Ix scꞌan slesal ebꞌ anima dꞌa vin̈aj Jeremías
42
Masanil ebꞌ vin̈ yajalil ebꞌ soldado ajun yedꞌ vin̈aj Johanán yuninal vin̈aj Carea yedꞌ pax vin̈aj Jezanías yuninal vin̈aj Osaías yedꞌ masanil ebꞌ anima, ebꞌ ay yelcꞌochi yedꞌ ebꞌ malaj yelcꞌochi, ix javi ebꞌ dꞌayin Jeremías schecabꞌ in Dios tic. 2 Ix yalan ebꞌ icha tic:—Ay val jun tas ol co cꞌan dꞌayach ticnaic, man̈ a tenecꞌ dꞌayon̈: Lesalvan̈ dꞌa Jehová co Diosal cuj jayvan̈ on̈ ix on̈ can ic. A dꞌa yalan̈taxo, tzijtum co bꞌeyi, palta axo ticnaic axon̈ej jayvan̈ on̈ ayon̈ecꞌ tic on̈ cani. 3 Lesalvan̈ dꞌa Jehová co Diosal cuuj yic vachꞌ ol schꞌox dꞌayon̈ tas bꞌeal ol qꞌuicꞌaꞌ yedꞌ tas vachꞌ ol co cꞌulej, xchi ebꞌ.
4 Ix in tacꞌvi dꞌa ebꞌ, ix valan icha tic:
—Vachꞌ yaji. Ol in lesalvoc dꞌa Jehová co Diosal eyuuj, icha ix aj e cꞌanan chiꞌ dꞌayin. Jantacn̈ej tas ol yal Jehová dꞌayin a ol valxi dꞌayex. Malaj jabꞌoc tas ol in cꞌubꞌejeli, xin chi dꞌa ebꞌ.
5 Ix tacꞌvixi ebꞌ dꞌayin icha tic:
—Aocabꞌ Jehová chiꞌ testigo tzꞌajcan dꞌayon̈, tato man̈ ol co cꞌanabꞌajej tas ol yal chiꞌ dꞌayach. 6 Tato ol scha co cꞌol tas ol aj spacan Jehová co Diosal chiꞌ dꞌayach, mato man̈ ol scha co cꞌool, palta ol co cꞌanabꞌajejn̈ej tas ol yal chiꞌ. Scal dꞌayach to tza cꞌan dꞌay cuuj yic vachꞌ ol on̈ elcꞌochoc, xchi ebꞌ.
A spac slesal vin̈aj Jeremías
7 Sbꞌalun̈ilxo cꞌual chiꞌ, ichato chiꞌ ix lolon Jehová dꞌayin. 8 Yuj chiꞌ ix vavtejcot vin̈aj Johanán yedꞌ ebꞌ vin̈ yajal soldado yedꞌ masanil ebꞌ anima, ebꞌ nivac yelcꞌochi yedꞌ ebꞌ malaj yelcꞌochi. 9 Ix valan icha tic: A Jehová co Diosal a on̈ israel on̈ tic, bꞌaj ix in tevi yuj tas ix eyal dꞌayin, a tzꞌalan icha tic: 10 Tato tzex cajnajcan dꞌa jun lum tic, ol vacꞌbꞌat vachꞌilal dꞌa eyibꞌan̈, man̈xo ol ex in sateli. Ol vacꞌ qꞌuibꞌ e bꞌisul, man̈xo ol ex vacꞌ icꞌjocbꞌatoc. Yujto ya ix vabꞌ yuj jun nivan yaelal ix vacꞌbꞌat dꞌa eyibꞌan̈ tic. 11 A in Jehová in svalaꞌ: Man̈xo ex xiv dꞌa vin̈ sreyal Babilonia, aton vin̈ bꞌaj tzex te xivi. A ticnaic man̈xo ex xivoc, yujto ayinn̈ejecꞌ eyedꞌoc, ol ex in colel dꞌa yol scꞌabꞌ vin̈. 12 Ay val voqꞌuelcꞌolal dꞌayex. An̈ejtonaꞌ ol vacꞌ ocꞌ pax scꞌol jun vin̈ rey chiꞌ dꞌayex, ol ex yacꞌanxi meltzaj vin̈ dꞌa e chon̈abꞌ, xchi Jehová.
13 Palta tato max e cꞌanabꞌajej tas syal Jehová co Dios chiꞌ, tato tzeyal icha tic: Malaj co gana co can dꞌa jun chon̈abꞌ tic. 14 Ol on̈ bꞌat dꞌa Egipto. Ataꞌ ol on̈ cajnajoc, bꞌaj man̈xo ol quil oval, man̈xo ol cabꞌ yocꞌ qꞌuen trompeta, man̈xo ol on̈ cham yuj vejel, tato xe chi, 15 yuj chiꞌ abꞌec a ex ayex to can dꞌa Judá tic, tas val syal Jehová co Diosal Yajal dꞌa Smasanil: Tato tzex ecꞌ val dꞌa yibꞌan̈ e bꞌat dꞌa Egipto chiꞌ yic tzex cajnaj taꞌ e naani, 16 a oval yedꞌ vejel bꞌaj tzex xiv chiꞌ, ol cꞌoch dꞌayex taꞌ. Ataꞌ ol ex chamoc. 17 Masanil ebꞌ sbꞌat dꞌa Egipto yic scajnaj taꞌ, ol cham ebꞌ yuj oval, yuj vejel, yuj pax ilya. Malaj junoc mach man̈ ol chamoc, man̈xalaj mach ol yal scolan sbꞌa dꞌa yaelal ol vacꞌbꞌat taꞌ, xchi Jehová.
18 A Jehová Yajal dꞌa Smasanil, co Diosal, a tzꞌalan icha tic: Icha ix aj sja yoval in cꞌol dꞌa yibꞌan̈ ebꞌ cajan dꞌa Jerusalén, icha val chiꞌ ol aj sja pax yoval in cꞌol dꞌa eyibꞌan̈ a ex tic, tato ol ex bꞌat dꞌa Egipto chiꞌ. Ayic ol ex yilan ebꞌ anima dꞌa juntzan̈xo nación to icha sjavi dꞌa yibꞌan̈ ebꞌ catabꞌil, icha chiꞌ ol ex ajoc, ol xiv ebꞌ, ol ex bꞌuchjoc yuj ebꞌ. Man̈xa bꞌaqꞌuin̈ ol eyilxi jun e lum tic, xchi Jehová. 19 A ex aj Judá ex ixto ex can tic, a Jehová van yalan dꞌayex yic max ex bꞌat dꞌa Egipto chiꞌ. Ojtaquejequeli to a in van valan dꞌayex ticnaic, 20 te nivan e pitalil van eyacꞌanochi, yujto ix e chec in cꞌanbꞌej dꞌa Jehová co Diosal, ix eyalan dꞌayin icha tic: Lesalvan̈ dꞌa Jehová co Diosal cuuj. Ol acꞌan cojtaquejel masanil tas ol yalaꞌ, ol co cꞌanabꞌajani, xe chi. 21 Toxo ix vacꞌ eyojtaquejel tas ix yal Jehová co Diosal chiꞌ, palta max yal pax e cꞌol tze cꞌanabꞌajej. 22 Yuj chiꞌ, ojtaquejequeli to ol ex cham yuj oval, yuj vejel, yuj pax ilya dꞌa jun chon̈abꞌ bꞌaj e gana tzex bꞌatcan chiꞌ, xin chi dꞌa ebꞌ.