Ochnac vin̈aj Joacaz reyal dꞌa Israel
13
Ayic 23 abꞌil yoch vin̈aj Joás yuninal vin̈aj Ocozías reyal dꞌa Judá, ix schaanel yich vin̈aj Joacaz yuninal vin̈aj Jehú yacꞌan reyal dꞌa Israel. 17 abꞌil ix yacꞌ reyal vin̈ dꞌa Samaria. 2 Te chuc tas ix scꞌulej vin̈ dꞌa yichan̈ Jehová. A juntzan̈ chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannac ebꞌ yetisraelal dꞌa chucal, a chiꞌ ix sbꞌeybꞌalej vin̈. 3 Yuj val chiꞌ ix cot yoval scꞌool Jehová dꞌa ebꞌ israel chiꞌ, nivan tiempo ix can ebꞌ dꞌa yol scꞌabꞌ vin̈aj Hazael sreyal Siria yedꞌ pax dꞌa yol scꞌabꞌ vin̈ yuninal vin̈, aton vin̈aj Ben-adad.4 Yuj chiꞌ ix lesalvi vin̈aj Joacaz chiꞌ dꞌa Jehová, ix abꞌchaj slesal vin̈ chiꞌ, yujto ix yil Jehová tas val tzꞌutaj ebꞌ israel yuj vin̈ sreyal Siria chiꞌ, 5 yuj chiꞌ ix acꞌji jun mach scolvaj dꞌa ebꞌ yuj Jehová chiꞌ. Icha chiꞌ ix aj yel ebꞌ dꞌa yol scꞌabꞌ ebꞌ sirio chiꞌ, ix canxi ebꞌ dꞌa juncꞌolal, ichataxon yajecꞌ ebꞌ dꞌa yalan̈taxo. 6 Palta maj yactejcanlaj ebꞌ sbꞌeybꞌalan juntzan̈ chucal scꞌulejnac vin̈aj Jeroboam vin̈ cuchbꞌannac ebꞌ yetisraelal dꞌa chucal. Ix qꞌuen̈ejchaan̈ ebꞌ yedꞌ jun chucal chiꞌ, an̈ejaꞌ ayecꞌ jun yechel Asera dꞌa Samaria chiꞌ.
7 A ebꞌ soldado vin̈aj Joacaz chiꞌ, quenxon̈ej sbꞌisul ebꞌ, yujto a vin̈ sreyal Siria ix satanel ebꞌ. 50-xon̈ej ebꞌ sqꞌue dꞌa yibꞌan̈ chej, lajun̈eꞌ carruaje yic oval yedꞌ 10 mil soldado sbꞌey dꞌa yoc ayeqꞌui.
8 A jantacto yabꞌixal vin̈aj rey Joacaz yedꞌ tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 9 Axo yic ix cham vin̈, ix mucji vin̈ dꞌa Samaria. Ix lajvi chiꞌ, axo vin̈aj Joás vin̈ yuninal vin̈ ix ochcan reyal sqꞌuexuloc.
Ochnac vin̈aj Joás reyal dꞌa Israel
10 Ayic 37 abꞌilxo yoch vin̈aj Joás reyal dꞌa Judá, ataꞌ ix schael yich vin̈aj Joás yuninal vin̈aj Joacaz yacꞌan reyal dꞌa Israel, 16 abꞌil ix yacꞌ reyal vin̈ dꞌa Samaria. 11 Te chuc tas ix scꞌulej vin̈ dꞌa yichan̈ Jehová. A juntzan̈ chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannacbꞌat ebꞌ yetisraelal dꞌa chucal, a chiꞌ ix sbꞌeybꞌalej vin̈.
12 A jantacto yabꞌixal vin̈aj Joás chiꞌ, tastac ix scꞌulej vin̈ yedꞌ tas ix aj yacꞌan oval vin̈ yedꞌ vin̈aj Amasías sreyal Judá, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 13 Ayic ix cham vin̈aj Joás chiꞌ, ix mucji vin̈ dꞌa Samaria bꞌaj mucan juntzan̈xo ebꞌ vin̈ sreyal Israel. Axo vin̈aj Jeroboam ix ochcan reyal sqꞌuexuloc vin̈.
A schamel vin̈aj Eliseo
14 Ayic manto cham vin̈aj Joás sreyal Israel chiꞌ, ix xidꞌecꞌ vin̈ yil vin̈aj Eliseo ayic te penaay vin̈aj Eliseo chiꞌ yuj jun yabꞌil ix icꞌan schami. Yuj chiꞌ ix ocꞌqꞌue vin̈aj Joás chiꞌ dꞌa vin̈, ix och lacꞌnaj vin̈ dꞌa vin̈, ix yalan vin̈ rey chiꞌ:
—Ay mamin, lajan ach icha nocꞌ chej yedꞌ carruaje yic oval dꞌayon̈ israel on̈ tic, yujto tzach colvajn̈ej dꞌayon̈, xchi vin̈.
15 Ix yalan vin̈aj Eliseo chiꞌ:
—Icꞌcot junoc a jul-labꞌ yedꞌ jayeoc sjul-labꞌil, xchi vin̈.
—Jac ventena dꞌa stojolal bꞌaj sjavi cꞌu. Ix sjacan vin̈ rey chiꞌ, ix yalan vin̈aj Eliseo chiꞌ: Bꞌooch a jul-labꞌ chiꞌ yic ol ach julvajoc, xchi vin̈.
Yacbꞌan yambꞌil teꞌ yuj vin̈ rey chiꞌ, ix yacꞌanoch scꞌabꞌ vin̈aj Eliseo dꞌa yibꞌan̈ scꞌabꞌ vin̈ rey chiꞌ.
—Julvajan̈ an, xchi vin̈.
Ix julvajbꞌat vin̈ rey chiꞌ, ix yalan vin̈aj Eliseo chiꞌ:
—A a jul-labꞌ tic schꞌoxanel scolval Jehová dꞌa schon̈abꞌ to ol acꞌ ganar ebꞌ sirio dꞌa Afec, ol a satanel ebꞌ smasanil, xchi vin̈.
18 Ix yalanxi vin̈aj Eliseo chiꞌ dꞌa vin̈ rey chiꞌ:
—Yam juntzan̈ a jul-labꞌ, xchi vin̈.
Ayic ix syaman sjul-labꞌ vin̈ chiꞌ, ix yalan vin̈aj Eliseo chiꞌ:
—A ticnaic, tecubꞌtan̈ejem dꞌa sat luum, xchi vin̈.
Yuj chiꞌ oxel ix stequem vin̈ rey chiꞌ, ix och vaan vin̈. 19 Ix cot yoval vin̈aj Eliseo chiꞌ, ix yalan vin̈:
—Octom ix a tequem oel vaqueloc, tato icha chiꞌ, icham chiꞌ ol aj a satanel ebꞌ sirio chiꞌ smasanil. Ocxo jun, oxeln̈ej ol acꞌ ganar ebꞌ, xchi vin̈.
20 Ix cham vin̈aj Eliseo chiꞌ, ix mucchaj vin̈.
Junjun abꞌil tzuln̈ejecꞌ ebꞌ moabita elcꞌal dꞌa yol smacbꞌen ebꞌ israel. 21 A junel, ix bꞌat juntzan̈ ebꞌ israel smuc jun chamnac. Ayic van scꞌoch ebꞌ bꞌaj ol smuc chiꞌ, ix yilan ebꞌ sjavi ebꞌ elcꞌum chiꞌ, toxon̈ej ix syumcanoch jun chamnac chiꞌ ebꞌ bꞌaj mucan vin̈aj Eliseo chiꞌ, ix bꞌat ebꞌ elelal. Ayic ix och tennaj jun chamnac chiꞌ dꞌa sbꞌaquil vin̈aj Eliseo chiꞌ, ix pitzvixi, ix qꞌuex lin̈an.
Ix acꞌji ganar ebꞌ sirio yuj vin̈aj Joás
22 Ix te ixtaj val ebꞌ israel yuj vin̈aj Hazael sreyal Siria ayic pitzanto vin̈aj rey Joacaz. 23 Palta ix yacꞌ svachꞌcꞌolal Jehová dꞌa ebꞌ, ix ocꞌ scꞌol dꞌa ebꞌ yujn̈ej strato yedꞌ vin̈aj Abraham, vin̈aj Isaac yedꞌ vin̈aj Jacob. Yuj chiꞌ maj schalaj satjiel ebꞌ, maj yiqꞌuel-laj ebꞌ dꞌa yichan̈.
24 Ayic ix cham vin̈aj Hazael sreyal Siria chiꞌ, axo vin̈ yuninal vin̈ scuchan Ben-adad ix ochcan reyal sqꞌuexuloc. 25 Yuj chiꞌ, a vin̈aj Joás yuninal vin̈aj Joacaz ix icꞌanxicanecꞌ juntzan̈ chon̈abꞌ ix yiqꞌuecꞌ vin̈aj Hazael dꞌa vin̈aj rey Joacaz ayic ix yacꞌan oval ebꞌ. Oxel ix acꞌji ganar vin̈aj Ben-adad yuj vin̈aj Joás chiꞌ. Icha chiꞌ ix yutej vin̈ scolanxican juntzan̈ chon̈abꞌ chiꞌ.