Ix yacꞌoch sbꞌa ix Atalía reinail
11
Ayic ix yabꞌan ix Atalía to toxo ix cham vin̈ yuneꞌ ix, aton vin̈aj rey Ocozías, ix schecan ix satjiel masanil ebꞌ yin̈tilal vin̈ rey chiꞌ. 2 Axo ix Josaba, yisilcan vin̈aj rey Joram, schabꞌil yanabꞌ vin̈aj rey Ocozías chiꞌ, aꞌ ix ix icꞌancanel vin̈aj Joás yuninal vin̈aj Ocozías chiꞌ dꞌa scal ebꞌ yuninal vin̈ van smiljicham chiꞌ. Icha chiꞌ ix aj scꞌubꞌanel vin̈ ix dꞌa ix Atalía chiꞌ. Ix bꞌat scꞌubꞌejel vin̈ ix yedꞌ jun ix tzꞌilan qꞌuibꞌ vin̈ dꞌa jun cuarto bꞌaj ay juntzan̈ chꞌat sicꞌan, yuj chiꞌ maj miljoccham vin̈aj Joás chiꞌ. 3 Ix lajvi chiꞌ, ix cꞌubꞌchajel vin̈ yedꞌ ix tzꞌilanqꞌuibꞌ chiꞌ dꞌa stemplo Jehová, vaqueꞌ abꞌil ix can vin̈ taꞌ, yacbꞌan ayoch ix Atalía yajalil dꞌa Judá chiꞌ.4 Axo dꞌa yuquil abꞌil, a vin̈aj sat sacerdote Joiada yetbꞌeyum ix Josaba chiꞌ, ix schec vin̈ avtaj ebꞌ yajalil soldado, ebꞌ quereteo yedꞌ ebꞌ stan̈van spalacio vin̈ rey. A vin̈ ix acꞌanoch ebꞌ dꞌa yamaqꞌuil stemplo Jehová. Ataꞌ ix schec vin̈ yacꞌ stiꞌ ebꞌ yic tzꞌoch ebꞌ yedꞌ vin̈ dꞌa tas nabꞌil yuuj. Ix lajvi chiꞌ ix chꞌoxjioch vin̈aj Joás yuninal vin̈aj Ocozías chiꞌ dꞌa ebꞌ. 5 Elan̈chamel ix yal vin̈ dꞌa ebꞌ: Aton tic ol e cꞌuloc: Ay ex mach ex ol ex ochcan e tan̈vej spalacio vin̈ rey dꞌa scꞌual icꞌoj ip, 6 ayex pax mach ex ol e tan̈vej spuertail yic Shur, an̈ejtonaꞌ ayex mach ex ol e tan̈vej spuertail spat ebꞌ stan̈van vin̈ rey. Icha chiꞌ ol aj e cann̈ej e tan̈vej yic malaj mach scꞌoch taꞌ. 7 A exxo tzex elcan dꞌa scꞌual icꞌoj ip chiꞌ jun, cha macan̈ tzeyutej e bꞌa e tan̈van stemplo Jehová dꞌa stzꞌeytac vin̈ rey. 8 Tzex och oyan dꞌa spatictac bꞌaj ay vin̈ chiꞌ, junjun ebꞌ yedꞌnac syamcꞌabꞌ yic oval. Yaln̈ej mach tzꞌoch dꞌa e cal bꞌaj tzolan ex och chiꞌ, tojoln̈ej schami. Yaln̈ej bꞌajtil sbꞌat vin̈ rey chiꞌ, tzex bꞌat yedꞌ vin̈, xchi vin̈aj Joiada chiꞌ.
9 Ix scꞌanabꞌajej ebꞌ capitán chiꞌ tastac ix yal vin̈aj Joiada chiꞌ. Junjun ebꞌ ix yacꞌoch soldado ebꞌ, ebꞌ tzꞌoch stan̈vej dꞌa scꞌual icꞌoj ip yedꞌ ebꞌ tzꞌelcani, ix cꞌoch ebꞌ dꞌa yichan̈ vin̈aj sacerdote Joiada chiꞌ. 10 Ix lajvi chiꞌ, ix yacꞌan qꞌuen lanza vin̈ yedꞌ qꞌuen smaclabꞌ jul-labꞌ dꞌa ebꞌ capitán chiꞌ, aton qꞌuen aycan yuj vin̈aj rey David dꞌa yol stemplo Jehová chiꞌ. 11 Ix och oyan ebꞌ soldado chiꞌ stan̈van dꞌa yamaqꞌuil templo yedꞌ dꞌa spatictac altar yedꞌ dꞌa spatic yichan̈ vin̈ rey chiꞌ. Junjun ebꞌ, yedꞌnac syamcꞌabꞌ ebꞌ yic oval. 12 Ix yicꞌanelta vin̈ yuninal vin̈ rey chiꞌ vin̈aj Joiada chiꞌ, ix yacꞌanqꞌue corona vin̈ dꞌa sjolom vin̈, ix yacꞌan jun yumal strato Dios vin̈ dꞌa vin̈. Ix stobꞌanqꞌue aceite vin̈ dꞌa sjolom vin̈ unin chiꞌ, ix yalan vin̈ to reyxo vin̈. Ix lajvi chiꞌ, masanil ebꞌ ix stzꞌit scꞌabꞌ, ix syamanoch ebꞌ yavaji: Nivanocabꞌ yelcꞌoch vin̈ co reyal, xchi ebꞌ.
13 Ayic ix yabꞌan ix Atalía yel yav ebꞌ vin̈ soldado yedꞌ ebꞌ anima chiꞌ yeqꞌui, ix javi ix dꞌa stemplo Jehová bꞌaj ayecꞌ ebꞌ anima smasanil. 14 Axo ix yilan ix ayecꞌ vin̈ rey chiꞌ, lin̈anoch vin̈ dꞌa stzꞌey jun oy dꞌa amacꞌ chiꞌ, ichataxon sbꞌeybꞌal ebꞌ. A dꞌa stzꞌeytac vin̈ rey chiꞌ ayecꞌ ebꞌ yajal yedꞌ ebꞌ tzꞌacꞌanoch sonal ebꞌ sbꞌitani. Masanil ebꞌ anima chiꞌ stzalaj ebꞌ, spuꞌan schꞌaac ebꞌ. Yuj chiꞌ ix sn̈icꞌchitejbꞌat spichul ix, ix el yav ix:
—Pechum ex el yajal a ex tic. Pechum ex el yajal, xchi ix.
15 Ix yalan vin̈aj sacerdote Joiada dꞌa ebꞌ yajalil ebꞌ soldado icha tic:
—Iqꞌuequel ix a ex tzolan ex ecꞌ chiꞌ. A mach tzꞌoch tzacꞌan yuj ix miljocabꞌchamoc, xchi vin̈.
Yujto toxo ix yal vin̈ sacerdote chiꞌ to max yal-laj smiljicham ix dꞌa yamaqꞌuil stemplo Jehová. 16 Yuj chiꞌ ix icꞌjielta ix dꞌa scal ebꞌ chiꞌ, ix icꞌchajbꞌat ix bꞌaj tzꞌochcꞌoch sbꞌe ebꞌ ayqꞌue dꞌa yibꞌan̈ chej scꞌoch dꞌa spalacio vin̈ rey. Ataꞌ ix miljicham ix yuj ebꞌ.
17 Ix lajvi chiꞌ, ix yalan vin̈aj Joiada chiꞌ to sbꞌocan junoc strato vin̈ rey yedꞌ ebꞌ chon̈abꞌ to ol ochcan ebꞌ schon̈abꞌoc Jehová. Ix yalanpax vin̈ to ayocabꞌ junoc strato vin̈ rey yedꞌ ebꞌ chon̈abꞌ chiꞌ. 18 Ix lajvi chiꞌ, ix smacꞌanem lan̈naj stemplo Baal ebꞌ, ix smacꞌanpoj juntzan̈ altar ebꞌ yedꞌ juntzan̈ yechel. Ix macꞌjipaxcham vin̈aj Matán, sacerdote yaj dꞌa Baal chiꞌ dꞌa yichan̈ juntzan̈ altar chiꞌ. Ix yacꞌanoch stan̈vumal stemplo Jehová vin̈aj Joiada chiꞌ. 19 Ix elta ebꞌ yajalil soldado, ebꞌ quereteo, aton ebꞌ stan̈van vin̈ rey chiꞌ yedꞌ masanil anima. Yaman ix aj yel ebꞌ yedꞌ vin̈ rey dꞌa yamaqꞌuil stemplo Jehová, masanto ix cꞌoch ebꞌ dꞌa palacio. A dꞌa spuertail bꞌaj ayecꞌ ebꞌ stan̈van palacio chiꞌ ix cꞌoch ebꞌ, ix em cꞌojan vin̈aj rey Joás chiꞌ dꞌa yol scꞌojnubꞌ ebꞌ rey. 20 Masanil ebꞌ anima, ix tzalajqꞌue ebꞌ, yujto a ix Atalía toxo ix miljicham ix dꞌa stiꞌ palacio chiꞌ. Icha chiꞌ ix aj scan jun chon̈abꞌ chiꞌ dꞌa juncꞌolal.
Ochnac vin̈aj Joás reyal dꞌa Judá
21 Uqueꞌ abꞌil sqꞌuinal vin̈aj rey Joás chiꞌ ayic ix och vin̈ reyal dꞌa Judá.