Syalan ix cobꞌes:
2
Lajan in icha junoc an̈ xumac dꞌa schꞌolanil yic Sarón, icha an̈ chochol sqꞌuibꞌ dꞌa acꞌlic, xchi ix.Syalan vin̈ quelem:
2 Dꞌa scal ebꞌ ix yetixal ix xajanabꞌil vuuj, lajan ix icha junoc an̈ xumac dꞌa scal teꞌ qꞌuiix, xchi vin̈.
Syalan ix cobꞌes:
3 Dꞌa scal ebꞌ yetquelemal vin̈ xajanabꞌil vuuj, lajan vin̈ icha junoc teꞌ mansan ay dꞌa caltac teꞌ. Man̈ jantacoc svachꞌil vem cꞌojan dꞌa yen̈ul, te chiꞌ sat teꞌ svabꞌi.
4 Ix in yicꞌbꞌat vin̈ dꞌa spatil nivac vael, dꞌa smasanil scꞌol vin̈ ix schꞌoxoꞌ to xajan in yuuj.
5 Acꞌ teꞌ taquin̈ sat uva dꞌayin yic tzꞌoch vip, a val teꞌ mansan tzacꞌ in lo yic sicbꞌi in cꞌool, yujto tzin cham ach in nibꞌani.
6 A scꞌabꞌ vin̈ dꞌa sqꞌuexan̈ syacꞌoch dꞌa yalan̈ in jolom, axo svachꞌ vin̈ tzin lacꞌanqꞌuei, xchi ix.
Syalan vin̈ quelem:
7 Ex cobꞌestac aj Jerusalén, tzin tevi val dꞌayex to man̈ e pitzel svayan̈ ix xajanabꞌil vuuj, munil ol el svayan̈ ix, xchi vin̈.
Schabꞌil macan̈
Syalan ix cobꞌes:
8 A... van sjavi vin̈ xajanabꞌil vuuj. Tzaxo vabꞌ yoch sjaj vin̈. Sqꞌue val chennaj vin̈ scot dꞌa jolomtac vitz. Sqꞌue val chennaj vin̈ sjavi dꞌa tzalquixtac.
9 A vin̈ xajanabꞌil vuuj, lajan vin̈ icha nocꞌ chꞌucul, icha val junoc yuneꞌ chꞌucul chiꞌ. Ayxoecꞌ vin̈ dꞌa patic pat tic, dꞌan̈anxooch vin̈ dꞌa yolanil ventena.
10 A vin̈ xajanabꞌil vuuj chiꞌ, ix yal vin̈ dꞌayin icha tic: Qꞌuean̈ vaan ach xajanabꞌil vuuj, cotan̈ ach nibꞌabꞌil vuuj.
11 Inai, toxo ix ecꞌbꞌat scꞌual sicn̈abꞌ.
12 Ayxo an̈ xumac dꞌa caltac teꞌ, toxo ix cꞌoch stiempoal yoch bꞌit, tzaxo cabꞌ yoch sjaj nocꞌ cuvajteꞌ dꞌa tic.
13 Ayxo sat teꞌ higo, sumumi yel sjabꞌ teꞌ uva.
Qꞌuean̈ vaan ach xajanabꞌil vuuj,
ach to te vachꞌ ilji, cotan̈, xchi vin̈ dꞌayin, xchi ix.
Syalan vin̈ quelem:
14 Ach xajanabꞌil vuuj, lajan ach icha nocꞌ paramuch scꞌubꞌej sbꞌa dꞌa sattac qꞌueen. Chꞌox a sat vilaꞌ, lolonan̈ jabꞌoc vabꞌi, yujto te vachꞌtzin a loloni, te vachꞌpax ilji.
15 Pechec nocꞌ vaax yedꞌ nocꞌ yuneꞌ, to syixtej teꞌ cuva nocꞌ, icha teꞌ vanto yacꞌan xumaquil, xchi vin̈.
Syalan ix cobꞌes:
16 Yic in vin̈ xajanabꞌil vuuj, vic pax vin̈, stan̈vi calnel vin̈ dꞌa scal an̈ xumac.
17 Yacbꞌan manta icꞌ dꞌa qꞌuin̈ibꞌalil, ayic manto sacbꞌi, meltzajan̈cot dꞌayin ach xajanabꞌil vuuj. Lajan tzutej a bꞌa icha junoc nocꞌ chꞌucul, icha nocꞌ quelem chꞌucul toxon̈ej sqꞌue chennaj scot dꞌa tzalquixtac, xchi ix.