Ochnac vin̈aj rey Nabucodonosor icha nocꞌal
4
Ix yacꞌanbꞌat jun abꞌix vin̈ rey dꞌa yol masanil smacbꞌen icha tic: A in rey Nabucodonosor in tic, svacꞌ stzatzil e cꞌool e masanil ex chon̈abꞌ, ma ex nación yalxon̈ej tas tiꞌal tzeyalaꞌ, a ex masanil ex cajan ex dꞌa yolyibꞌan̈qꞌuinal tic. 2 In gana tzeyojtaquejel e masanil tastac satubꞌtac ix scꞌulej Dios Nivan Yelcꞌoch dꞌayin. 3 Te satubꞌtacxon̈ej tas scꞌulej, man̈ jantacoc spoder, Yajal ton dꞌa masanil tiempo, a yopisio malaj slajvubꞌ.4 A in Nabucodonosor in tic, tzalajcꞌolal vajecꞌ dꞌa in palacio. 5 Palta a dꞌa jun acꞌval, ay jun tas ix in vayichej. A yuj tas ix vil chiꞌ yedꞌ tas ix in naꞌa, ix in te xivi. 6 Yuj chiꞌ ix in chec avtajcot masanil ebꞌ jelan dꞌa Babilonia tic, yic syalan ebꞌ tas syalelcꞌoch in vayich chiꞌ. 7 Ix javi ebꞌ smasanil: Aton ebꞌ ajbꞌaal, ebꞌ naumel lolonel, ebꞌ schuman yedꞌ qꞌuen cꞌanal yedꞌ ebꞌ ajchum. Ix valan in vayich chiꞌ dꞌa ebꞌ, palta maj yal-laj ebꞌ dꞌayin tas syalelcꞌochi. 8 Stzacꞌanilxo ix javi vin̈aj Daniel, scuchan pax Beltsasar, icha sbꞌi in diosal, ayoch sjelanil juntzan̈ dios dꞌa vin̈. Ix valan in vayich chiꞌ dꞌa vin̈ icha tic: 9 Ach Beltsasar, yajal aj dꞌa scal ebꞌ jelan spensar, vojtac to ayoch sjelanil juntzan̈ dios dꞌayach, ojtacpax masanil tas satubꞌtac. Scham val abꞌani tas ix vil dꞌa in vayich, ol alan dꞌayin tas syalelcꞌochi. 10 Aton val in vayich ix vil tic ayic jichan in ecꞌ in vayi:
A dꞌa snan̈al lum luum tic ix vil jun te teꞌ te chaan̈ steel.
11 Ix qꞌuibꞌchaan̈ teꞌ, te nivan ix aj spatic teꞌ. A schon teꞌ, ix qꞌuecꞌoch dꞌa satchaan̈, chequel teꞌ masanto bꞌaj slajvicꞌoch lum luum.
12 Te vachꞌ yilji xil teꞌ, man̈ jantacoc sat teꞌ, cꞌocbꞌil val syabꞌ sat teꞌ chiꞌ sloan masanil anima. Axo masanil nocꞌ nocꞌ, tzꞌoch nocꞌ scꞌubꞌej sbꞌa dꞌa yen̈ul yich teꞌ. Axo dꞌa scꞌabꞌtac teꞌ sbꞌo soꞌ nocꞌ much, axo masanil tas pitzan dꞌa yolyibꞌan̈qꞌuinal tic, cꞌocbꞌil svatzitaj ebꞌ yuj sat teꞌ.
13 Axo ix aj jun, ix vilan jun ángel dꞌa in vayich chiꞌ, to stan̈vej yolyibꞌan̈qꞌuinal tic, van yemta dꞌa satchaan̈. 14 Te chaan̈ ix el yav, ix yalan icha tic:
Chꞌaquequel te teꞌ chiꞌ, xiquequel scꞌabꞌ teꞌ, tzeyicꞌanel xil teꞌ, tze saclemanbꞌat sat teꞌ chiꞌ smasanil. Saclemocabꞌcanbꞌat masanil nocꞌ nocꞌ ayoch dꞌa yalan̈ yen̈ul teꞌ yedꞌ masanil nocꞌ much ayoch dꞌa scꞌabꞌtac teꞌ.
15 Axon̈ej yibꞌ teꞌ tzeyactejcani, tze tzecꞌancan teꞌ yibꞌ chiꞌ yedꞌ qꞌuen cadena to hierro yedꞌ bronce. Scan jun chiꞌ dꞌa scal an̈ an̈cꞌultac chiꞌ, axo yal acꞌval ol em dꞌa yibꞌan̈, axo an̈ an̈cꞌultac ol scꞌux icha nocꞌ caltacteꞌal nocꞌ.
16 Ol ixtaxel spensar. Lajanxo ol aj spensar icha spensar nocꞌ nocꞌ. A jun macan̈ yaelal chiꞌ, uqueꞌ abꞌil ol yacꞌaꞌ.
17 A on̈ ángel on̈ sco tan̈vej yolyibꞌan̈qꞌuinal tic, a on̈ scalaꞌ to ol javoc jun yaelal tic dꞌa yibꞌan̈, yic vachꞌ syojtaquejel ebꞌ anima smasanil to a Dios Nivan Yelcꞌochi, ay yopisio dꞌa yibꞌan̈tac nación. A tzꞌacꞌan opisio dꞌa mach sgana syacꞌochi, syalpax yacꞌanoch junoc mach emnaquil yajaliloc junoc nación, xchi jun ángel chiꞌ.
18 Aton in vayich ix vil tic. A ticnaic ach Beltsasar, al dꞌayin tas syalelcꞌochi, yujto malaj val junocxo ebꞌ ay tas syal yuuj dꞌa yol in macbꞌen tic snachajel yuuj. Palta a ach tic ol yal snachajel uuj, yujto ayoch sjelanil juntzan̈ dios dꞌayach, xin chi.
19 Axo vin̈aj Daniel chiꞌ, aton vin̈ scuchpax Beltsasar, quen am man̈ junoc hora ix can numan vin̈. Ix somchajqꞌue spensar vin̈, palta ix valan dꞌa vin̈: Beltsasar, man̈ acꞌ pensar yuj jun in vayich chiꞌ yedꞌ tas syalelcꞌochi, xin chi. Ix yalan vin̈ dꞌayin: Ay mamin rey, comonoc val dꞌa yibꞌan̈ ebꞌ ayoch ajcꞌolal dꞌayach ol em tas syalelcꞌoch jun a vayich tic. 20 Mamin rey, a jun te teꞌ te chaan̈ steel ix il chiꞌ, aton jun teꞌ ix qꞌuecꞌoch dꞌa satchaan̈, teꞌ ix checlaj dꞌa najat, 21 teꞌ vachꞌ yilji xiil, teꞌ tzijtum sat, teꞌ cꞌocbꞌiln̈ej syabꞌ sat sloan masanil tas pitzan, teꞌ bꞌaj tzꞌoch masanil nocꞌ nocꞌ scꞌubꞌej sbꞌa dꞌa yalan̈ yen̈ul scꞌabꞌ, teꞌ bꞌaj sbꞌo soꞌ nocꞌ much dꞌa scaltac scꞌabꞌ, 22 a ach ton tic mamin rey. To ix ach qꞌuen̈ejchaan̈ yuj snivanil elcꞌoch chiꞌ. Ix qꞌuecꞌoch a bꞌinajnaquil dꞌa satchaan̈. Yajal ach dꞌa masanil yolyibꞌan̈qꞌuinal tic. 23 Ix ilanpax yemta jun ángel stan̈vumal yolyibꞌan̈qꞌuinal tic dꞌa satchaan̈, ix yalani: Chꞌaquec telvoc te nivan teꞌ chiꞌ, yic slajviem teꞌ. Axon̈ej yibꞌ teꞌ yedꞌ schꞌan̈al yibꞌ tzeyacꞌcani. Stzecꞌchajcan yibꞌ teꞌ yedꞌ qꞌuen cadena to hierro yedꞌ bronce, scan dꞌa caltac an̈cꞌultac. Emocabꞌ yal acꞌval dꞌa yibꞌan̈ taꞌ, ol cajnaj yedꞌ nocꞌ nocꞌ uqueoc abꞌil. 24 A syalelcꞌoch jun tic mamin rey, a jun Dios Nivan Yelcꞌochi, aꞌ tzꞌalan jun tic dꞌa ibꞌan̈. 25 Ol ach pechchajel dꞌa scal ebꞌ anima tic. Ol ach bꞌatcan dꞌa scal nocꞌ nocꞌ, axo an̈ an̈cꞌultac ol a cꞌux icha nocꞌ vacax. Ol em yal acꞌval dꞌa ibꞌan̈. Mamin rey, icha chiꞌ ol ach ajecꞌ uqueoc abꞌil, masanto ol nachajel uuj to a jun Dios Nivan Yelcꞌochi, aꞌ yajal yaj dꞌa yibꞌan̈ ebꞌ anima. A tzꞌacꞌanpaxoch ebꞌ yajal icha sgana mach syacꞌochi. 26 A jun lolonel ix alchaji to scan yibꞌ teꞌ yedꞌ schꞌan̈al yibꞌ chiꞌ, syalelcꞌochi to ol ach cꞌochxoc dꞌa opisio chiꞌ ayic toxo ix nachajel uuj to a Dios yajal yaj dꞌa yolyibꞌan̈qꞌuinal tic. 27 Yuj chiꞌ mamin rey, cha abꞌ masanil juntzan̈ lolonel sval tic dꞌayach. Yuj chiꞌ tojoln̈ej tzutej a bꞌa, man̈xo acꞌoch a mul. Comonoc val tzactejcan a cꞌulan chucal, tzach colvaj dꞌa ebꞌ tzꞌixtaji. Tato icha chiꞌ, tecan ol ach can dꞌa juncꞌolal yedꞌ a qꞌuechaan̈ dꞌa masanil tasi, xchi vin̈aj Daniel chiꞌ dꞌayin, xchi vin̈ rey Nabucodonosor chiꞌ.
28 Masanil juntzan̈ lolonel ix alchaj dꞌa vin̈aj rey Nabucodonosor chiꞌ, ix elcꞌochi. 29 Yabꞌilal yalchaj juntzan̈ chiꞌ dꞌa vin̈ rey chiꞌ, ayic van sbꞌeyecꞌ vin̈ dꞌa span̈anil yibꞌan̈ spalacio dꞌa Babilonia, 30 ix yalan vin̈ icha tic: Ina val yilji nivan chon̈abꞌ Babilonia tic. A in yedꞌ val in poder ix in bꞌoqꞌuei yic scheclajeli to nivan velcꞌochi, xchi vin̈.
31 Vanto val yalan juntzan̈ lolonel chiꞌ vin̈, ix yabꞌan vin̈ yoch jun lolonel dꞌa satchaan̈, ix yalani: Scham abꞌan juntzan̈ lolonel tic ach rey Nabucodonosor, a opisio chiꞌ, toxo ix icꞌchajecꞌ dꞌayach. 32 Ol ach pechchajel dꞌa scal ebꞌ anima, ol ach bꞌatcan dꞌa scal nocꞌ nocꞌ. A an̈ an̈cꞌultac ol a cꞌux ichoc nocꞌ nocꞌ dꞌa uqueoc abꞌil, masanto ol yal snachajel uuj to a Dios Nivan Yelcꞌochi, aꞌ tzꞌacꞌan yajalil dꞌa yibꞌan̈ masanil anima yedꞌ dꞌa yibꞌan̈ masanil nación dꞌa yolyibꞌan̈qꞌuinal tic. Aꞌ tzꞌacꞌanoch dꞌa yajalil mach sgana syacꞌochi, xchi jun lolonel chiꞌ.
33 A dꞌa jun rato chiꞌ, ix elcꞌoch tas albꞌilcan dꞌa yibꞌan̈ vin̈aj rey Nabucodonosor chiꞌ, ix pechchajcanel vin̈ dꞌa scal ebꞌ anima. A an̈ an̈cꞌultac ix scꞌux vin̈ icha nocꞌ vacax, axo yal acꞌval ix em dꞌa yibꞌan̈ snivanil vin̈. Ix qꞌuibꞌ xiil vin̈ icha nocꞌ chꞌacbꞌa, an̈ejaꞌ icha yech nocꞌ ix aj qꞌuen yech vin̈.
Ix bꞌoxi spensar vin̈ rey
34 Ix yalanpaxbꞌat vin̈ rey chiꞌ icha tic: Ayic ix lajvi stiempoal yaelal ayoch dꞌa vibꞌan̈ a in Nabucodonosor in tic, ix in qꞌue qꞌuelan dꞌa satchaan̈, ix bꞌo in pensar dꞌa in locoal. Ix valan vachꞌ lolonel dꞌa Dios Te Nivan Yelcꞌochi, ix vicꞌanchaan̈ sbꞌi Jun ayn̈ejecꞌ dꞌa juneln̈ej:
Yujto Yajal ton dꞌa juneln̈ej, a yopisio malaj slajvubꞌ.
35 A dꞌa yichan̈, malaj val jabꞌoc tas syal yuj ebꞌ cajan dꞌa sat luum tic. Scꞌulejn̈ej tas snibꞌej dꞌa scal ebꞌ ayecꞌ dꞌa satchaan̈ yedꞌ dꞌa scal ebꞌ cajan dꞌa sat luum tic. Malaj mach syal syamanoch vaan scꞌabꞌ syalan dꞌay, ¿tas yuj icha chiꞌ tza cꞌulej? man̈ xchioc.
36 A dꞌa jun rato chiꞌ, ix meltzaj in pensar ix vabꞌi yedꞌ vicꞌanxi vopisio nivan yelcꞌochi yedꞌ in poder. Axo ebꞌ in checabꞌ yedꞌ ebꞌ nivac yopisio dꞌa in despacho, ix javi ebꞌ ul in sayeqꞌui. Ix in ochxi yajalil dꞌa in nación, ix yicꞌanxi yip vopisio. Te nivan ix ajxi dꞌa yichan̈ icha yaj dꞌa yalan̈taxo.
37 A ticnaic, a in val svicꞌchaan̈ Jun sReyal satchaan̈. Svalanpax vachꞌ lolonel dꞌay, yujto a masanil tas scꞌulej, vachꞌn̈ej, tojoln̈ej dꞌa smasanil. Syalpax yicꞌanemta ebꞌ syaloch sbꞌa to nivan yelcꞌochi, xchibꞌat vin̈aj Nabucodonosor chiꞌ.