Syalan vin̈ quelem:
4
Te vachꞌ ilji ach xajanabꞌil vuuj, yelxo val te vachꞌ ilji. A yol a sat chequel dꞌa spatic smusil a sat lajan yilji icha yol sat nocꞌ paramuch. A xil a jolom, lajan val yilji icha yemta n̈ililoc nocꞌ chiva dꞌa pacꞌan yic Galaad.2 Axo qꞌuen e, te vachꞌ yilji qꞌueen, lajan yilji qꞌuen icha yilji nocꞌ calnel sbꞌicji ayic toxo sjoxji. Tzꞌacan qꞌueen, malaj junoc qꞌueen malaj yetbꞌeyum, icha nocꞌ nun calnel junn̈ej sbꞌey yedꞌ yuneꞌ.
3 Chactzꞌobꞌinac a tiꞌ icha chacchac chꞌal. Sat in cꞌool yuj svachꞌil a loloni. Axo spacꞌultac a tiꞌ musan yuj junoc cꞌapac, icha val yilji cꞌaxepoc teꞌ granada.
4 A val a jaj, lajan val icha torre bꞌobꞌil yuj vin̈aj rey David, locjabꞌoch mil maclabꞌ jul-labꞌ yic ebꞌ soldado jelan dꞌa spatictac yelvanubꞌoc.
5 A im schabꞌil, lajan val yilji icha chavan̈oc yunetac chꞌucul tiox sva dꞌa scaltac an̈ chochol.
6 Yacbꞌan manta icꞌ dꞌa qꞌuin̈ibꞌalil, ayic manto sacbꞌi, ol in bꞌat dꞌa jolomtac vitz bꞌaj ay an̈ mirra, dꞌa tzalquixtac bꞌaj sucꞌuqꞌui sjabꞌ.
7 Te vachꞌ ilji ach xajanabꞌil vuuj, te vachꞌ yilji a nivanil smasanil, te malaj jabꞌoc a paltail.
8 Ach to ol ach och vetbꞌeyumoc, con̈ el dꞌa Líbano, con̈ el dꞌa jolom vitz Líbano. Ol co puclaj co bꞌa yedꞌ jolom vitz Amana tic, yedꞌ jolom vitz Senira. Ol cactejcan vitz Hermón, bꞌaj ay sn̈aqꞌueen nocꞌ choj yedꞌ bꞌaj ay nocꞌ leopardo.
9 Ach xajanabꞌil vuuj, ol ach och vetbꞌeyumoc, toxo ix can in gana dꞌayach, yujn̈ej to ix ach cot qꞌuelan junel dꞌayin, ix vilan jun chꞌan̈al ton̈ locanoch dꞌa a jaj. Juneln̈ej ix mutzꞌmutzꞌan a sat dꞌayin. Icha chiꞌ ix aj yicꞌji in pixan uuj.
10 Ach ix ol ach och vetbꞌeyumoc, man̈ jantacoc svachꞌil in a xajanani, yelxo te vachꞌ dꞌa yichan̈ vino. Yelxo te vachꞌ a perfume tza cꞌan dꞌa yichan̈ masanil tas sumumi sjabꞌ.
11 Ach ol ach och vetbꞌeyumoc, icha yalchabꞌ ayoch dꞌa a tiꞌ, icha val yalchabꞌ yedꞌ lech ay dꞌa yol a tiꞌ. Icha sucꞌuqꞌuial sjabꞌ Líbano, icha val chiꞌ sjabꞌ a pichul.
12 Ach ol ach och vetbꞌeyumoc, lajan ach icha junoc avbꞌen macan, icha sjaj a aꞌ to macan, te vachꞌ yaj smacchaji.
13 Lajan ach icha junoc avbꞌen bꞌaj svolan teꞌ granado, a sat tas avabꞌil taꞌ man̈ jantacoc schiꞌal, ay pax an̈ alheña,
14 an̈ nardo, an̈ azafrán yedꞌ juntzan̈ te valeꞌ sucꞌuqꞌui sjabꞌ, teꞌ canela yedꞌ masanil macan̈il teꞌ incienso, mirra yedꞌ pax áloes, masanil tastac te vachꞌ yel sjabꞌ.
15 Lajan ach pax icha sjaj a aꞌ dꞌa scal tas avabꞌil, aton aꞌ sqꞌueul sjaj tzꞌemta dꞌa Líbano, xchi vin̈.
16 A icꞌ scot dꞌa stojolal norte yedꞌ icꞌ scot dꞌa stojolal sur, ecꞌocabꞌ xumumoc dꞌa scal vavbꞌen, yic vachꞌ sbꞌeybꞌat sucꞌuqꞌuial sjabꞌ.
Syalan ix cobꞌes:
Cotan̈ ach xajanabꞌil vuuj, ochan̈ dꞌa vavbꞌen, tza loan sat tas avabꞌil man̈ jantacoc schiꞌal, xchi ix.