 A achxo pax tic, mamin rey Belsasar, yixchiquin ach vin̈, vachꞌchom ojtac tas ix uji chiꞌ, palta man̈ val jabꞌoc tziqꞌuem a bꞌa. 23 Palta yelxo ix icꞌchaan̈ a bꞌa dꞌa yichan̈ Jun Yajalil satchaan̈. Ix acꞌan icꞌchajcot juntzan̈ copa dꞌa a mexa yedꞌ juntzan̈ ucꞌabꞌ yic stemplo Jun Yajal satchaan̈ chiꞌ. A dꞌa yol juntzan̈ chiꞌ ix ucꞌ vino yedꞌ masanil ebꞌ avtabꞌil uuj. Ix eyicꞌchaan̈ juntzan̈ dios to max yal yilani, max yal yabꞌani, malaj pax jabꞌoc tas yojtac. Man̈oc pax dꞌa Dios ix al vachꞌ lolonel, ina a pax dꞌa yol scꞌabꞌ ay a qꞌuinal, a pax snaan tas tza cꞌulej. 24 Yuj chiꞌ ix yacꞌcot Dios jun cꞌabꞌ ix tzꞌibꞌan juntzan̈ lolonel tic, 25 MENE, MENE, TEKEL, UPARSIN. 26 A juntzan̈ tic icha tic syalelcꞌochi: MENE: Toxo ix sbꞌis Dios jayeꞌ cꞌu ayachto och dꞌa opisio, toxo ix schꞌox slajvubꞌ. 27 TEKEL: Toxo ix ach echtaj dꞌa yol echlabꞌ, man̈ tzꞌacanoc alil. 28 PERES: A a macbꞌen, van spojchajbꞌati, ix acꞌchajoch dꞌa yol scꞌabꞌ ebꞌ Medo yedꞌ ebꞌ Persa, xchi vin̈aj Daniel chiꞌ.*
29 Ix lajvi chiꞌ, ix schecan vin̈aj rey Belsasar chiꞌ acꞌchajoch pichul púrpura dꞌa vin̈aj Daniel chiꞌ. Ix acꞌchajoch jun cadena nabꞌa oro dꞌa sjaj vin̈. Ix yalan vin̈ rey chiꞌ dꞌa masanil anima to a dꞌa jun rato chiꞌ, ix ochcan vin̈aj Daniel chiꞌ dꞌa yoxil yajalil dꞌa yol smacbꞌen.