Ochnac vin̈aj Joram reyal
21
Ayic ix cham vin̈aj Josafat chiꞌ, ix mucchaj vin̈ yedꞌ ebꞌ smam yicham dꞌa schon̈abꞌ vin̈aj David. Axo vin̈aj Joram yuninal vin̈ ix ochcan reyal sqꞌuexuloc. 2-3 Ix acꞌji opisio yic reyal dꞌa vin̈aj Joram chiꞌ yuj vin̈ smam, yujto bꞌabꞌel unin vin̈. Axo ebꞌ vin̈ yucꞌtac vin̈, aton vin̈aj Azarías, vin̈aj Jehiel, vin̈aj Zacarías, vin̈aj Azarías, vin̈aj Micael yedꞌ vin̈aj Sefatías. Masanil ebꞌ vin̈ tic, yuninal ebꞌ vin̈ vin̈aj Josafat chiꞌ. Man̈ jantacoc qꞌuen oro yedꞌ qꞌuen plata ix siaj dꞌa ebꞌ vin̈ yuj vin̈ smam chiꞌ yedꞌ juntzan̈xo tas te caro stojol. Ix acꞌchajpax chon̈abꞌ te vachꞌ yajoch smuroal dꞌa ebꞌ vin̈, aton juntzan̈ ay dꞌa yol yic Judá. 4 Palta a vin̈aj Joram chiꞌ, ayic ix tecꞌcꞌaj vin̈ yedꞌ yopisio chiꞌ, ix smilancham masanil ebꞌ vin̈ yucꞌtac vin̈ chiꞌ, ix smilpaxcham juntzan̈xo ebꞌ vin̈ yajal vin̈ dꞌa smacbꞌen chiꞌ. 5 Ayic ix och vin̈ reyal chiꞌ, 32 abꞌil sqꞌuinal vin̈, vajxaqueꞌ abꞌil ix yacꞌ reyal vin̈ dꞌa Jerusalén. 6 An̈ej sbꞌeybꞌal ebꞌ vin̈ sreyal Israel ix sbꞌeybꞌalej vin̈ yedꞌ sbꞌeybꞌal ebꞌ yin̈tilal vin̈aj Acab, yujto a ix yetbꞌeyum vin̈, yisil ix vin̈aj Acab chiꞌ. Te chuc tas ix scꞌulej vin̈ dꞌa yichan̈ Jehová. 7 Palta yuj stiꞌ Jehová yacꞌnac dꞌa vin̈aj rey David to ol ochn̈ej yin̈tilal vin̈ reyal dꞌa masanil tiempo, yuj chiꞌ maj yal-laj scꞌol Jehová ix satel ebꞌ yin̈tilal vin̈aj David chiꞌ.8 Ayic ayoch vin̈aj Joram chiꞌ reyal, a ebꞌ aj Edom, ix yiqꞌuel sbꞌa ebꞌ dꞌa yalan̈ smandar Judá, ix yacꞌanoch sreyal ebꞌ schꞌocoj. 9 Yuj chiꞌ ix bꞌat vin̈aj Joram chiꞌ yedꞌ ebꞌ vin̈ yajalil ebꞌ soldado yedꞌ pax carruaje yic oval yic scanxi ebꞌ aj Edom chiꞌ dꞌa yol scꞌabꞌ ebꞌ. Palta a ebꞌ aj Edom chiꞌ, ix yoy sbꞌa ebꞌ dꞌa spatic ebꞌ. Axo dꞌacꞌvalil ix qꞌue vaan vin̈aj Joram chiꞌ yedꞌ ebꞌ vin̈ yajal yic carruaje yic syacꞌan oval ebꞌ. Icha chiꞌ ix aj sjacvi bꞌaj ix el ebꞌ. 10 A ebꞌ aj Edom chiꞌ, ix yacꞌ ganar ebꞌ yicꞌanel sbꞌa dꞌa yalan̈ smandar ebꞌ aj Judá chiꞌ, ix eln̈ejcan ebꞌ. Aton dꞌa jun tiempoal chiꞌ ix yicꞌpaxel sbꞌa chon̈abꞌ Libna, yujto ix yactejcan Jehová vin̈aj Joram chiꞌ, aton sDiosal ebꞌ smam yicham vin̈. 11 Ix sbꞌoanxiqꞌue juntzan̈ lugar yic ejmelal vin̈, aton bꞌajtac chaan̈ dꞌa yol yic Judá chiꞌ. Yuj chiꞌ masanil ebꞌ cajan dꞌa Jerusalén pit ix yutej sbꞌa dꞌa Jehová. Icha chiꞌ ix aj sjuviel spensar ebꞌ aj Judá chiꞌ yuj vin̈.
12 Yuj chiꞌ ataꞌ ix scha jun scarta vin̈aj Elías schecabꞌ Dios vin̈aj Joram chiꞌ, bꞌaj syal icha tic: A Jehová sDiosal vin̈ a mam icham aj David, aꞌ tzꞌalan dꞌayach: Man̈ vanoc a bꞌeybꞌalan sbꞌeybꞌal vin̈aj rey Josafat vin̈ a mam yedꞌ sbꞌeybꞌal vin̈aj Asa vin̈ a mam icham, 13 palta to a sbꞌeybꞌal ebꞌ vin̈ sreyal Israel van a bꞌeybꞌalani. Yuj chiꞌ masanil ebꞌ aj Judá yedꞌ ebꞌ aj Jerusalén, uuj pit syutej sbꞌa ebꞌ dꞌayin icha val sbꞌeybꞌal ebꞌ yin̈tilal vin̈aj Acab chiꞌ. An̈ejtonaꞌ ix a milpaxcham ebꞌ vin̈ ucꞌtac, a ebꞌ vin̈ chiꞌ vachꞌ sbꞌeybꞌal ebꞌ vin̈ dꞌa ichan̈. 14 Yuj chiꞌ ol vaqꞌuem jun yaelal dꞌa yibꞌan̈ a chon̈abꞌ tic, dꞌa yibꞌan̈ ebꞌ uninal, dꞌa yibꞌan̈ ebꞌ ix etbꞌeyum yedꞌ dꞌa yibꞌan̈ masanil tas ay dꞌayach. 15 A achxo tic, ay jun ilya ol javoc dꞌa ibꞌan̈. Ol och jun ya cꞌool dꞌayach, junjun cꞌu ol te nivtajoc, masanto ol yal yelta a chꞌan̈ tzaꞌ yuj jun ilya chiꞌ, xchi Jehová, xchi jun scarta vin̈aj Elías chiꞌ.
16 Yuj chiꞌ, a Jehová ix acꞌan scꞌulej ebꞌ filisteo yedꞌ ebꞌ árabe cajan dꞌa slacꞌanil Cus, ix cot ebꞌ yacꞌ yoval yedꞌ vin̈aj rey Joram chiꞌ. 17 Ix javi ebꞌ dꞌa Judá, ix yacꞌ ganar ebꞌ. Ix yicꞌbꞌat masanil bꞌeyumal ebꞌ, aton ay dꞌa spalacio vin̈ rey chiꞌ, ix icꞌchajbꞌat masanil yuninal vin̈ yedꞌ ebꞌ ix yetbꞌeyum vin̈. Axon̈ej vin̈aj Joacaz slajvubꞌ yuninal vin̈ ix cani. 18 Ayic ix lajvi yecꞌ masanil juntzan̈ chiꞌ, ix yacꞌanoch jun ilya Jehová dꞌa scꞌool vin̈aj Joram chiꞌ, man̈xa yan̈al. 19 Ix ecꞌ tiempo, ayic schabꞌil abꞌil yoch jun ilya chiꞌ dꞌa vin̈, ix elta schꞌan̈tzaꞌ vin̈ yuuj. Te ya ix aj scham vin̈. Ayic ix cham vin̈ chiꞌ, malaj junoc nivan cꞌacꞌ ix yacꞌoch ebꞌ anima, yujto malaj yelcꞌoch vin̈ dꞌa yol sat ebꞌ, palta ayic schamnac ebꞌ smam yicham vin̈, ochnac nivac cꞌacꞌ chiꞌ. 20 Ayic ix schaanel yich yacꞌan reyal vin̈aj Joram chiꞌ, 32 abꞌil sqꞌuinal vin̈. Vajxaqueꞌ abꞌil ix yacꞌ reyal vin̈ dꞌa Jerusalén. Malaj mach ix naan vin̈ ayic ix cham vin̈. Ix mucji vin̈ dꞌa schon̈abꞌ vin̈aj David, palta man̈oc bꞌaj smucchaj ebꞌ rey.