4-5 Ay jun cꞌual ix yal vin̈aj rey Joás chiꞌ dꞌa ebꞌ vin̈ sacerdote:

—Molec qꞌuen tumin yedꞌ qꞌuen ofrenda tzꞌicꞌjicot dꞌa stemplo Jehová, qꞌuen yovalil syacꞌ junjun anima yedꞌ jantac qꞌuen ofrenda ton̈ej tzꞌel dꞌa scꞌol ebꞌ yacꞌani. Junjun ex ol eyacꞌ qꞌuen tumin ol e cha chiꞌ yuj sbꞌoji templo, xchi vin̈ dꞌa ebꞌ vin̈.

6 Palta ayic ix el 23 abꞌil yoch vin̈ reyal chiꞌ, manta jabꞌoc stemplo Jehová chiꞌ sbꞌo ebꞌ vin̈ sacerdote chiꞌ. 7 Yuj chiꞌ ix avtaj vin̈aj Joiada yedꞌ juntzan̈xo ebꞌ vin̈ sacerdote yuj vin̈, ix yalan vin̈ dꞌa ebꞌ vin̈:

—¿Tas yuj manta jabꞌoc templo tic tze bꞌoꞌo? A ticnaic dꞌa quichan̈bꞌat tic, man̈xooc ex laj ol e cha qꞌuen tumin dꞌa ebꞌ anima tic. A jantac qꞌuen tumin ol acꞌjoc, yovalil scan qꞌuen yic sbꞌoji templo chiꞌ, xchi vin̈.

8 Ix scha scꞌol ebꞌ vin̈ sacerdote chiꞌ to man̈xooclaj ebꞌ vin̈ schaan qꞌuen tumin chiꞌ, man̈xa paxlaj yalan yic ebꞌ vin̈ sbꞌoan stemplo Jehová chiꞌ. 9 Yuj chiꞌ ix yicꞌcot jun caxa vin̈aj Joiada chiꞌ, ix yolan smacul teꞌ vin̈, ix yacꞌancan teꞌ vin̈ dꞌa slacꞌanil altar dꞌa stojolal svachꞌ mach tzꞌoch dꞌa yol templo chiꞌ. Aton taꞌ syaqꞌuem qꞌuen tumin ebꞌ vin̈ sacerdote stan̈van stiꞌ templo scha dꞌa ebꞌ anima scꞌoch dꞌa templo chiꞌ. 10 Ayic syilan ebꞌ vin̈ to nivanxo qꞌuen tumin chiꞌ ay dꞌa yol teꞌ caxa chiꞌ, scꞌoch jun vin̈ stzꞌibꞌum vin̈ rey yedꞌ vin̈ sat sacerdote chiꞌ, sbꞌisan qꞌuen tumin chiꞌ ebꞌ vin̈. Slajvi chiꞌ syacꞌanem qꞌuen ebꞌ vin̈ dꞌa yol juntzan̈ mucuc. 11 Ayic slajvi sbꞌisan qꞌuen chiꞌ ebꞌ vin̈, syacꞌan qꞌuen ebꞌ vin̈ dꞌa ebꞌ vin̈ ayoch yilumaloc munlajel tas tzꞌaj sbꞌoxi templo chiꞌ, yic stupchaj ebꞌ vin̈ sn̈ican te teꞌ, ebꞌ vin̈ tzꞌilan sbꞌo munlajel chiꞌ, 12 ebꞌ vin̈ albañil yedꞌ ebꞌ vin̈ bꞌoum qꞌueen. Ix manchaj pax te teꞌ yedꞌ qꞌuen qꞌueen macꞌbꞌilpojoc yic tzꞌoch dꞌa munlajel chiꞌ. Scꞌanchajpax qꞌuen tumin chiꞌ dꞌa juntzan̈xo tas smanchaj yuj munlajel chiꞌ. 13 A qꞌuen tumin syicꞌbꞌat ebꞌ dꞌa templo chiꞌ, max cꞌanchajlaj qꞌuen yic sbꞌochaj juntzan̈ vaso, pultu, qꞌuen icꞌlabꞌel stan̈il bꞌaj tzꞌoch scꞌacꞌal candil, qꞌuen nivac ucꞌabꞌ yedꞌ trompeta yedꞌ juntzan̈xo yamcꞌabꞌ nabꞌa oro yedꞌ plata. 14 Palta a masanil qꞌuen tumin chiꞌ, a dꞌa ebꞌ vin̈ ayoch dꞌa yibꞌan̈ yilan munlajel yic sbꞌoji stemplo Jehová chiꞌ, a dꞌa ebꞌ vin̈ tzꞌacꞌji qꞌueen. 15 Maj chꞌolbꞌitaj smunlajel ebꞌ vin̈ schaan qꞌuen tumin chiꞌ, yic slaj stupan ebꞌ vin̈ munlajvum ebꞌ vin̈, yujto te tzꞌacan syutej ebꞌ vin̈ sbꞌoani. 16 Axo pax qꞌuen tumin tzꞌacꞌji yuj spacoc mul yedꞌ silabꞌ tzꞌacꞌchaj yuj stupchaj mul, max acꞌjilaj qꞌueen dꞌa templo chiꞌ, yujto yic ebꞌ vin̈ sacerdote yaj qꞌueen.

17 A dꞌa jun tiempoal chiꞌ, a vin̈aj Hazael sreyal Siria, ix javi vin̈ yacꞌ oval dꞌa chon̈abꞌ Gat, ix yacꞌan ganar jun chon̈abꞌ chiꞌ vin̈, ix lajvi chiꞌ ix cot vin̈ dꞌa sbꞌeal Jerusalén yacꞌ oval. 18 A vin̈aj Joás sreyal Judá, ix smolbꞌej jantac tas yacꞌnac ebꞌ smam yicham vin̈ dꞌa stemplo Jehová, aton vin̈aj Josafat, vin̈aj Joram yedꞌ vin̈aj Ocozías. Ix smolbꞌanpax juntzan̈ tas yacꞌnac vin̈ dꞌa templo chiꞌ yedꞌ masanil qꞌuen oro ayxo ecꞌ taꞌ yedꞌ masanil tas ay dꞌa spalacio vin̈. Masanil juntzan̈ chiꞌ ix yacꞌbꞌat vin̈ dꞌa vin̈aj Hazael chiꞌ, yuj chiꞌ majxo yacꞌlaj oval chiꞌ dꞌa Jerusalén chiꞌ.

19 A jantacto yabꞌixal vin̈aj Joás yedꞌ masanil tastac ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 20 Ix smolbꞌan sbꞌa ebꞌ vin̈ ayoch yajalil yedꞌ vin̈aj Joás chiꞌ, ix smol alan ebꞌ vin̈ dꞌa spatic vin̈. Ix smilancham vin̈ ebꞌ vin̈ dꞌa jun pat bꞌaj mucbꞌil jun chꞌolan dꞌa tiꞌ bꞌe tzꞌemta dꞌa Sila. 21 A ebꞌ vin̈ ix milancham vin̈ chiꞌ, aton vin̈aj Josacar yuninal vin̈aj Simat yedꞌ vin̈aj Jozabad yuninal vin̈aj Somer. Ayic ix cham vin̈ chiꞌ, ix mucji vin̈ dꞌa schon̈abꞌ vin̈aj rey David. Axo vin̈ yuninal vin̈ scuchan Amasías ix ochcan reyal sqꞌuexuloc.