Syalan vin̈ quelem:
7
Ach cobꞌes, ach yisil vin̈ rey, man̈xo jantacoc svachꞌil yilji oc dꞌa yol a xan̈abꞌ. A val a xubꞌ, te vachꞌ yilji icha val smunlajel junoc jelan sbꞌoan tastac yedꞌ qꞌuen oro.2 A val a cꞌool, lajan val icha junoc chꞌubꞌ to ayn̈ejem vino dꞌa yool. Axo a nan̈al, lajan icha junoc cun̈an̈ ixim trigo oyan och teꞌ xumac dꞌa spatic.
3 A im schabꞌil, lajan val icha chavan̈oc nocꞌ chꞌucul tiox ix aj yalji.
4 A a jaj, lajan val icha junoc torre nabꞌa marfil. A yol a sat, lajan icha chabꞌ aꞌ n̈ajabꞌ dꞌa chon̈abꞌ Hesbón, junn̈ej ay dꞌa spuertail yic Bat-rabim. Axo a n̈iꞌ, lajan val yedꞌ torre dꞌa Líbano, aton jun qꞌuelanbꞌat dꞌa chon̈abꞌ Damasco.
5 A a jolom, chaan̈ ayqꞌuei, lajan icha jolom vitz Carmelo. Te copopi yilji xil a jolom icha yilji schꞌalil púrpura. Toxon̈ej tzꞌicꞌjicanqꞌue spixan jun vin̈ rey yuj xil a jolom chiꞌ.
6 Ach xajanabꞌil vuuj, ach ix to nibꞌabꞌil, yelxo te vachꞌ ilji.
7 Te tojol ilji icha junoc teꞌ palma. Axo im, lajan val icha junjun cꞌojlabꞌ sat teꞌ palma chiꞌ.
8 Tzin nibꞌej qꞌue in bꞌa dꞌa teꞌ palma chiꞌ yic svicꞌanemta teꞌ sat. A im lajan val icha junjun cꞌojlabꞌ teꞌ uva. A xobꞌal a tiꞌ, sucꞌuqꞌui sjabꞌ icha sjabꞌ teꞌ mansan.
9 A val a tiꞌ, lajan val icha vino man̈xo jantacoc svachꞌil, xchi vin̈ quelem.
Syalan ix cobꞌes:
Yucꞌocabꞌ vino vin̈ xajanabꞌil vuuj, tzꞌoch dꞌa stiꞌ vin̈, tzꞌecꞌ dꞌa scal ye vin̈.
10 Yic in vin̈ xajanabꞌil vuuj, te nibꞌabꞌil in yuj vin̈.
11 Con̈ dꞌa caltac avbꞌen ach xajanabꞌil vuuj, tzꞌecꞌ junoc acꞌval cuuj dꞌa scaltac xumaquil an̈ alheña.
12 Axo dꞌa qꞌuin̈ibꞌalil, tzon̈ bꞌat dꞌa scal teꞌ uva yic squilaꞌ tato ayxo svol teꞌ, tato vanxo spoj xumaquil teꞌ. Ol quilaꞌ tato vanxo xumacan teꞌ granado, a val taꞌ ol in chꞌoxoꞌ to xajan ach vuuj.
13 Ayxo sjabꞌ an̈ mandrágora. A dꞌa stiꞌ co pat, ayxo sat masanil tas avabꞌil vachꞌ sloji, ay sat taquin̈xo yedꞌ sat toto smolji. Chꞌoc val ix vicꞌcanel ic ach xajanabꞌil vuuj, xchi ix.