Bꞌatnac ebꞌ aj Judá dꞌa Egipto
43
Ayic ix lajvi valan masanil tas ix schec Jehová val dꞌa ebꞌ anima chiꞌ, 2 axo vin̈aj Jezanías yuninal vin̈aj Osaías, vin̈aj Johanán yuninal vin̈aj Carea yedꞌ pax juntzan̈xo ebꞌ vin̈ vinac te acꞌumtac, ix yalan ebꞌ vin̈ dꞌayin: Man̈ yeloc juntzan̈ lolonel tzal chiꞌ. Yujto a Jehová co Diosal maj yal-laj dꞌayach to max on̈ bꞌat dꞌa Egipto yic tzon̈ cajnaj taꞌ. 3 A vin̈aj Baruc yuninal vin̈aj Nerías, a vin̈ tzꞌalan juntzan̈ lolonel tic dꞌa co patic yic tzon̈ yacꞌoch vin̈ dꞌa yol scꞌabꞌ ebꞌ aj Babilonia chiꞌ, yic tzon̈ smilancham ebꞌ, ma on̈ yicꞌanbꞌat ebꞌ dꞌa Babilonia chiꞌ, xchi ebꞌ vin̈.4 Icha chiꞌ ix aj yoch spitalil vin̈aj Johanán yedꞌ ebꞌ vin̈ yajal soldado yedꞌ pax masanil ebꞌ anima. Maj canlaj ebꞌ dꞌa Judá icha ix aj yalan Jehová chiꞌ. 5 A ebꞌ aj Judá ix saclembꞌat dꞌa junjun nación, aton ebꞌ toxo ix smolbꞌejxi sbꞌa dꞌa Judá chiꞌ yic scajnajxi ebꞌ taꞌ, a vin̈aj Johanán chiꞌ yedꞌ ebꞌ vin̈ yajal soldado ix icꞌanbꞌat ebꞌ dꞌa Egipto. 6 Ix yicꞌanpaxbꞌat ebꞌ vin̈ vinac ebꞌ vin̈, ebꞌ ix ix, ebꞌ unin yedꞌ ebꞌ ix yisil vin̈ rey yedꞌ masanil ebꞌ ix acꞌjicanoch dꞌa yol scꞌabꞌ vin̈aj Gedalías yuj vin̈aj Nabuzaradán. Ix in yicꞌanpaxbꞌat ebꞌ vin̈ yedꞌ vin̈aj Baruc. 7 Man̈ jabꞌoc ix scꞌanabꞌajej ebꞌ tas ix yal Jehová. Ix on̈ bꞌat co masanil dꞌa Egipto chiꞌ. Ato dꞌa jun chon̈abꞌ scuch Tafnes ix on̈ cꞌoch cajan.
8 A dꞌa chon̈abꞌ Tafnes chiꞌ ix lolon Jehová dꞌayin, ix yalan icha tic: 9 Icꞌbꞌat jayeoc nivac qꞌueen, tza mucan dꞌa scal lum bꞌaqꞌuech lum dꞌa stiꞌ yamaqꞌuil spalacio ebꞌ vin̈ sreyal Egipto ay dꞌa jun chon̈abꞌ tic. Dꞌa yichan̈ ebꞌ etchon̈abꞌ chiꞌ tza muquem qꞌueen. 10 Tzalan dꞌa ebꞌ icha tic: A Jehová co Diosal a on̈ israel on̈ tic, Yajal dꞌa Smasanil, a tzꞌalani: Ol vicꞌcot vin̈aj Nabucodonosor in checabꞌ, vin̈ sreyal Babilonia, ol vacꞌ yaqꞌuem scꞌojnubꞌ vin̈, ol sbꞌoanqꞌue smantiado vin̈ yen̈uloc dꞌa yibꞌan̈ juntzan̈ qꞌuen qꞌueen ix a muquem tic. 11 Ol javoc vin̈, ol satanel Egipto tic vin̈. A mach yic yaj scham yuj ilya, a ilya chiꞌ ol icꞌan schami. A mach yic yaj yicꞌjibꞌat dꞌa chꞌoc chon̈abꞌil, ol icꞌjocn̈ejbꞌatoc. A mach yic yaj smiljicham dꞌa oval, dꞌa oval chiꞌ ol chamoc. 12 Ol sn̈usantzꞌa juntzan̈ stemplo sdiosal ebꞌ aj Egipto tic vin̈, ol yicꞌanbꞌat juntzan̈ scomon diosal ebꞌ chiꞌ vin̈. Icha junoc tan̈vum calnel pilan syiqꞌuel nocꞌ sip dꞌa spichul, icha chiꞌ ol yutej Egipto tic vin̈aj Nabucodonosor chiꞌ, pilan ol yicꞌbꞌat sbꞌeyumal vin̈, juncꞌolal ol meltzaj vin̈. 13 Ol juchajpaxem juntzan̈ obelisco dꞌa Bet-semes dꞌa Egipto, axo stemplo sdiosal ebꞌ ol n̈usjoctzꞌaoc, xchi Jehová, xin chi dꞌa ebꞌ.*