Tzijtum nocꞌ cꞌulubꞌ
2
Puchajocabꞌ qꞌuen trompeta dꞌa tzalan Sion. Puec junoc chꞌoxnabꞌil yic oval dꞌa tzalan yic ejmelal dꞌa Jehová. Ibꞌxocabꞌqꞌue masanil ebꞌ cajan dꞌa Judá yuj xivelal, yujto lacꞌanxo sjavi scꞌual yoval scꞌol Jehová.2 A jun cꞌual chiꞌ scꞌual qꞌuicꞌalqꞌuinal. Scꞌual te ay asun, yuj chiꞌ musan. A val nocꞌ cꞌulubꞌ, lajan nocꞌ icha junoc n̈ilan̈ ebꞌ soldado. Lajan sbꞌat cꞌamamoc nocꞌ icha sbꞌat cꞌamamoc veven, masanto smuschaj jolomtac vitz yuuj. Malaj bꞌaj ix uji icha tic dꞌa yalan̈taxo, man̈xapax bꞌaqꞌuin̈ ol ujoc junelxo.
3 Lajan nocꞌ icha teꞌ cꞌacꞌ slajviel masanil tas yuuj. Ayic manto javi nocꞌ, te vachꞌ yilji lum luum, icha val yilji Edén. Axo yic ol lajvoc yecꞌ nocꞌ, lajanxo ol ajcan icha tzꞌinan luum. Man̈xa jabꞌoc tas ol canoc.
4 Lajan yilji nocꞌ icha nocꞌ chej. Sbꞌat lemnaj nocꞌ icha tzꞌaj sbꞌat nocꞌ chej chiꞌ dꞌa oval.
5 Icha scꞌan̈ junoc carruaje yic oval, ma icha scꞌan̈ teꞌ xiltac teꞌ stzꞌabꞌat yuj cꞌacꞌ, icha val chiꞌ tzꞌaj scꞌan̈ scot nocꞌ dꞌa jolomtac vitz. Icha junoc n̈ilan̈ soldado te ay yip, tzololi sbꞌat dꞌa oval, icha val chiꞌ nocꞌ.
6 Ayic ol yilan ebꞌ anima, ol te ibꞌxocqꞌue ebꞌ yuj xivelal. Sacxon̈ej ol aj yilji sat ebꞌ yuuj.
7 Icha ebꞌ soldado te jelan dꞌa oval, bꞌen̈ej yecꞌ lemnaj ebꞌ dꞌa yibꞌan̈tac muro, tojol tzꞌaj sbꞌat ebꞌ dꞌa ebꞌ ajcꞌool, max elcanlaj ebꞌ dꞌa titac bꞌe, icha val chiꞌ nocꞌ.
8 Max stenlaj sbꞌa junjun nocꞌ. Tojoln̈ej syutejbꞌat sbꞌa nocꞌ dꞌa yol sbꞌe. Vachꞌxon̈ej tzꞌaj yecꞌ tzololoc nocꞌ icha yecꞌ ebꞌ soldado dꞌa scal yespada ebꞌ yajcꞌool.
9 Ayic scꞌoch lemnaj nocꞌ dꞌa chon̈abꞌ, bꞌen̈ej yecꞌ lemnaj nocꞌ dꞌa yibꞌan̈tac muro, bꞌen̈ej yoch nocꞌ dꞌa yoltac pat. Icha val elcꞌum tzꞌoch dꞌa yoltac ventena.
10 Tzꞌibꞌxiqꞌue lum luum tic dꞌa yichan̈ nocꞌ, tzꞌoch en̈ul dꞌa satchaan̈ yuj nocꞌ. Stup yoc cꞌu, yoc qꞌuen uj, man̈xa qꞌuen cꞌanal scopoljubꞌ yuj yen̈ul nocꞌ.
11 A Jehová bꞌabꞌel yecꞌ yuj nocꞌ. Syacꞌan abꞌchaj sjaj, icha val scꞌan̈ cꞌu. Tzijtum sbꞌisul nocꞌ, maxtzac bꞌischaj nocꞌ scꞌanabꞌajan schecnabꞌil Dios. Ayxo smay jun cꞌual yic yoval scꞌol Jehová chiꞌ. Malaj mach ol yal stecꞌbꞌan sbꞌa dꞌa yichan̈.
Yoqꞌuelcꞌolal Jehová
12 Palta a ticnaic, a Jehová tzꞌalan icha tic: Meltzajan̈eccot dꞌayin dꞌa smasanil e cꞌool. Ochan̈ec dꞌa tzecꞌojcꞌolal, elocabꞌ eyav. Ocꞌan̈ec, xchi.
13 On̈ cusec yuj co mul dꞌa smasanil co cꞌool, man̈ ton̈ejoc sco tzilchitejbꞌat co pichul. Con̈ meltzajec dꞌa Jehová co Diosal, yujto vachꞌ scꞌool. Ay yoqꞌuelcꞌolal, ay snivancꞌolal, tzon̈ xajanej. Bꞌecan scꞌol yicꞌanel jun yaelal tic dꞌa quibꞌan̈.
14 Con̈ meltzajec dꞌa Dios, talaj max yacꞌoch yaelal dꞌa quibꞌan̈. Tato icha chiꞌ a svachꞌcꞌolal ol yacꞌcoti, ol yacꞌan co trigo yedꞌ co vino. Yuj chiꞌ ay tas ol yal cacꞌan ofrendail dꞌay.
15 Puchajocabꞌ qꞌuen trompeta dꞌa tzalan Sion, yic smolbꞌej sbꞌa masanil chon̈abꞌ yic tzꞌoch dꞌa tzecꞌojcꞌolal.
16 Smolbꞌejocabꞌ sbꞌa masanil schon̈abꞌ Dios, sacbꞌitejocabꞌ sbꞌa. Smolbꞌejocabꞌ sbꞌa ebꞌ ichamtac vinac, ebꞌ unin yedꞌ ebꞌ vanto schuni. A ebꞌ ato yicꞌlan sbꞌa, elocabꞌcot ebꞌ dꞌa yol spat chiꞌ.
17 Ocꞌocabꞌ ebꞌ sacerdote, ebꞌ tzꞌacꞌan servil Jehová. A dꞌa snan̈al templo yedꞌ altar, yalocabꞌ ebꞌ icha tic: Mamin Jehová, acꞌ nivancꞌolal dꞌa quibꞌan̈ a on̈ a chon̈abꞌ on̈ tic. Malajocabꞌ mach tzon̈ bꞌuchani. Mocabꞌ on̈ telvoc dꞌa yol scꞌabꞌ ebꞌ chꞌoc chon̈abꞌil, yic man̈ ol yal ebꞌ icha tic: ¿Bꞌajtil ay jun e Diosal chiꞌ? mocabꞌ xchioc ebꞌ, xchiocabꞌ ebꞌ sacerdote chiꞌ.
18 Slajvi chiꞌ ol yacꞌan svachꞌcꞌolal Jehová yedꞌ yoqꞌuelcꞌolal dꞌayon̈ a on̈ schon̈abꞌ on̈ tic.
19 Ol yalan icha tic:
Ol vacꞌ ixim e trigo, e vino yedꞌ eyaceite masanto ol ex bꞌudꞌjoc. Man̈xo ol yal in cꞌool ol bꞌuchvaj ebꞌ chꞌoc chon̈abꞌil dꞌayex.
20 A ebꞌ ajcꞌol scot dꞌa norte, najat ol viqꞌuel ebꞌ dꞌa e tzꞌey, ol vacꞌancanbꞌat ebꞌ dꞌa tzꞌinan luum. A ebꞌ bꞌabꞌel, ol vacꞌcanbꞌat ebꞌ dꞌa yol aꞌ mar Muerto, axo ebꞌ tzacꞌan, ol vacꞌcanbꞌat ebꞌ dꞌa aꞌ mar Mediterráneo. Ataꞌ ol cꞌabꞌat ebꞌ, ol qꞌue sjabꞌ ebꞌ. Te satubꞌtac tas ol in cꞌulej dꞌa e cal, xcham Jehová.
21 Tzalajocabꞌ lum luum. Mocabꞌ xiv ebꞌ cajan dꞌa luum, yujto ay val tas te satubꞌtac ol scꞌulej Jehová.
22 Tzalajocabꞌ nocꞌ cꞌultaquil nocꞌ, mocabꞌ xiv nocꞌ, yujto ol yaxbꞌocxi an̈ an̈cꞌultac, axo te teꞌ, ol yacꞌxi sat teꞌ, tzijtum ol aj sat teꞌ higo yedꞌ teꞌ uva.
23 Masanil ex cajan ex dꞌa Sion, tzalajan̈ec. Tzalajan̈ec dꞌa Jehová co Diosal, yujto ol yacꞌ n̈abꞌil qꞌuinal dꞌayon̈ dꞌa scꞌual, bꞌabꞌel n̈abꞌ yedꞌ lajvubꞌ n̈abꞌ, icha scꞌulejtaxoni.
24 Te vachꞌ ol aj ixim trigo, man̈xo jantacoc ol ajxoc vino yedꞌ aceite.
25 Syalan Jehová: Ol vacꞌ sqꞌuexul masanil eyavbꞌen ix lajviel yuj juntzan̈ nocꞌ cꞌulubꞌ icha soldado ix vacꞌbꞌat dꞌa e cal dꞌa juntzan̈ abꞌil ix eqꞌui.
26 Axo ticnaic, ol ex vaoc masanto ol ex bꞌudꞌjoc. Ol eyalan vachꞌ lolonel dꞌayin Jehová e Diosal in, yujto satubꞌtac tas ix in cꞌulej dꞌa e cal. Man̈xa bꞌaqꞌuin̈ ol ex canxoc dꞌa qꞌuixvelcꞌolal.
27 Ol nachajel eyuj a ex israel ex tic to ayinecꞌ dꞌa e cal a in Jehová e Diosal in. A inn̈ej e Diosal in, malaj junocxo. Man̈xa bꞌaqꞌuin̈ ol ex canxoc dꞌa qꞌuixvelcꞌolal.
Ol javoc Yespíritu Dios
28 Ayic ol lajvoc yecꞌbꞌat juntzan̈ tic, ol vacꞌoch Vespíritu dꞌa masanil anima. Ol yalel in lolonel ebꞌ eyuninal yedꞌ ebꞌ eyisilal. Ol in lolon dꞌa ebꞌ ichamtac vinac dꞌa vayichal. Axo ebꞌ quelemtac, ay tas ol in chꞌox yil ebꞌ.
29 A dꞌa juntzan̈ cꞌual chiꞌ, ol vacꞌpaxoch Vespíritu dꞌa ebꞌ vin̈ checabꞌ yedꞌ dꞌa ebꞌ ix checabꞌ.
30 Ol in chꞌoxan juntzan̈ tas dꞌa satchaan̈ yedꞌ dꞌa sat luum, ay chicꞌ, cꞌacꞌ, ma nivac tabꞌ icha asun yedꞌ juntzan̈xo tas te satubꞌtac.
31 A cꞌu ol qꞌuicꞌbꞌoc, axo qꞌuen uj, chac ol aj qꞌueen icha chicꞌ. A juntzan̈ tic ol ujoc ayic manto javoc jun scꞌual yic svacꞌcot yoval in cꞌool. A jun cꞌual chiꞌ te nivan yelcꞌochi, te ay smay.
32 Axo masanil mach syal sbꞌa dꞌayin Jehová in, ol colchajoc. Icha val yaj valancani, a dꞌa tzalan Sion dꞌa Jerusalén, ay mach ol colchajoc, a val ebꞌ sicꞌbꞌilel vuuj, olto can ebꞌ, xchi Jehová.