Syal ebꞌ anima
6
Ach ix te vachꞌ ilji dꞌa yichan̈ ebꞌ ix ix vachꞌ yilji, ¿bꞌajtil ix cꞌoch vin̈ xajanabꞌil chiꞌ uuj? ¿Bꞌajvaltil ix bꞌat vin̈ yic vachꞌ bꞌat co say vin̈? xchi ebꞌ dꞌayin.Syalan ix cobꞌes:
2 A vin̈ xajanabꞌil chiꞌ vuuj, toxo ix bꞌat vin̈ bꞌaj ay yavbꞌen, dꞌa scal tas avabꞌil yuj vin̈ to sucꞌuqꞌui yel sjabꞌ. Ix bꞌat vin̈ yacꞌ tzalajbꞌoc scꞌool yedꞌ smolan teꞌ xumac.
3 A in tic, yic in vin̈ xajanabꞌil vuuj chiꞌ, vic pax vin̈. Syacꞌ tzalajbꞌoc scꞌol vin̈ dꞌa scal teꞌ xumac chiꞌ, xchi ix.
Yic yoil macan̈
Syalan vin̈ quelem:
4 Ach ix xajanabꞌil vuuj, te vachꞌ ilji, nibꞌabꞌilxon̈ej ilji icha val yilji chon̈abꞌ Tirsa yedꞌ chon̈abꞌ Jerusalén. Ayxo smay yilji, icha juntzan̈ soldado sbꞌey dꞌa stzolal.
5 Man̈xoocabꞌ mutzꞌmutzꞌan a sat dꞌayin, yujto toxo ix icꞌji in pixan uuj. A xil a jolom, lajan yilji icha yemta n̈ililoc nocꞌ chiva dꞌa pacꞌan yic Galaad.
6 A qꞌuen e, toxon̈ej stzꞌilili qꞌueen. Lajan yilji qꞌuen icha nocꞌ calnel toto tzꞌelta bꞌaj sbꞌicjieli, chatacvan̈ sbꞌey nocꞌ yedꞌ yuneꞌ, malaj junoc nocꞌ to schꞌocoj.
7 A val spacꞌultac a tiꞌ musan yuj junoc cꞌapac, ichaxon̈ej yilji cꞌaxepoc teꞌ granada.
8 Tzalajocabꞌ vin̈ rey yedꞌ 60 ebꞌ ix yetbꞌeyum reina yaji yedꞌ 80 ebꞌ ix schabꞌil yetbꞌeyum yedꞌ pax ebꞌ ix cobꞌestac maxtzac bꞌischaji.
9 Palta a in tic, junn̈ej ix vicoꞌ. Lajan ix icha val nocꞌ paramuch malaj spaltail. An̈ej ix xajanabꞌil yuj snun, yuj chiꞌ malaj junocxo mach lajan icha ix tic yalan snun chiꞌ. Ayic tzꞌilji ix yuj ebꞌ ix cobꞌestac, yuj ebꞌ ix reina, yuj pax ebꞌ ix schabꞌil yetbꞌeyum vin̈ rey chiꞌ, masanil ebꞌ chiꞌ tzꞌalani to vachꞌ yilji ix, xchi vin̈.
Syalan ebꞌ amigo:
10 ¿Mach jun ix ix schꞌox sbꞌa chiꞌ, icha val schꞌoxan sbꞌa cꞌu dꞌa qꞌuin̈ibꞌalil? Vachꞌxon̈ej yilji ix icha yilji qꞌuen uj, icha yilji yoc cꞌu, ay smay yilji icha juntzan̈ soldado sbꞌey dꞌa stzolal, xchi ebꞌ.
Syalan ix cobꞌes:
11 Ix in bꞌat bꞌaj ay teꞌ chꞌacteꞌ nogales, yic svilan masanil tas svolan dꞌa chꞌolan. Ix in nibꞌej ix vilaꞌ tato van scan sat teꞌ uva yedꞌ xumaquil teꞌ granado.
12 Man̈xo toc tzin naꞌ, icha val to ayinecꞌ dꞌa yol carruaje yedꞌ vin̈ vajalil, xchi ix.
Syalan ebꞌ amigo:
13 Meltzajan̈, meltzajan̈ ach Sulamita. Meltzajan̈, snibꞌej co cꞌol tzon̈ och qꞌuelan dꞌayach, xchi ebꞌ.
Syalan ix cobꞌes:
¿Tas yuj tze nibꞌej tzeyil in chan̈alvi dꞌa scal snan̈al cha tzol anima tic? xchi ix Sulamita chiꞌ.