A Chꞌan̈ Libro
SBꞌITAL VIN̈AJ SALOMÓN
1
A juntzan̈ sbꞌit vin̈aj Salomón, man̈xo jantacoc svachꞌil yalji.Bꞌabꞌel bꞌit
Syalan ix cobꞌes:
2 Ach quelem xajanabꞌil vuuj, tzꞌubꞌelta jabꞌoc in tiꞌ. Te vachꞌ svabꞌ dꞌa yichan̈ yal uva.
3 Te vachꞌ yel a jabꞌ yuj yal sucꞌuqꞌui sjabꞌ ayoch dꞌayach. Ayic svabꞌan a bꞌinaji, lajan val icha sucꞌuqꞌui sjabꞌ chiꞌ. Yuj chiꞌ te xajan ach yuj ebꞌ ix ix.
4 Iqꞌuinbꞌat dꞌa a pat ach in reyal, iqꞌuinbꞌat edꞌoc elan̈chamel, xchi ix.
Syalan ebꞌ anima:
Te tzalajcꞌolal cajecꞌ edꞌoc, ol co nacot bꞌaj tzon̈ a xajanej yujto te vachꞌ dꞌa yichan̈ yal uva. Tobꞌan yuj chiꞌ te xajan ach yuj ebꞌ ix ix tic, xchi ebꞌ.
Syalan ix cobꞌes:
5 Ex ix aj Jerusalén, a in tic qꞌuicꞌ chꞌuminac vilji, palta te vachꞌ vilji. Qꞌuicꞌocabꞌ vilji icha yilji smantiado ebꞌ aj Cedar, palta te vachꞌ vilji icha yilji cꞌapac cortina ayoch dꞌa yol spat vin̈aj Salomón.
6 Man̈ ex och val qꞌuelan dꞌayin, yujto qꞌuicꞌ chꞌuminac vilji, yujto tzꞌanac in nivanil yuj yoc cꞌu. A ebꞌ vin̈ in nulej ix cot yoval ebꞌ vin̈ dꞌayin, ix in yacꞌanoch ebꞌ vin̈ tan̈voj uva, axo ix aji, maj in yaꞌilej in bꞌa.
7 Ach quelem xajanabꞌil vuuj, al dꞌayin ¿bꞌajtil tza tan̈vej nocꞌ a calnel? ¿Bꞌajtil tzicꞌbꞌat nocꞌ yicꞌ yip dꞌa chimcꞌualil? ¿Tas yuj ol in satecꞌ ach in say dꞌa scal juntzan̈xo ebꞌ tan̈vum calnel? xchi ix.
Syalan ebꞌ anima:
8 Tato man̈ ojtacoc ach ix te vachꞌ ilji dꞌa scal ebꞌ ix ix vachꞌ yilji, ochan̈ tzacꞌan yuj yoclem nocꞌ calnel chiꞌ. Tan̈vej va nocꞌ yunetac a chiva dꞌa slacꞌanil slechpat ebꞌ vin̈ tan̈vum calnel chiꞌ, xchi ebꞌ.
Syalan vin̈ quelem:
9 Ach cobꞌes xajanabꞌil vuuj, te vachꞌ ilji svilaꞌ, icha val yilji nocꞌ cobꞌes chej stocꞌan scarruaje vin̈ sreyal Egipto.
10 Te vachꞌ yilji spacꞌultac a tiꞌ dꞌa scal qꞌuen uchiquin, te vachꞌ pax yilji a jaj bꞌaj ayoch qꞌuen a ton̈.
11 Ol co bꞌo qꞌuen uchiquin nabꞌa oro, ol cacꞌoch qꞌuen plata yelvanubꞌoc, xchi vin̈.
Syalan ix cobꞌes:
12 Yacbꞌan cꞌojanem vin̈ rey dꞌa smexa, axo an̈ nardo sumumi yel sjabꞌ dꞌayin.
13 Ach quelem xajanabꞌil vuuj, lajan ach val icha junoc yubꞌan̈ teꞌ mirra sucꞌuqꞌui sjabꞌ ayecꞌ dꞌa scal vim.
14 Ach xajanabꞌil vuuj, lajan ach icha junoc yubꞌan̈ xumaquil te alheña sqꞌuibꞌ dꞌa scal teꞌ uva avabꞌil dꞌa En-gadi, xchi ix.
Syalan vin̈ quelem:
15 Te vachꞌ ilji ach cobꞌes xajanabꞌil vuuj, val yel te vachꞌ ilji. Lajan svachꞌil yilji yol a sat icha yilji yol sat nocꞌ paramuch, xchi vin̈.
Syalan ix cobꞌes:
16 Te vachꞌ ilji ach quelem xajanabꞌil vuuj, val yel te vachꞌ ilji. A val an̈ yax an̈cꞌultac ol och co vaynubꞌoc, xchi ix.
Syalan vin̈ quelem:
17 A spatzabꞌil co pat ayochi nabꞌa a teꞌ cꞌuteꞌ, axo teꞌ tzicap ayoch dꞌa yibꞌan̈, xchi vin̈.