2 Ix in yicꞌanelta vin̈, ix yalan vin̈ dꞌayin icha tic: A Jehová a Diosal ix alani to ol yacꞌcot jun nivan yaelal tic dꞌa yibꞌan̈ jun chon̈abꞌ tic. 3 A ticnaic toxo ix yaqꞌuelcꞌoch tas ix yal chiꞌ. Ix yacꞌcot juntzan̈ tic dꞌa eyibꞌan̈, yujto maj e cꞌanabꞌajej tas ix yalaꞌ. 4 A ticnaic, ol viqꞌuel qꞌuen cadena tic dꞌayach. Tato a gana tzach bꞌat vedꞌ dꞌa Babilonia, syalaꞌ, a in ol ach in ya ilej. Tato malaj a gana tzach bꞌat jun, canan̈ dꞌa tic. Bꞌecan yaj masanil lum luum tic dꞌayach, syal a sicꞌlan bꞌaj snibꞌej a cꞌol tzach cani, xchi vin̈ dꞌayin. 5 Ayic manto in tacꞌvoclaj dꞌa vin̈, ix yalanxi vin̈ icha tic: Vachꞌ tzach meltzaj bꞌaj ayecꞌ vin̈aj Gedalías yuninal vin̈aj Ahicam, yixchiquin vin̈aj Safán, aton vin̈ chiꞌ ix yacꞌoch vin̈ sreyal Babilonia gobernadoral dꞌa Judá, tzach cajnaj yedꞌ vin̈ dꞌa scal ebꞌ etchon̈abꞌ. Syal pax a bꞌat bꞌaj a gana, xchi vin̈ dꞌayin. Ix lajvi chiꞌ ix yacꞌan jun silabꞌ yedꞌ jabꞌoc vael vin̈ dꞌayin, ix yalan quil co bꞌa vin̈ dꞌayin. 6 Icha chiꞌ ix aj in bꞌatcan dꞌa vin̈aj Gedalías dꞌa chon̈abꞌ Mizpa. Ix in cajnaj yedꞌ vin̈ dꞌa scal ebꞌ anima ixto can yuj vin̈aj Nabucodonosor chiꞌ.

7 Ay ebꞌ vin̈ yajalil ebꞌ soldado aj Judá scꞌubꞌejnaccanel sbꞌa dꞌa caltac teꞌ dꞌa ebꞌ soldado aj Babilonia. Ix yabꞌan ebꞌ vin̈ to a vin̈aj Gedalías yuninal vin̈aj Ahicam ix acꞌjioch gobernadoral yuj vin̈ sreyal Babilonia chiꞌ. A vin̈ ix och yajaliloc ebꞌ vin̈ vinac, ebꞌ ix ix, ebꞌ unin yedꞌ ebꞌ mebꞌaꞌ, aton ebꞌ maj icꞌjocbꞌatlaj dꞌa Babilonia chiꞌ. 8 Yuj chiꞌ ix bꞌat ebꞌ vin̈ yil vin̈ dꞌa Mizpa chiꞌ, aton ebꞌ vin̈ tic: Vin̈aj Ismael yuninal vin̈aj Netanías, vin̈aj Johanán yedꞌ vin̈aj Jonatán, aton ebꞌ vin̈ yuninal vin̈aj Carea, vin̈aj Seraías yuninal vin̈aj Tanhumet yedꞌ jayvan̈ ebꞌ vin̈ yuninal vin̈aj Efai aj Netofa, vin̈aj Jezanías yuninal jun vin̈ aj Maacat, ajun ebꞌ vin̈ soldado ebꞌ vin̈ yedꞌoc. 9 Ix yacꞌan stiꞌ vin̈aj Gedalías dꞌa ebꞌ vin̈, ix yalan vin̈ icha tic: Man̈ ex xiv eyacꞌanoch e bꞌa dꞌa yol scꞌabꞌ ebꞌ aj Babilonia chiꞌ. Cajnajan̈ec dꞌa tic. Aqꞌuecoch e bꞌa dꞌa yol scꞌabꞌ vin̈ sreyal Babilonia chiꞌ yic malaj tas ol ex icꞌanoc. 10 A in tic ol in can dꞌa Mizpa tic, yic vachꞌ a in ol ex vacꞌ checlaj dꞌa yichan̈ ebꞌ aj Babilonia chiꞌ, ayic ol javoc ebꞌ dꞌa tic. A ex tic, molbꞌejec sat teꞌ uva yedꞌ sat teꞌ avbꞌen teꞌ yedꞌ aceite. Icha chiꞌ ol ex cann̈ej dꞌa juntzan̈ chon̈abꞌ toxo ix eyicꞌ chiꞌ, xchi vin̈ dꞌa ebꞌ vin̈. 11 An̈ejtonaꞌ jantac ebꞌ aj Judá aybꞌat dꞌa Moab, dꞌa Amón, dꞌa Edom yedꞌ dꞌa juntzan̈xo nación, ix yabꞌan ebꞌ to ayto anima ix can yuj vin̈ sreyal Babilonia dꞌa Judá. Ix yabꞌanpax ebꞌ to a vin̈aj Gedalías yuninal vin̈aj Ahicam, yixchiquin vin̈aj Safán ix acꞌjioch gobernadoral. 12 Masanil ebꞌ sacleminac yajcanbꞌat chiꞌ, ix meltzajxi ebꞌ dꞌa Judá. Ix javi ebꞌ schꞌox sbꞌa dꞌa vin̈aj Gedalías dꞌa Mizpa chiꞌ. Ix lajvi chiꞌ ix smolbꞌan sat teꞌ uva ebꞌ yedꞌ juntzan̈xo sat teꞌ avbꞌen teꞌ.

13 A vin̈aj Johanán yuninal vin̈aj Carea yedꞌ juntzan̈xo ebꞌ vin̈ yajal soldado ix can dꞌa caltac teꞌ chiꞌ, ix cꞌoch ebꞌ vin̈ dꞌa vin̈aj Gedalías dꞌa Mizpa chiꞌ, 14 ix yalan ebꞌ vin̈ dꞌa vin̈ icha tic:

—¿Ix am abꞌi to a vin̈aj Baalis sreyal Amón ix checancot vin̈aj Ismael yuninal vin̈aj Netanías yic tzach smilanchamoc? xchi ebꞌ vin̈.

Palta a vin̈aj Gedalías chiꞌ, maj schalaj vin̈ dꞌa ebꞌ vin̈. 15 Yuj chiꞌ dꞌa cꞌubꞌeltac ix yal vin̈aj Johanán dꞌa vin̈aj Gedalías chiꞌ:

—Cha in bꞌati yic bꞌat in milcham vin̈aj Ismael chiꞌ. Malaj junoc mach ol ojtacaneloc mach ix milancham vin̈. ¿Tas yuj ol ach co cha smilcham vin̈? Tato ol ach cham yuj vin̈, ol saclemcanbꞌat masanil ebꞌ ayxoecꞌ tic edꞌoc, axom somchajbꞌat ebꞌ toxo ix can dꞌa Judá tic junelxo, xchi vin̈.

16 Ix tacꞌvi vin̈aj Gedalías chiꞌ dꞌa vin̈ icha tic:

—Man̈ a naꞌ icha chiꞌ. A tas tzꞌalchaj dꞌa spatic vin̈aj Ismael chiꞌ, man̈ yeloclaj, xchi vin̈.