A Slolonel Dios Dꞌa Vin̈aj
JOEL
1
A in Joel in tic yuninal in vin̈aj Petuel. A dꞌa jun uum tic ix in tzꞌibꞌej slolonel Jehová ix yal dꞌayin yic svaleli.A yaelal ix cot yuj nocꞌ cꞌulubꞌ
2 Ex ichamtac vinac yedꞌ ex masanil cajan ex dꞌa jun nación tic, abꞌec val juntzan̈ tic. ¿Toc ay bꞌaj ix eyil tas lajan icha jun tic? Malaj pax bꞌaj ix uji junoc icha tic ayic ix ecꞌ ebꞌ co mam quicham.
3 Alec juntzan̈ tic dꞌa ebꞌ eyuninal, axo ebꞌ ol alan dꞌa ebꞌ yuninal, axo ebꞌ chiꞌ ol alan pax dꞌa ebꞌ toto ol aljoc.
4 Masanil tas ix slajel nocꞌ cꞌulubꞌ. Axo jantacto ix cani, chꞌocxo pax junxo macan̈ nocꞌ ix ul lajaneli.*
5 A ex ucꞌum ex an̈, aqꞌuequel e vayan̈. A exxo ucꞌum ex vino, ocꞌan̈ec, yujto man̈xalaj vino chiꞌ ol eyuqꞌuej.
6 Icha jun nivan n̈ilan̈ soldado te ay smay, icha chiꞌ ix aj sja nocꞌ cꞌulubꞌ dꞌa yol co macbꞌen tic. Maxtzac bꞌischaj nocꞌ. A ye nocꞌ, lajan icha ye nocꞌ choj.
7 Toxo ix satjiel teꞌ uva yuj nocꞌ, toxo pax ix slajel teꞌ higo nocꞌ. Tzꞌinini ix ajcan yuj nocꞌ. Ix yicꞌanel stzꞌumal masanil teꞌ avbꞌen nocꞌ, sacxon̈ej ix ajcan scꞌabꞌtac teꞌ.
8 Ocꞌan̈ec icha junoc ix cobꞌes tzꞌoqꞌui, spichan sbꞌa ix yedꞌ pichul yic cuscꞌolal, yujto toxo ix cham vin̈ ix yacꞌ stiꞌ snupnaj yedꞌ ix.
9 Icha chiꞌ tzꞌaj yocꞌ ebꞌ vin̈ sacerdote tzꞌacꞌan servil Jehová, yujto man̈xa vael yedꞌ vino dꞌa templo, aton ofrenda tzꞌacꞌji dꞌa Jehová.
10 Toxo ix juvi masanil lum co luum, ichato ayoch lum dꞌa cuscꞌolal, yujto tzꞌinan ix ajcan luum. Toxo ix lajviel ixim trigo, ix tacjiel teꞌ uva, ix ixtaxpaxel teꞌ olivo.
11 A ex munlajvum ex tic, ocꞌan̈ec, cusan̈ec, yujto toxo ix lajviem eyavbꞌen. Man̈xa jochoj trigo yedꞌ cebada.
12 Toxo ix tacjiel teꞌ uva, ix lajviel teꞌ higo, ix tacjipaxel teꞌ granado, teꞌ palma, teꞌ mansan yedꞌ masanil teꞌ avbꞌen teꞌ. Icha chiꞌ ix aj slajvi stzalajcꞌolal ebꞌ anima.
13 A ex sacerdote ex tic, a ex tzex acꞌvi servil dꞌa altar tic, aqꞌuecoch pichul yic cuscꞌolal. Pilan acꞌval tzeyacꞌ eyocꞌ dꞌa templo, tzex ocꞌ yuj yaelal, yujto a dꞌa stemplo Dios man̈xalaj ixim pan yedꞌ vino tzꞌacꞌji ofrendail.
14 Avtejec masanil ebꞌ anima, ochan̈ec dꞌa tzecꞌojcꞌolal yedꞌ ebꞌ. Molbꞌejecoch e bꞌa dꞌa stemplo Jehová Dios yedꞌ masanil ebꞌ yichamtac vinaquil chon̈abꞌ yedꞌ masanil ebꞌ anima, tzex tevi dꞌa Jehová.
15 Ay..., te lacꞌanxo sjavi jun cꞌual yic yoval scꞌol Jehová. Jun cꞌu ay smay yic ol on̈ satel Dios Syal Yuj Smasanil.
16 Dꞌa val quichan̈ ix yiqꞌuel co vael. Ix lajvi tzalajcꞌolal dꞌa stemplo Jehová co Diosal.
17 A ixim in̈at, ton̈ej ix cꞌaem ixim dꞌa yol luum, yuj chiꞌ man̈xalaj ixim trigo. Axo spatil ixim, man̈xa tas dꞌa yool, ix lajvi smasanil.
18 Tzꞌel val yav nocꞌ nocꞌ yeqꞌui. Nabꞌaxon̈ej tzꞌecꞌ nocꞌ vacax say yan̈. Vanxo scham nocꞌ calnel yuj vejel.
19 Tzin avaj dꞌayach Jehová, yujto toxo ix tacji smasanil. Ichato ix ecꞌ cꞌacꞌ dꞌa scal an̈ an̈cꞌultac dꞌa svalabꞌ lum nocꞌ nocꞌ yedꞌ dꞌa smasanil caltac teꞌ.
20 Yedꞌ masanil nocꞌ nocꞌ ay dꞌa caltac teꞌ chiꞌ, tzꞌavaj nocꞌ dꞌayach, yujto toxo ix tup masanil a aꞌ, ichato ix tzꞌabꞌat masanil an̈ an̈cꞌultac yuj cꞌacꞌ.