3
A dꞌa sat in chꞌat dꞌacꞌvalil, ix in vayichej in sayanecꞌ vin̈ xajanabꞌil vuuj. Ix in sayecꞌ vin̈, palta maj ilchaj vin̈ vuuj.2 Slajvi chiꞌ, ix in qꞌue vaan, ix in ecꞌ in say vin̈ dꞌa yol chon̈abꞌ chiꞌ. Tzin sayanecꞌ vin̈ xajanabꞌil vuj dꞌa yoltac calle yedꞌ dꞌa yoltac mercado. Ix in sayn̈ej vin̈, palta maj ilchaj vin̈ vuuj.
3 Ix in cꞌanbꞌan dꞌa ebꞌ policía tzꞌecꞌ stan̈vej chon̈abꞌ chiꞌ: ¿Maj am eyil vin̈ xajanabꞌil vuuj? xin chi.
4 Quenanto val tzin bꞌat dꞌa ebꞌ vin̈ chiꞌ, ix ilchaj vin̈ xajanabꞌil vuuj. Ix in och quetzquetz dꞌa scꞌabꞌ vin̈, majxo vactejel-laj vin̈. Ix vicꞌanbꞌat vin̈ dꞌa spat ix in nun, dꞌa scuarto ix in nun chiꞌ bꞌaj in alji, xchi ix.
Syalan vin̈ quelem.
5 Ex cobꞌestac aj Jerusalén, tzin tevi val dꞌayex to man̈ e pitzel svayan̈ ix xajanabꞌil vuuj, munil ol el svayan̈ ix, xchi vin̈.
Yoxil macan̈
Syalan ebꞌ anima
6 ¿Tas jun scot dꞌa tzꞌinan lum chiꞌ, dꞌa scal jun topan̈ tabꞌ scoti, aton dꞌa scal stabꞌil mirra yedꞌ incienso yedꞌ masanil macan̈ sucꞌuqꞌui sjabꞌ chon̈bꞌil yuj ebꞌ chon̈vajum?
7 Aton bꞌaj sbꞌachchajecꞌ vin̈aj Salomón. Oyanoch 60 soldado dꞌa spatic, aton val juntzan̈ ebꞌ vin̈ soldado te jelan dꞌa scal ebꞌ israel.
8 Masanil juntzan̈ ebꞌ vin̈ chiꞌ, a qꞌuen espada syacꞌlabꞌej ebꞌ vin̈, te jelan ebꞌ vin̈ dꞌa oval. Junjun ebꞌ vin̈ ayoch yespada dꞌa snan̈al, tato ay tas ay smay tzꞌecꞌ dꞌacꞌvalil.
9 A vin̈aj Salomón ix sbꞌo jun bꞌaj sbꞌachchajecꞌ dꞌa te teꞌ vachꞌ ay dꞌa Líbano.
10 A yoyal, nabꞌa plata, axo yijnubꞌ yich, nabꞌa oro. A bꞌaj tzꞌem cꞌojan vin̈, a an̈ púrpura ayoch dꞌay. Dꞌa yol chiꞌ ayoch yelvanubꞌ bꞌobꞌil yuj ebꞌ ix aj Jerusalén, yuj schꞌoxani to xajan vin̈ yuj ebꞌ ix.
11 Ex ix aj Sion, elan̈ecbꞌat eyil vin̈aj rey Salomón. Ayqꞌue scorona vin̈, aton jun ix yacꞌqꞌue ix snun vin̈ dꞌa sjolom dꞌa scꞌual snupnaji, aton jun cꞌu bꞌaj ix te tzalaj scꞌol vin̈, xchi ebꞌ.