4 Ayic ix yabꞌan jun chiꞌ ebꞌ, ix te xivqꞌue ebꞌ, ix yalan ebꞌ icha tic: Ina tax maj tzacꞌvan stecꞌbꞌan sbꞌa chavan̈ ebꞌ vin̈ rey dꞌa yichan̈ vin̈, ocon̈xo ¿tom a on̈ to tic ol yal co tecꞌbꞌan co bꞌa dꞌa yichan̈ vin̈? xchi ebꞌ.

5 Axo vin̈ tzꞌilan spalacio vin̈ rey chiꞌ yedꞌ vin̈ sgobernadoral chon̈abꞌ chiꞌ, masanil ebꞌ yichamtac vinaquil chon̈abꞌ yedꞌ pax ebꞌ ix ilan qꞌuibꞌ ebꞌ yuninal vin̈aj Acab chiꞌ, ix yalbꞌat ebꞌ dꞌa vin̈aj Jehú chiꞌ: A on̈ tic ayon̈ ecꞌ dꞌa yol a cꞌabꞌ. Masanil tas ol alaꞌ ol co cꞌanabꞌajej, man̈ ol cacꞌochlaj junocxo co reyal. Ujocabꞌ icha tas vachꞌ tzꞌaj a naani, xchibꞌat ebꞌ.

6 Ix stzꞌibꞌanxibꞌat junxo carta vin̈aj Jehú chiꞌ dꞌa ebꞌ, ix yalan vin̈: Tato tze nibꞌej tzex och vedꞌoc, ol e cꞌanabꞌajan tas svalaꞌ, a qꞌuicꞌan tzeyicꞌcot sjolom ebꞌ yin̈tilal vin̈ eyajalil chiꞌ, tzex javi dꞌayin dꞌa Jezreel tic, xchibꞌat vin̈ dꞌa ebꞌ.

A ebꞌ 70 yin̈tilalcan vin̈ rey chiꞌ, junn̈ej yaj ebꞌ yedꞌ ebꞌ yichamtac vinaquil chon̈abꞌ ix ilan qꞌuibꞌ ebꞌ dꞌa Samaria chiꞌ. 7 Ayic ix schaan jun carta chiꞌ ebꞌ, ix syaman ebꞌ 70 yin̈tilal vin̈ rey chiꞌ ebꞌ, ix xicjiel sjolom ebꞌ yuj ebꞌ. Ix yacꞌanem sjolom ebꞌ chiꞌ ebꞌ dꞌa yol juntzan̈ mooch, ix yacꞌanbꞌat ebꞌ dꞌa vin̈aj Jehú dꞌa Jezreel chiꞌ. 8 Ix javi jun vin̈ checabꞌ dꞌa vin̈aj Jehú chiꞌ, ix yalan vin̈:

—Toxo ix icꞌchajcot sjolom ebꞌ yin̈tilal vin̈ rey, xchi vin̈.

Ix yalan vin̈aj Jehú chiꞌ:

—Chabꞌ juyan̈ tzeyutejcan dꞌa stiꞌ chon̈abꞌ tic. Ataꞌ scani masanto qꞌuicꞌan, xchi vin̈.

9 Axo dꞌa junxo cꞌu, ix bꞌat vin̈aj Jehú chiꞌ, ix och lin̈an vin̈ dꞌa tiꞌ chon̈abꞌ chiꞌ, ix yalan vin̈ dꞌa masanil ebꞌ anima:

—A ex tic, malaj e mul. A in ix in milcham vin̈ co reyal yuj vicꞌanel vin̈ dꞌa yopisio, palta ¿mach ix milancham masanil juntzan̈ ebꞌ tic? 10 A ticnaic scham val eyojtacaneli to a masanil tas yalnaccan Jehová dꞌa yibꞌan̈ ebꞌ yin̈tilal vin̈aj Acab, malaj junoc man̈ ol elcꞌochoc. Van yelcꞌoch masanil tas schecnac Jehová yalcanel vin̈aj Elías schecabꞌ, xchi vin̈aj Jehú chiꞌ.

11 A vin̈aj Jehú chiꞌ, ix smilcham juntzan̈ scꞌabꞌ yoc vin̈aj Acab chiꞌ vin̈ dꞌa Jezreel, aton ebꞌ nivac vinac yaji yedꞌ ebꞌ yamigo vin̈aj Acab chiꞌ yedꞌ ebꞌ yacꞌnacoch vin̈ sacerdoteal. Man̈xo junoc ebꞌ ix cani.

12 Ix lajvi chiꞌ ix bꞌat vin̈aj Jehú chiꞌ dꞌa Samaria. Ayic van sbꞌat vin̈ chiꞌ dꞌa yol bꞌe, ix cꞌoch vin̈ dꞌa jun bꞌaj tzꞌajtaxon ebꞌ tan̈vum calnel. 13 Ataꞌ ix schalaj sbꞌa vin̈ yedꞌ juntzan̈ ebꞌ scꞌabꞌ yoc vin̈aj Ocozías sreyal Judá, ix scꞌanbꞌan vin̈ dꞌa ebꞌ:

—¿Mach ex a ex tic? xchi vin̈ dꞌa ebꞌ.

Ix tacꞌvi ebꞌ dꞌa vin̈:

—A on̈ tic ayto cuj co bꞌa yedꞌ vin̈aj Ocozías, on̈ javi cacꞌ stzatzil scꞌol ebꞌ vin̈ yuninal vin̈ rey yedꞌ ebꞌ yuneꞌ ix reina Jezabel, xchi ebꞌ.

14 Ix yalan vin̈aj Jehú dꞌa ebꞌ ajun yedꞌoc:

—Yamec ebꞌ, xchi vin̈.

Axo ebꞌ ajun yedꞌ vin̈ chiꞌ ix yaman ebꞌ, ix smilancham ebꞌ vin̈ dꞌa stiꞌ jun aꞌ ucꞌbꞌil aꞌ scuch Bet-equed bꞌaj tzꞌajtaxon ebꞌ tan̈vum calnel chiꞌ. 42 ebꞌ dꞌa smasanil, man̈xo junoc ebꞌ ix cani.

15 Ayic ix elxi vin̈aj Jehú chiꞌ taꞌ, ix schalan sbꞌa vin̈ yedꞌ vin̈aj Jonadab yuninal vin̈aj Recab. Ix yacꞌan stzatzil scꞌool vin̈ vin̈aj Jehú chiꞌ, ix yalan vin̈:

—¿Mecꞌan ach am vedꞌoc, icha in tic vachꞌ in naan dꞌa a patic? xchi vin̈.

—Iꞌ, vachꞌ toni, xchi vin̈aj Jonadab chiꞌ dꞌa vin̈.

—Tato icha chiꞌ an, acꞌcot a cꞌabꞌ dꞌayin, xchi vin̈aj Jehú chiꞌ dꞌa vin̈.

Ix yacꞌanbꞌat scꞌabꞌ vin̈aj Jonadab chiꞌ dꞌa vin̈, ix yicꞌanqꞌue vin̈ vin̈ dꞌa yol scarruaje chiꞌ. 16 Ix yalan vin̈aj Jehú chiꞌ dꞌa vin̈ icha tic:

—Con̈ vedꞌoc, ol in chꞌox ilaꞌ tas ol vutej yic tzin cꞌanabꞌajej tas ix yal Jehová, xchi vin̈.

Yuj chiꞌ ix yicꞌbꞌat vin̈aj Jonadab chiꞌ vin̈ dꞌa yol scarruaje chiꞌ. 17 Ayic ix cꞌoch vin̈aj Jehú chiꞌ dꞌa Samaria, ix smilancham masanil ebꞌ yin̈tilal vin̈aj Acab vin̈ taꞌ, aton ebꞌ pitzanto ix cani. Yuj chiꞌ pilan ix satel ebꞌ smasanil yuj vin̈, icha ajnac yalan Jehová dꞌa vin̈aj Elías.

18 Ix lajvi chiꞌ, ix smolbꞌan masanil chon̈abꞌ vin̈aj Jehú chiꞌ, ix yalan vin̈:

—A vin̈aj Acab, quenn̈ej ochnac vin̈ ejmelal dꞌa Baal, a inxo pax tic, ecꞌbꞌalto ol in och ejmelal dꞌa Baal chiꞌ. 19 Yuj chiꞌ avtejec masanil ebꞌ vin̈ schecabꞌ Baal yedꞌ mach tzꞌochtaxon ejmelal dꞌay yedꞌ masanil ebꞌ sacerdote yaj dꞌay. Man̈xa junoc mach max javi, yujto ol in bꞌo jun nivan silabꞌ yuj vicꞌanchaan̈ Baal chiꞌ. A mach max javi, yovalil tzꞌoch chamel dꞌa yibꞌan̈, xchi vin̈.

Palta ton̈ej ix yal jun chiꞌ vin̈, masanil ebꞌ tzꞌoch ejmelal dꞌa Baal ol satel vin̈. 20 Yuj chiꞌ ix schec vin̈ alchajeli to ol och qꞌuin̈ yic tzꞌicꞌjichaan̈ Baal chiꞌ. 21 Ix lajvi chiꞌ, ix yacꞌanbꞌat schecabꞌ vin̈ dꞌa masanil yol smacbꞌen Israel to yovalil scꞌoch masanil ebꞌ tzꞌoch ejmelal dꞌa Baal dꞌa stemplo. Yuj chiꞌ man̈xa junoc mach maj cꞌochoc. A templo yic Baal chiꞌ, te bꞌudꞌan ix aji. 22 Ix yalan vin̈aj Jehú chiꞌ dꞌa ebꞌ molum pichul to tzꞌicꞌjielta spichul ebꞌ tzꞌochtaxon ejmelal dꞌa Baal, ix scꞌanabꞌajej ebꞌ yicꞌanelta. 23 Ix lajvi chiꞌ ix och vin̈ yedꞌ vin̈aj Jonadab dꞌa yol templo chiꞌ, ix yalan vin̈ dꞌa ebꞌ tzꞌoch ejmelal dꞌa Baal chiꞌ:

—Scham eyilani to malajocabꞌ ebꞌ tzꞌoch ejmelal dꞌa Jehová ayecꞌ dꞌa e cal tic, an̈ejocabꞌ mach tzꞌoch ejmelal dꞌa Baal ayeqꞌui, xchi vin̈ dꞌa ebꞌ.

24 Yuj chiꞌ ayic toxo ix och ebꞌ tzꞌoch ejmelal dꞌa Baal chiꞌ dꞌa yol stemplo chiꞌ, ix yacꞌan silabꞌ ebꞌ sn̈usji yedꞌ juntzan̈xo silabꞌ. Yacbꞌan van yacꞌan silabꞌ ebꞌ chiꞌ, ayxo och oyan 80 ebꞌ soldado yuj vin̈aj Jehú dꞌa spatic templo chiꞌ, ix yalcan vin̈ dꞌa ebꞌ to malaj junoc mach schael ebꞌ:

—Tato ay junoc mach schaanel junoc ebꞌ ayoch ejmelal chiꞌ, axo scham sqꞌuexuloc, xchi vin̈.

25 Ayic ix lajvi yacꞌji silabꞌ chiꞌ, ix yalan vin̈aj Jehú dꞌa ebꞌ soldado yedꞌ dꞌa ebꞌ capitán:

—Ochan̈ec, mileccham ebꞌ. Man̈xa junoc mach tze chaeli, xchi vin̈.

Yuj chiꞌ ix och ebꞌ soldado vin̈ chiꞌ, ix smilancham masanil ebꞌ anima chiꞌ ebꞌ dꞌa qꞌuen espada. Ix lajvi chiꞌ ix yicꞌanelta ebꞌ chamnac chiꞌ ebꞌ dꞌa spatiquel templo chiꞌ. Ix och ebꞌ dꞌa yedꞌtal Baal dꞌa yol templo chiꞌ. 26 Masanil juntzan̈ yechel ix yiqꞌuelta ebꞌ, ix sn̈usantzꞌa ebꞌ. 27 Icha chiꞌ ix aj satanel Baal chiꞌ ebꞌ. Ix sjuanem lan̈naj templo chiꞌ ebꞌ smasanil, yicxo bꞌaj schulaj anima ix ajn̈ejcani.

28 Icha chiꞌ ix aj satanel ejmelal vin̈aj Jehú dꞌa Baal dꞌa cal chon̈abꞌ Israel. 29 Vachꞌchom icha chiꞌ ix scꞌulej vin̈aj Jehú chiꞌ, palta maj yiqꞌuel-laj sbꞌa vin̈ dꞌa chucal scꞌulejnac vin̈aj Jeroboam yuninal vin̈aj Nabat, vin̈ cuchbꞌannac ebꞌ yetisraelal dꞌa chucal. Maj satel-laj juntzan̈ yechel vacax vin̈, aton juntzan̈ nabꞌa oro aycan dꞌa Dan yedꞌ dꞌa Betel.

30 Ix yalan Jehová dꞌa vin̈: Yujto tojol tas ix a cꞌulej dꞌa vichan̈, ix a cꞌanabꞌajej a satanel ebꞌ yin̈tilal vin̈aj Acab chiꞌ icha val ix aj valani, a ebꞌ in̈tilal, ol ochn̈ej ebꞌ reyal masanto dꞌa schan̈il macan̈, xchi dꞌa vin̈.

31 Vachꞌchom icha chiꞌ, palta maj yacꞌvaloch vin̈ dꞌa scꞌol scꞌanabꞌajan schecnabꞌil Jehová sDiosal Israel, yujto maj yiqꞌuel sbꞌa vin̈ dꞌa chucal scꞌulejnac vin̈aj Jeroboam vin̈ cuchbꞌannac ebꞌ yetisraelal dꞌa chucal.

32-33 A dꞌa jun tiempoal chiꞌ, ix och ijan Jehová yicꞌanecꞌ lum sluum ebꞌ israel. A vin̈aj Hazael sreyal Siria ix icꞌanecꞌ lum dꞌa scꞌaxepalecꞌ aꞌ Jordán dꞌa stojolal bꞌaj sjavi cꞌu, aton lum yic ebꞌ yin̈tilal Gad, lum yic ebꞌ yin̈tilal Rubén yedꞌ lum yic nan̈alxo ebꞌ yin̈tilal Manasés, ix cotn̈ej dꞌa chon̈abꞌ Aroer dꞌa stiꞌ aꞌ Arnón tzꞌecꞌ dꞌa Galaad masanto dꞌa Basán.

34 A jantacto yabꞌixal vin̈aj Jehú yedꞌ tas ix scꞌulej vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 35-36 A vin̈aj Jehú chiꞌ, 28 abꞌil ix yacꞌ reyal vin̈ dꞌa ebꞌ yetisraelal dꞌa Samaria. Ayic ix cham vin̈, ix mucji vin̈ dꞌa Samaria chiꞌ, axo jun vin̈ yuninal vin̈ scuchan Joacaz ix ochcan reyal sqꞌuexuloc.