7 Yuj chiꞌ, a in Jehová Yajal in dꞌa Smasanil, e Diosal in, a in svalaꞌ: ¿Tas yuj tzeyicꞌcot jun nivan yaelal chiꞌ dꞌa eyibꞌan̈? ¿Tas yuj ol ex cham e masanil ex aj Judá? Ol cham ebꞌ vin̈ vinac, ebꞌ ix ix, ebꞌ unin yedꞌ pax ebꞌ vanto yalji, syalelcꞌochi to man̈xa ex ol ex canoc. 8 ¿Tas yuj tzin e tzuntzej yuj tas tze cꞌulej, tze n̈usan incienso dꞌa juntzan̈ comon dios dꞌa Egipto bꞌaj ix ex javi cajan tic? Yuj val juntzan̈ chiꞌ ol ex sateloc. Ol ex bꞌuchjoc yuj juntzan̈xo nación dꞌa yolyibꞌan̈qꞌuinal tic ayic ol yilan ebꞌ to icha tas sjavi dꞌa yibꞌan̈ ebꞌ catabꞌil, icha chiꞌ ol ex ajoc. 9 ¿Tom toxo ix bꞌat satcꞌolal eyuuj jantac chucal scꞌulejnac ebꞌ e mam eyicham, ebꞌ vin̈ sreyal Judá yedꞌ ebꞌ ix yetbꞌeyum yedꞌ pax juntzan̈ chucal e cꞌulejnac yedꞌ ebꞌ ix eyetbꞌeyum dꞌa juntzan̈ chon̈abꞌ dꞌa yol yic Judá yedꞌ dꞌa yoltac scalleal Jerusalén? 10 An̈ejtonaꞌ ticnaic, max e qꞌuex e bꞌeybꞌal, max ex xivpax jabꞌoc. Max e cꞌanabꞌajej in checnabꞌil yedꞌ in cꞌaybꞌubꞌal vacꞌnac dꞌayex yedꞌ dꞌa ebꞌ e mam eyicham.

11 Yuj chiꞌ a in Jehová Yajal in dꞌa Smasanil, e Diosal in, a in svalaꞌ: Toxo ix in naꞌ to ol vacꞌbꞌat jun yaelal dꞌa eyibꞌan̈, ol ex vacꞌan satel e masanil ex aj Judá. 12 A ex ix ex canlej cajan dꞌa Judá, palta ix ex ecꞌ dꞌa yibꞌan̈ e javi dꞌa Egipto tic. Ol ex satel dꞌa juneln̈ej, schacot dꞌa ebꞌ neneꞌ unin masanto dꞌa ebꞌ icham anima, ol cham ebꞌ yuj oval yuj pax vejel. Ol ja in catabꞌ dꞌa eyibꞌan̈, obꞌiltac ol ex vutoccanoc. A ebꞌ ol ex ilanoc ol te xiv ebꞌ. 13 Ol vacꞌ eyaelal mach ex ix ex javi cajan dꞌa Egipto tic yedꞌ oval, vejel yedꞌ pax ilya icha ajnac vacꞌan syaelal ebꞌ aj Jerusalén. 14 Malaj junoc ex aj Judá ex tic, a ex ix ex ja cajan dꞌa Egipto tic olto ex canoc, man̈xa junoc mach ol yal yeli. Vachꞌchom ol e nibꞌejxicꞌoch e bꞌa dꞌa Judá yic tzex cajnajxi dꞌay, palta axon̈ej jayvan̈oc ex ol ex el elelal, ol ex cꞌoch e col e bꞌa taꞌ, xchi Jehová, xin chi dꞌa ebꞌ.

15 Yuj chiꞌ masanil ebꞌ vin̈ ojtannac to a ebꞌ ix yetbꞌeyum ebꞌ vin̈ sn̈us incienso ebꞌ ix dꞌa juntzan̈ comon dios yedꞌ masanil ebꞌ ix ix ayecꞌ taꞌ, te tzijtum ebꞌ molaneqꞌui yedꞌ pax masanil ebꞌ aj Judá cajan dꞌa Egipto yedꞌ dꞌa Patros, ix tacꞌvi ebꞌ dꞌayin icha tic:

16 —A on̈ tic, man̈ ol co cꞌanabꞌajejlaj slolonel Jehová ix al chiꞌ dꞌayon̈. 17 An̈ej tas sco naꞌ an̈ej ol co bꞌeybꞌalej. Ol co n̈usn̈ej incienso, ol cacꞌn̈ej pax vino silabꞌil dꞌa ix yajalil satchaan̈, icha van co cꞌulan ticnaic, icha scꞌulejnac pax ebꞌ co mam quicham yedꞌ ebꞌ co reyal yedꞌ ebꞌ yajalil dꞌa yoltac juntzan̈ chon̈abꞌ dꞌa Judá yedꞌ dꞌa yoltac scalleal Jerusalén. Yujto a dꞌa pecaꞌ chiꞌ, ay co vael, tzalajcꞌolaln̈ej ecꞌnac on̈, malaj yaelal javinac dꞌa quibꞌan̈. 18 Ato ix cactan co n̈usan incienso yedꞌ cacꞌan vino silabꞌil dꞌa ix yajalil satchaan̈, man̈xalaj tas ay dꞌayon̈, tzon̈ cham yuj vejel yedꞌ yuj oval, xchi ebꞌ.

19 Ix yalan ebꞌ ix ix icha tic:

—A on̈ tic ix co bꞌo ixim vail icha yechel ix yajalil satchaan̈, ix co n̈usan incienso, ix cacꞌanpax vino silabꞌil dꞌay. Masanil tas ix co cꞌulej chiꞌ, dꞌa yichan̈ ebꞌ vin̈ quetbꞌeyum ix co cꞌulej, xchi ebꞌ ix.

20 Ix lajvi chiꞌ, ix in tacꞌvi dꞌa ebꞌ vin̈ vinac yedꞌ dꞌa ebꞌ ix ix alan juntzan̈ chiꞌ dꞌayin, ix valan icha tic:

21 —¿Am e naan a ex tic to man̈ yojtacoc Jehová, ma ix bꞌat satcꞌolal yuj bꞌaj ix e n̈us incienso dꞌa juntzan̈ comon dios chiꞌ dꞌa yoltac chon̈abꞌ yedꞌ dꞌa yoltac scalleal Jerusalén icha yutejnac sbꞌa ebꞌ co mam quicham, ebꞌ co reyal, ebꞌ yajal yaj dꞌa co cal yedꞌ masanil ebꞌ anima dꞌa yol yic Judá? 22 Palta majxo techaj juntzan̈ e bꞌeybꞌal te chuc chiꞌ yuj Jehová chiꞌ, maj scha scꞌool. Yuj chiꞌ a co chon̈abꞌ toxo ix pojchajem ticnaic, man̈xa mach cajan dꞌay. Toxo ix ja scatabꞌ Jehová dꞌa yibꞌan̈, ste xiv anima yilani. 23 A jun yaelal ayoch dꞌa quibꞌan̈ tic, ix javi yujto an̈ejaꞌ e n̈usan incienso dꞌa juntzan̈ comon dios. An̈ejaꞌ eyacꞌanoch e mul dꞌa Jehová, yujto maj e cꞌanabꞌajej scꞌaybꞌubꞌal, slolonel yedꞌ pax schecnabꞌil, xin chi dꞌa ebꞌ.

24 Ix valanxi dꞌa ebꞌ ix ix yedꞌ dꞌa masanil anima chiꞌ icha tic:

—Abꞌec val jun slolonel Jehová tic ex vetchon̈abꞌ, ex cajan ex dꞌa yol yic Egipto tic ticnaic. 25 A Jehová Yajal dꞌa Smasanil, co Diosal a on̈ israel on̈ tic, a tzꞌalan icha tic: A ex tic yedꞌ ebꞌ ix eyetbꞌeyum, ix eyacꞌ e tiꞌ dꞌa ix yajal satchaan̈ e n̈usan incienso, eyacꞌanpax vino silabꞌil dꞌa ix, van e cꞌanabꞌajan e cꞌulan bꞌaj ix eyacꞌ e tiꞌ chiꞌ. Vachꞌtoni, cꞌanabꞌajejec e cꞌulan bꞌaj ix eyacꞌ e tiꞌ chiꞌ. 26 Palta e masanil ex aj Judá cajan ex dꞌa Egipto tic, abꞌec tas sval a in Jehová in tic dꞌayex: A in val svacꞌ in tiꞌ to man̈xa junoc ex aj Judá ex tic olto in eyacꞌ bꞌinaj dꞌa Egipto tic ayic tzeyacꞌan e tiꞌ dꞌa junoc tas. 27 Yujto van vilani to ol vacꞌbꞌat yaelal dꞌa eyibꞌan̈, man̈oc vachꞌil ol vacꞌbꞌati. Masanil ex aj Judá cajan ex dꞌa Egipto tic, ol ex satel yuj oval, yuj pax vejel. 28 Jayvan̈ exxon̈ej ol ex colchaj dꞌa scal oval, ol ex el dꞌa Egipto tic, ol ex meltzaj dꞌa Judá. Ichato chiꞌ e masanil ex aj Judá ix ex javi dꞌa Egipto tic, ol eyilaꞌ mach ol elcꞌoch slolonel, am vicoꞌ, mato a eyic ol elcꞌochoc. 29 A in Jehová in svacꞌ jun chꞌoxnabꞌil tic, ol vacꞌ yaelal nabꞌil vuj dꞌa eyibꞌan̈, ol ex in satel dꞌa jun nación tic, icha ix aj vacꞌan in tiꞌ. 30 Ol vacꞌoch vin̈aj Hofra sreyal Egipto dꞌa yol scꞌabꞌ ebꞌ ajcꞌol snibꞌan smilan vin̈, icha ix aj vacꞌanoch vin̈aj Sedequías sreyal Judá dꞌa yol scꞌabꞌ vin̈aj Nabucodonosor sreyal Babilonia, aton vin̈ yajcꞌol vin̈ snibꞌan smilanchamoc, xchi Jehová, xin chi.