25
Ayic slajun̈il cꞌual yoch slajun̈il uj, ayic sbꞌalun̈il abꞌil yoch vin̈aj Sedequías reyal, ix javi vin̈aj rey Nabucodonosor yedꞌ ebꞌ vin̈ soldado yacꞌ oval dꞌa Jerusalén. Ix oymaj ebꞌ vin̈ dꞌa spatictac Jerusalén chiꞌ, ix sbꞌoanqꞌue scampamento ebꞌ vin̈ dꞌa spatictac, ix sbꞌoanqꞌue stecꞌnubꞌ ebꞌ vin̈ dꞌa spatictac smuroal. 2 Oybꞌiln̈ej jun chon̈abꞌ chiꞌ yuj ebꞌ vin̈, masanto ayic 11 abꞌil yoch vin̈aj Sedequías chiꞌ reyal. 3 Ayic sbꞌalun̈il cꞌual yoch schan̈il uj dꞌa yol jun abꞌil chiꞌ, ix em jun nivan vejel dꞌa yol chon̈abꞌ chiꞌ, man̈xa jabꞌoc tas vachꞌ svaan ebꞌ anima chiꞌ. 4 Ix sbꞌoan jun olan ebꞌ vin̈ soldado caldeo chiꞌ dꞌa smuroal chon̈abꞌ chiꞌ. Vachꞌchom oyanoch ebꞌ vin̈ soldado dꞌa spatictac chiꞌ, palta ix el vin̈aj rey Sedequías chiꞌ yedꞌ ebꞌ vin̈ soldado dꞌacꞌvalil. Ix elcꞌoch ebꞌ vin̈ dꞌa jun puerta dꞌa scal chabꞌ muro dꞌa stzꞌey bꞌaj ay yavbꞌen teꞌ ebꞌ vin̈ rey, ix bꞌat ebꞌ vin̈ dꞌa jun bꞌe scꞌoch dꞌa schꞌolanil aꞌ Jordán. 5 Palta ix bꞌat ebꞌ vin̈ soldado caldeo chiꞌ dꞌa spatic ebꞌ vin̈, ix yamchaj vin̈aj Sedequías chiꞌ yuj ebꞌ vin̈ dꞌa yacꞌlical Jericó. Ix saclemcanbꞌat ebꞌ vin̈ soldado vin̈. 6 Ix syaman vin̈ rey chiꞌ ebꞌ vin̈, ix yicꞌanbꞌat vin̈ ebꞌ vin̈ dꞌa vin̈aj Nabucodonosor sreyal Babilonia chiꞌ dꞌa Ribla, dꞌa yol yic Hamat. Ataꞌ ix yal vin̈ tas ol utaj vin̈aj Sedequías chiꞌ. 7 Dꞌa val yichan̈ vin̈aj Sedequías chiꞌ ix xicjicham ebꞌ yuninal. Ix icꞌchajqꞌueta yol sat vin̈, ix tzecꞌchaj vin̈ dꞌa qꞌuen cadena nabꞌa bronce, ix icꞌchajbꞌat vin̈ dꞌa Babilonia.Ix macꞌjiem templo
8 Ayic uqueꞌ cꞌualxo yoch yoil uj dꞌa 19 abꞌil yoch vin̈aj Nabucodonosor reyal dꞌa Babilonia, ix javi vin̈aj Nabuzaradán yajalil ebꞌ vin̈ soldado stan̈vumal vin̈ rey chiꞌ yedꞌ ebꞌ vin̈ soldado dꞌa Jerusalén. 9 Ix sn̈usantzꞌa stemplo Jehová ebꞌ vin̈ yedꞌ spalacio vin̈ rey, masanil spat ebꞌ cajan dꞌa Jerusalén chiꞌ yedꞌ masanil nivac pat. 10 Ix spojanem masanil smuroal chon̈abꞌ Jerusalén chiꞌ ebꞌ vin̈. 11 Masanil ebꞌ anima ayto cani, ix yicꞌbꞌat ebꞌ vin̈aj Nabuzaradán chiꞌ, aton ebꞌ ix yacꞌoch sbꞌa yedꞌ vin̈ sreyal Babilonia yedꞌ ebꞌ jelan sbꞌoan tastac. 12 Axon̈ej ebꞌ te mebꞌaꞌ ix yactejcan vin̈, yic smunlaj ebꞌ dꞌa avoj uva yedꞌ juntzan̈xo tas tzꞌavchaji.
13 Masanil tastac nabꞌa bronce ay dꞌa yol templo ix smacꞌpoj ebꞌ vin̈ soldado chiꞌ, aton chabꞌ oy ayoch dꞌa sat templo chiꞌ, juntzan̈ sbꞌachnubꞌ yich cotac pila yedꞌ jun nivan pila. Ix yicꞌanbꞌat qꞌuen bronce chiꞌ ebꞌ vin̈ dꞌa Babilonia. 14 An̈ejtonaꞌ bꞌaj tzꞌem qꞌuen ticꞌaqꞌuil taan̈, qꞌuen pala, qꞌuen icꞌlabꞌel stan̈il bꞌaj tzꞌoch scꞌacꞌal candil, qꞌuen nivac cuchara yedꞌ masanil tastac nabꞌa bronce scꞌanchaji ayic tzꞌoch ejmelal dꞌa Jehová, ix yicꞌbꞌat ebꞌ vin̈ smasanil. 15 Ix yicꞌpaxbꞌat juntzan̈ nivac vaso ebꞌ vin̈ yedꞌ qꞌuen bꞌaj sn̈usji incienso yedꞌ juntzan̈xo tastac nabꞌa oro ma nabꞌa plata. 16 Man̈xa yalbꞌanil jantac yalil qꞌuen bronce ayoch dꞌa chabꞌ nivac oy yic templo, dꞌa jun pila yic a aꞌ yedꞌ dꞌa juntzan̈ yich bꞌachnubꞌ bꞌobꞌilcan yuj vin̈aj rey Salomón yic tzꞌochcan dꞌa stemplo Jehová. 17 A junjun oy chiꞌ, ecꞌbꞌal vajxaqueꞌ metro steel. A sjolom oy chiꞌ nabꞌa bronce, nan̈al schabꞌil metro yaj qꞌuei, axo spatictac sjolom oy chiꞌ, aypaxoch yelvanubꞌ icha yilji teꞌ granada. A juntzan̈ chiꞌ nabꞌa bronce. Lajann̈ej yaj chabꞌ oy chiꞌ.
Ix icꞌjiel ebꞌ aj Judá sat sluum
18 A vin̈aj Nabuzaradán chiꞌ ix yaman vin̈aj Seraías sat sacerdote, vin̈aj Sofonías schabꞌil sacerdote yedꞌ oxvan̈ ebꞌ vin̈ stan̈van stiꞌ templo, ix icꞌjibꞌat ebꞌ vin̈ yuj vin̈ dꞌa Babilonia. 19 A dꞌa scal ebꞌ anima ix can dꞌa yol chon̈abꞌ chiꞌ, ix yamchajpax jun vin̈ sat yajal scuchbꞌan ebꞌ vin̈ soldado yedꞌ pax ovan̈xo ebꞌ vin̈ tzꞌacꞌan srazón vin̈ rey yedꞌ jun vin̈ tzꞌibꞌum sbꞌoan slistail ebꞌ vin̈ soldado yedꞌ pax 60-xo ebꞌ vin̈ nivac vinac yaj dꞌa yol chon̈abꞌ chiꞌ. 20-21 Masanil juntzan̈ ebꞌ anima chiꞌ ix yicꞌbꞌat vin̈aj Nabuzaradán chiꞌ dꞌa Ribla dꞌa yol yic Hamat. Ataꞌ ix yal vin̈ rey to scham ebꞌ. Icha chiꞌ ix aj yicꞌjiel ebꞌ aj Judá chiꞌ dꞌa schon̈abꞌ yedꞌ dꞌa sluum, ix icꞌjibꞌat ebꞌ dꞌa Babilonia.
Ebꞌ anima ixto cani ix bꞌatcan ebꞌ dꞌa Egipto
22 Ix och vin̈aj Gedalías yuninal vin̈aj Ahicam yixchiquin vin̈aj Safán gobernadoral yuj vin̈ sreyal Babilonia chiꞌ. A vin̈ ix can yil jantacto anima ix can dꞌa Judá chiꞌ. 23 Ayic ix yabꞌan jun lolonel chiꞌ ebꞌ vin̈ yajal ebꞌ vin̈ soldado ixto cani, ix bꞌat ebꞌ vin̈ dꞌa Mizpa yedꞌ ebꞌ vin̈ soldado chiꞌ, yic bꞌat lolon ebꞌ vin̈ yedꞌ vin̈aj Gedalías chiꞌ. A ebꞌ vin̈ chiꞌ, aton vin̈aj Ismael yuninal vin̈aj Netanías, vin̈aj Johanán yuninal vin̈aj Carea, vin̈aj Seraías yuninal vin̈aj Tanhumet aj Netofa yedꞌ vin̈aj Jaazanías yuninal jun vin̈ aj Maaca. 24 Ix yacꞌan stiꞌ vin̈aj Gedalías chiꞌ dꞌa ebꞌ vin̈ yedꞌ dꞌa ebꞌ vin̈ soldado, ix yalan vin̈ icha tic: Man̈ ex xiv e can dꞌa yalan̈ smandar ebꞌ caldeo chiꞌ, cajnajan̈ec dꞌa yol nación tic, tzex och dꞌa yalan̈ schecnabꞌil vin̈ sreyal Babilonia. Tato icha chiꞌ vachꞌn̈ej ol aj e bꞌeybꞌati, xchi vin̈.
25 Axo dꞌa yuquil uj, ix javi vin̈aj Ismael yuninal vin̈aj Netanías yixchiquin vin̈aj Elisama, dꞌa yin̈tilal ebꞌ vin̈ sreyal Judá. Ay lajun̈van̈xo ebꞌ vin̈ vinac ajun yedꞌ vin̈, ix smilancham vin̈aj Gedalías chiꞌ ebꞌ vin̈ yedꞌ ebꞌ aj Judá yedꞌ pax ebꞌ caldeo ayecꞌ yedꞌ vin̈ dꞌa Mizpa chiꞌ. 26 Yuj chiꞌ masanil ebꞌ anima ix bꞌat elelal dꞌa Egipto yuj xivelal dꞌa ebꞌ caldeo chiꞌ. Ataꞌ ix bꞌat ebꞌ anima nivac yelcꞌochi, ebꞌ malaj yelcꞌochi yedꞌ ebꞌ yajalil ebꞌ soldado.
Ix actajel vin̈aj Joaquín
27 Ayic 27 cꞌual yoch slajchavil ujal, ayic 37 abꞌilxo yicꞌchajbꞌat vin̈aj rey Joaquín dꞌa Babilonia, ix och vin̈aj Evil-merodac reyal dꞌa Babilonia chiꞌ. A dꞌa bꞌabꞌel abꞌil yoch vin̈ reyal chiꞌ ix schꞌoxan svachꞌcꞌolal vin̈ dꞌa vin̈aj Joaquín chiꞌ, ix yicꞌanelta vin̈ vin̈ dꞌa preso. 28 Te vachꞌ ix yutej sbꞌa vin̈ rey chiꞌ dꞌa vin̈ dꞌa yichan̈ juntzan̈xo ebꞌ vin̈ rey ayoch preso dꞌa Babilonia chiꞌ. 29 Yuj chiꞌ ix sqꞌuexel spichul vin̈aj Joaquín scꞌan dꞌa yol preso chiꞌ, ix va vin̈ yedꞌ vin̈ rey chiꞌ dꞌa jantacto tiempoal pitzan vin̈. 30 Ix acꞌjin̈ej sgasto vin̈ yuj vin̈ sreyal Babilonia chiꞌ masanto ix cham vin̈.