Syalan vin̈ quelem:
5
Van voch dꞌa scal vavbꞌen ach vetbꞌeyum xajanabꞌil vuuj. Van vicꞌanqꞌue in mirra yedꞌ in perfume, van vabꞌlan schabꞌil nocꞌ acan̈, van vucꞌan in vino yedꞌ in lech, xchi vin̈.Syalan ebꞌ amigo dꞌa ebꞌ chavan̈:
Ex amigo vaan̈ec, uqꞌuec aꞌ, uqꞌuec jantac tze nibꞌej, xchi ebꞌ.
Yic schan̈il macan̈
Syalan ix cobꞌes:
2 Vaynac in bꞌati, palta pitzan in pixan, ix vabꞌani to a vin̈ xajanabꞌil vuuj tzꞌavaj dꞌa puerta: Ach cobꞌes xajanabꞌil vuuj, jaquin ochi. Lajan ach icha nocꞌ paramuch, malaj jabꞌoc a paltail. Te chꞌayan in jolom yuj yal acꞌval. Tzꞌel val jililjoc yal acꞌval chiꞌ dꞌa xil in jolom, xchi vin̈ dꞌayin.
3 Toxo ix viqꞌuel in pichul, ¿tom ol vacꞌoch junelxo? Toxo ix in bꞌic voc, ochtapax pococ dꞌay junelxo, xin chi dꞌa vin̈.
4 A vin̈ xajanabꞌil vuuj chiꞌ, ix yacꞌochta scꞌabꞌ vin̈ dꞌa yolanil puerta. Ix in qꞌue val jucnaj yuuj.
5 Yuj chiꞌ ix in qꞌue vaan in jacochta vin̈. Toxon̈ej ix el dꞌujuljoc mirra dꞌa in cꞌabꞌ, ix ochcan dꞌa spatictac schꞌapul puerta.
6 A val yic ix vabꞌan slolon vin̈, ijan ix in cham ix vabꞌi. Ayic ix in jacan puerta dꞌa vin̈ xajanabꞌil vuuj chiꞌ, man̈xo ayoc ecꞌlaj vin̈. Ix in sayecꞌ vin̈, majxo chaxlaj vin̈ vuuj. Ix vavtej vin̈, palta majxo tacꞌvoclaj vin̈ dꞌayin.
7 Ix in ilchajel yuj ebꞌ vin̈ stan̈van chon̈abꞌ. Ix in smacꞌan lajvoc ebꞌ vin̈. Te chucxon̈ej ix aj yicꞌanel in xotil ebꞌ vin̈ stan̈van spuertail chon̈abꞌ chiꞌ.
8 Ex cobꞌestac aj Jerusalén, aqꞌuec e tiꞌ: Tato tzꞌilchaj vin̈ in xajanabꞌil eyuuj, alec dꞌa vin̈ to van in cham in naan vin̈, xin chi dꞌa ebꞌ ix.
9 Ix yalan ebꞌ ix cobꞌestac chiꞌ dꞌayin: ¿Tas svachꞌil vin̈ a xajanabꞌil chiꞌ dꞌayach, ach ix te vachꞌ ilji dꞌa yichan̈ ebꞌ ix ix vachꞌ yilji? ¿Tas val svachꞌil jun vin̈ xajan chiꞌ uuj, yuj chiꞌ tza cꞌan dꞌayon̈ to scacꞌ co tiꞌ? xchi ebꞌ ix dꞌayin.
10 A vin̈ xajanabꞌil vuuj chiꞌ, sac vin̈, chacvasinac yilji vin̈, te vachꞌ yilji vin̈ dꞌa yichan̈ lajun̈eꞌ mil vinac.
11 A sat vin̈, lajan yedꞌ qꞌuen oro te vachꞌ. A xil sjolom vin̈ colochtac, qꞌuicꞌ yilji icha nocꞌ joj.
12 A yol sat vin̈, lajan icha nocꞌ paramuch tzꞌecꞌ dꞌa titac aꞌ, ichato dꞌa scal lech tzꞌachanvi nocꞌ, dꞌa stiꞌ sn̈ajabꞌil a aꞌ chiꞌ tzꞌem man̈an nocꞌ.
13 A spacꞌultac stiꞌ vin̈, icha val junoc avbꞌen bꞌaj ay an̈ xumac te vachꞌ sjabꞌ. A stiꞌ vin̈, lajan val icha junoc an̈ xumac te vachꞌ sjabꞌ.
14 A scꞌabꞌ vin̈, lajan icha junoc suyan̈ qꞌuen oro ayoch qꞌuen topacio dꞌay. A scꞌool vin̈, icha val qꞌuen marfil n̈ululixon̈ej, te ayoch qꞌuen zafiro yelvanubꞌoc.
15 A val yoc vin̈, lajan val icha chabꞌoc oy nabꞌa mármol ayem dꞌa yibꞌan̈ chabꞌoc yich to nabꞌa oro te vachꞌ. Lajan yilji vin̈ icha teꞌ cꞌuteꞌ ay dꞌa Líbano, to sicꞌbꞌileli.
16 A val slolonel vin̈ syalaꞌ, te chiꞌ scabꞌi, te vachꞌn̈ej vin̈ dꞌa smasanil. Icha val chiꞌ yilji vin̈ in xajanabꞌil chiꞌ ex cobꞌestac aj Jerusalén, xin chi dꞌa ebꞌ ix.