8
Comonoc in nulej ach, junn̈ej am im ix co tzꞌubꞌuꞌ. Tato icha chiꞌ, ayic tzach in chaan dꞌa yoltac bꞌe, tzam yal in tzꞌubꞌanelta a tiꞌ, malaj am mach tzꞌalan in pecal.2 Tzam yal ach vicꞌanbꞌat dꞌa spat ix in nun, tzam ach vicꞌoch dꞌa yol pat chiꞌ. A ach am val tzach och in cꞌaybꞌumaloc. A in am svacꞌ vino man̈ jantacoc svachꞌil uqꞌuej yedꞌ yal sat teꞌ in granado.
3 A a cꞌabꞌ dꞌa a qꞌuexan̈ tzacꞌoch dꞌa yalan̈ in jolom, axo a vachꞌ tzin lacꞌanqꞌuei, xchi ix.
Syalan vin̈ quelem:
4 Ex cobꞌestac aj Jerusalén, aqꞌuec e tiꞌ dꞌayin to man̈ ol e pitzel svayan̈ ix xajanabꞌil vuuj, munil ol el svayan̈ ix, xchi vin̈.
Yic svaquil macan̈
Syalan ebꞌ amigo:
5 ¿Mach jun ix ix scot dꞌa tzꞌinan luum chiꞌ, jichanem ix dꞌa yibꞌan̈ vin̈ xajanabꞌil yuuj? xchi ebꞌ.
Syalan vin̈ quelem:
A dꞌa yich jun teꞌ mansan ix in xibꞌtejel a vayan̈. Ataꞌ cotnac syail ix a nun ayic aljinac.
Syalan ix cobꞌes:
6 Mocabꞌ a xajanej junocxo ix ix, palta ainn̈ejocabꞌi. Mocabꞌa junocxo mach tza lacꞌqꞌuei, palta ainn̈ejocabꞌi. A co xajanbꞌail ay yip icha chamel. Icha bꞌaj smucchaj chamnac to max yactejel tas yambꞌil yuuj, icha chiꞌ yaj bꞌaj sco xajanej co bꞌa. A bꞌaj sco xajanej co bꞌa, teꞌ cꞌacꞌ icha junoc cꞌacꞌ te ov.
7 A masanil aꞌ mar max tzacꞌvan aꞌ yacꞌan tup jun cꞌacꞌ chiꞌ. Max yalpaxlaj yacꞌan tup yoval aꞌ nivac aꞌ. Tato ay mach syaltej masanil tas ay dꞌa spat yic smanan jun xajanbꞌail tic, ton̈ej am spaticajcaneli, xchi ix.
Syalan ebꞌ vin̈ snulej ix cobꞌes:
8 Ay jun ix canabꞌ tzacꞌan uninto, mantalaj yim ix. ¿Tas sco cꞌulej yedꞌ ix tato sjavi scꞌanumal ix?
9 Tato lajan ix yedꞌ junoc muro, tzam co bꞌoqꞌue chabꞌoc torre plata dꞌay. Tato lajan ix icha junoc puerta, tzam co bꞌo yedꞌ teꞌ chemteꞌ nabꞌa cꞌuteꞌ, xchi ebꞌ vin̈.
Syalan ix cobꞌes:
10 A in tic, lajan in icha junoc muro. Axo vim, lajan icha juntzan̈ torre, yuj chiꞌ stzalaj val scꞌol vin̈ xajanabꞌil vuuj vedꞌoc.
11 A vin̈aj Salomón, ay jun yavbꞌen uva vin̈ dꞌa Baal-hamón. Syacꞌcan vin̈ dꞌa yol scꞌabꞌ juntzan̈ ebꞌ stan̈vumal chiꞌ. Ayic ol molchaj sat teꞌ uva chiꞌ, ol yacꞌ mil qꞌuen plata junjun ebꞌ dꞌa vin̈.
12 Emocabꞌ jun mil qꞌuen splata vin̈aj Salomón yedꞌ 200 yic ebꞌ stan̈van chiꞌ. A inxo jun, ay vavbꞌen uva dꞌa yol vicoꞌ, a inxon̈ej tzin naꞌ tas svutej, xchi ix.
Syalan vin̈ quelem:
13 Ach xajanabꞌil vuuj, ayach ecꞌ dꞌa scal avbꞌen, tzin nibꞌej svabꞌ yoch a jaj. Yedꞌ ebꞌ camigo, snibꞌej pax ebꞌ syabꞌ yoch a jaj, xchi vin̈.
Syalan ix cobꞌes:
14 Ach xajanabꞌil vuuj, yelcꞌolal a coti. Qꞌuean̈ urnaj icha junoc nocꞌ chꞌucul, icha val junoc yuneꞌ chꞌucul dꞌa tzalquixtac bꞌaj tzꞌavchaj incienso, xchi ix.