Ix miljicham vin̈aj Gedalías
41
A dꞌa yuquil uj ix bꞌat vin̈aj Ismael yuninal vin̈aj Netanías yedꞌ lajun̈van̈ soldado dꞌa Mizpa yic bꞌat lolon ebꞌ vin̈ yedꞌ vin̈aj Gedalías chiꞌ, junn̈ej ix va ebꞌ vin̈ yedꞌ vin̈. (A vin̈aj Ismael chiꞌ, yixchiquin pax vin̈ vin̈aj Elisama, yin̈tilal ebꞌ vin̈ rey, nivan yopisio vin̈ dꞌa vin̈ sreyal Judá dꞌa yalan̈taxo.) 2 Yacbꞌan van sva ebꞌ vin̈, ix qꞌue vaan vin̈aj Ismael yedꞌ ebꞌ vin̈ lajun̈van̈ ajun yedꞌ chiꞌ, ix smilancham vin̈aj Gedalías chiꞌ ebꞌ vin̈ dꞌa qꞌuen espada, aton vin̈ ix acꞌjioch gobernadoral dꞌa Judá yuj vin̈ sreyal Babilonia. 3 Ix smilanpaxcham masanil ebꞌ aj Judá yedꞌ ebꞌ soldado aj Babilonia ayecꞌ yedꞌ vin̈aj Gedalías vin̈aj Ismael chiꞌ.4 Axo dꞌa junxo cꞌu, ayic toxo ix cham vin̈aj Gedalías chiꞌ, manta mach tzꞌojtacanel tas ix uji chiꞌ, 5 ix cꞌoch 80 ebꞌ vin̈ vinac spetoj dꞌa Siquem, dꞌa Silo yedꞌ dꞌa Samaria. Toxo ix sjoxel xil stiꞌ ebꞌ vin̈, tzilchimtac spichul ebꞌ vin̈ ayochi, axo snivanil ebꞌ vin̈ echentac yaji, munil a ebꞌ vin̈ icha chiꞌ ix yutej sbꞌa. Yedꞌnac ixim trigo ebꞌ vin̈ yedꞌ incienso yic syacꞌ ebꞌ vin̈ silabꞌil dꞌa Jehová dꞌa templo. 6 A dꞌa Mizpa chiꞌ ix elta vin̈aj Ismael chiꞌ ul scha ebꞌ vin̈, van stzꞌacan ocꞌ sbꞌa vin̈, axo yic ix schalan sbꞌa vin̈ yedꞌ ebꞌ vin̈, ix yalan vin̈ dꞌa ebꞌ vin̈ icha tic:
—Cotan̈ec, ul ilec vin̈aj Gedalías yuninal vin̈aj Ahicam, xchi vin̈.
7 Palta an̈ej yic ix cꞌoch ebꞌ vin̈ vinac chiꞌ dꞌa snan̈al chon̈abꞌ chiꞌ, ix miljicham ebꞌ vin̈ yuj vin̈aj Ismael chiꞌ yedꞌ ebꞌ ajun yedꞌ vin̈. Ix yumjicanbꞌat snivanil ebꞌ vin̈ dꞌa yol jun nivan jul yedꞌtal aꞌ. 8 Palta ay lajun̈van̈ ebꞌ vin̈ dꞌa scal ebꞌ vin̈ van smiljicham chiꞌ ix alan dꞌa vin̈aj Ismael chiꞌ:
—Man̈ on̈ a milchamoc, a on̈ tic ay ixim co trigo, ixim cebada, co aceite, ay pax nocꞌ co yal chabꞌ. A juntzan̈ chiꞌ cꞌubꞌanel cuj dꞌa spatictaquel co chon̈abꞌ, xchi ebꞌ vin̈.
Yuj chiꞌ majxo miljoccham ebꞌ vin̈ yuj vin̈aj Ismael yedꞌ ebꞌ ajun yedꞌ vin̈. 9 (A jun jul bꞌaj ix acꞌjiem snivanil ebꞌ vin̈ ix smilcham vin̈aj Ismael chiꞌ, aton jun schecnac vin̈aj rey Asa joychajoc, yic scolannac sbꞌa vin̈ dꞌa vin̈aj Baasa sreyal Israel. A jun jul chiꞌ te levan, palta ix bꞌudꞌji yuj snivanil ebꞌ anima ix smilcham vin̈aj Ismael chiꞌ.) 10 Ix yicꞌanbꞌat ebꞌ ix yisil vin̈ rey vin̈aj Ismael chiꞌ yedꞌ ebꞌ anima ayecꞌ dꞌa Mizpa chiꞌ, aton ebꞌ ix acꞌji stan̈vej vin̈aj Gedalías yuj vin̈aj Nabuzaradán. Ix icꞌjibꞌat ebꞌ yuj vin̈, yic sbꞌatcan ebꞌ dꞌa yol smacbꞌen Amón presoal.
11 Axo yic ix yabꞌan vin̈aj Johanán yuninal vin̈aj Carea yedꞌ ebꞌ yajalil soldado ayecꞌ yedꞌoc, yuj jantac chucal ix scꞌulej vin̈aj Ismael chiꞌ, 12 ix smolbꞌan masanil ebꞌ soldado ebꞌ vin̈, ix bꞌat ebꞌ vin̈ yacꞌ oval yedꞌ vin̈aj Ismael chiꞌ. A bꞌaj ay jun nivan yedꞌtal aꞌ dꞌa Gabaón, ataꞌ ix ilchaj vin̈ yuj ebꞌ vin̈. 13 Axo ebꞌ van yicꞌjibꞌat icha presoal yuj vin̈aj Ismael chiꞌ, ayic ix yilan vin̈aj Johanán chiꞌ ebꞌ yedꞌ ebꞌ vin̈ yajalil ebꞌ soldado ajun yedꞌ vin̈, ix te tzalaj ebꞌ. 14 Ix meltzaj ebꞌ smasanil, ix yacꞌanoch sbꞌa ebꞌ yedꞌ vin̈aj Johanán chiꞌ. 15 Palta axo vin̈aj Ismael chiꞌ yedꞌ vajxacvan̈xo ebꞌ vin̈ ajun yedꞌoc, ix el lemnaj ebꞌ vin̈, ix bꞌatcan ebꞌ vin̈ dꞌa yol yic Amón.
16 A vin̈aj Johanán yedꞌ ebꞌ soldado chiꞌ ix icꞌanxicanecꞌ ebꞌ anima, ix coljipax ebꞌ yuj ebꞌ vin̈, aton ebꞌ cajan dꞌa Mizpa ix yicꞌbꞌat vin̈aj Ismael chiꞌ ayic ix lajvi smilancham vin̈aj Gedalías vin̈. A juntzan̈ ebꞌ anima chiꞌ, ay ebꞌ vin̈ soldado, ay ebꞌ ix ix, ay ebꞌ unin, ay pax ebꞌ nivac yopisio. Aton ebꞌ ix icꞌjixicanecꞌ dꞌa vin̈aj Ismael dꞌa Gabaón 17-18 yic sbꞌat ebꞌ elelal dꞌa Egipto yujto xivnac ebꞌ dꞌa ebꞌ aj Babilonia, yujto ix miljicham vin̈aj Gedalías, vin̈ ix sicꞌjioch gobernadoral yuj vin̈ sreyal Babilonia yuj vin̈aj Ismael. Ix bꞌatn̈ej ebꞌ, masanto ix cꞌoch ebꞌ dꞌa Gerut-quimam, dꞌa slacꞌanil Belén. Ataꞌ ix och vaan ebꞌ, yujto van sbꞌat ebꞌ dꞌa Egipto chiꞌ yalani.