3 Ix te xiv vin̈aj Josafat chiꞌ, ix snaan vin̈ to syacꞌoch sbꞌa vin̈ dꞌa yol scꞌabꞌ Jehová, yuj chiꞌ ix yal vin̈ to masanil anima dꞌa yol yic Judá tzꞌoch dꞌa tzecꞌojcꞌolal. 4 Ix cot masanil anima dꞌa junjun chon̈abꞌ dꞌa yol yic Judá chiꞌ yic scꞌanan scolval Jehová ebꞌ yedꞌ vin̈. 5 Ix lajvi chiꞌ, ix qꞌue lin̈an vin̈aj Josafat chiꞌ dꞌa scal masanil ebꞌ anima molanecꞌ dꞌa Jerusalén chiꞌ, dꞌa yichan̈ jun acꞌ yamaqꞌuil stemplo Jehová. 6 Ix yalan vin̈ icha tic: Ach Jehová, co Diosal ach yedꞌ ebꞌ co mam quicham, a ach tic sDiosal ach satchaan̈, Yajal ach pax dꞌa yibꞌan̈ masanil chon̈abꞌ. Te nivan a poder, malaj junoc mach syal stecꞌbꞌan sbꞌa dꞌa ichan̈. 7 Ach co Diosal, a ach icꞌnaquel juntzan̈ anima cajan dꞌa sat luum tic, aton bꞌaj ayon̈ ecꞌ a on̈ a chon̈abꞌ Israel on̈ tic. Acꞌannaccan lum dꞌa juneln̈ej dꞌayon̈ a on̈ yin̈til on̈ can vin̈aj Abraham tic, aton vin̈ a vachꞌcꞌool. 8 Ayic cajnajnacxo ebꞌ co mam quicham dꞌa tic, sbꞌoannacqꞌue jun templo ebꞌ to ic yaji, yalannac ebꞌ icha tic: 9 Tato sjavi junoc yaelal dꞌa quibꞌan̈ ma junoc oval sjavi yuj co chucal, ma ilya, ma vejel, ol on̈ javoc dꞌa ichan̈ dꞌa a templo tic, yujto ayach ecꞌ dꞌay. A dꞌa scal co yaelal chiꞌ ol co cꞌan a colval, ol abꞌan tas ol co cꞌanaꞌ, ol on̈ a colani, xchi ebꞌ. 10 A ticnaic jun, ina yajecꞌ ebꞌ amonita, ebꞌ moabita yedꞌ ebꞌ cajan dꞌa tzalquixtac yic Seir, aton lum sluum ebꞌ bꞌaj maj yal a cꞌol ecꞌnaccot ebꞌ co mam quicham a on̈ israel on̈ tic ayic yelnaccot ebꞌ dꞌa Egipto, to sqꞌuexbꞌeejnac sbꞌa ebꞌ, maj satjiel-laj ebꞌ anima chiꞌ yuj ebꞌ. 11 Axo ticnaic jun, a tas tzꞌaj spacan jun chiꞌ ebꞌ dꞌayon̈, to snibꞌej ebꞌ syacꞌ oval quedꞌoc yic tzon̈ yiqꞌuel ebꞌ dꞌa lum luum acꞌnac co macbꞌenej tic. 12 Ach co Diosal, eloc val dꞌa a cꞌool to tzacꞌoch syaelal ebꞌ, yujto a on̈ tic malaj quip yic sco tecꞌbꞌan co bꞌa dꞌa yichan̈ jantac ebꞌ soldado van sjavi yacꞌ oval dꞌa tic. Man̈ cojtacoc tas val sco cꞌulej, yuj chiꞌ a dꞌayach scacꞌoch co pensar, xchi vin̈ rey chiꞌ dꞌa Jehová.

13 Masanil ebꞌ aj Judá, lin̈anqꞌue ebꞌ dꞌa yichan̈ Jehová yedꞌ masanil yetbꞌeyum yedꞌ yal yuninal ebꞌ, vachꞌchom ebꞌ te cotacto. 14 Ay jun vin̈ levita yin̈tilal vin̈aj Asaf scuchan Jahaziel yuninal vin̈aj Zacarías, yixchiquin vin̈aj Benaías yuninal vin̈aj Jeiel, yixchiquin vin̈aj Matanías. Ix och Yespíritu Jehová dꞌa vin̈, 15 yuj chiꞌ ix yal vin̈ icha tic: Abꞌec val ex aj Judá, ex aj Jerusalén yedꞌ ach rey Josafat. Xchi val Jehová icha tic: Man̈ ex xivoc, man̈ eyec xiv e bꞌa dꞌa yichan̈ jantac soldado chiꞌ, yujto a jun oval chiꞌ, man̈ eyicoc, palta vic a in Dios in tic. 16 A qꞌuicꞌan tzex emcꞌoch eyacꞌ oval yedꞌ ebꞌ. Sqꞌueul ebꞌ dꞌa lum svitzal yic Sis, yic tze chalan e bꞌa yedꞌ ebꞌ dꞌa stitac a aꞌ tzꞌecꞌ dꞌa tzꞌinan lum yic Jeruel. 17 Man̈oc ex ol eyacꞌ oval chiꞌ, palta ton̈ej ol ex aj taꞌ, malaj tas ol e cꞌulej, ton̈ej ol eyilaꞌ tas ol aj ex in colani, xchi Jehová. Yuj chiꞌ e masanil ex cajan ex dꞌa Jerusalén yedꞌ dꞌa Judá, man̈ ex xivoc, man̈ eyec xiv e bꞌa. Tzex bꞌat qꞌuicꞌan chiꞌ, yujto a Jehová ayoch quedꞌoc, xchi vin̈.

18 Yuj chiꞌ, ix em cumnaj vin̈aj Josafat chiꞌ, ix emcꞌoch snan̈al sat vin̈ dꞌa sat luum, ix empax cumnaj masanil ebꞌ aj Judá yedꞌ ebꞌ aj Jerusalén chiꞌ, ix yacꞌanem sbꞌa ebꞌ dꞌa yichan̈ Jehová. 19 Ay juntzan̈ ebꞌ levita yin̈tilal vin̈aj Coat yedꞌ ebꞌ yin̈tilal vin̈aj Coré, ix syamanoch ebꞌ sbꞌitan dꞌa chaan̈, syalan vachꞌ lolonel ebꞌ dꞌa Jehová sDiosal Israel.

20 Axo dꞌa qꞌuin̈ibꞌalil dꞌa junxo cꞌu chiꞌ, acꞌvalto ix qꞌue van ebꞌ smasanil, ix bꞌat ebꞌ dꞌa sbꞌeal tzꞌinan luum yic Tecoa. Ayic van sbꞌat ebꞌ chiꞌ, ix och tecꞌtecꞌ vin̈aj Josafat, ix yalan vin̈ dꞌa ebꞌ icha tic: Abꞌec tas ol val ex aj Jerusalén yedꞌ ex aj Judá: Caqꞌuecoch Jehová co Diosal yipoc co cꞌool, malaj tas ol on̈ icꞌanoc, scacꞌanpaxoch ebꞌ schecabꞌ Dios tic yipoc co cꞌool yic vachꞌn̈ej ol aj quelcꞌochi, xchi vin̈ dꞌa ebꞌ.

21 Ayic toxo ix lajvi slolon vin̈ yedꞌ ebꞌ chon̈abꞌ chiꞌ, ix sicꞌanel juntzan̈ ebꞌ sbꞌitan vin̈. Ix yacꞌanoch spichul ebꞌ yic yopisio yic bꞌit. Ix bꞌabꞌlaj ebꞌ yuj ebꞌ soldado. Syalan vachꞌ lolonel ebꞌ dꞌa Jehová dꞌa bꞌital icha tic: Caqꞌuec yuj diosal dꞌa Jehová, yujto tzon̈ xajanej dꞌa masanil tiempo, xchi ebꞌ.

22 Ayic ix schaanel yich ebꞌ sbꞌitan vachꞌ lolonel chiꞌ dꞌa tzalajcꞌolal chiꞌ, axo Jehová ix acꞌanoch somcꞌolal dꞌa scal ebꞌ van scot yacꞌ oval yedꞌ ebꞌ aj Judá chiꞌ, aton ebꞌ amonita, ebꞌ moabita yedꞌ ebꞌ ix cot dꞌa tzalquixtac yic Seir chiꞌ. Yuj chiꞌ ix acꞌji ganar ebꞌ. 23 Yujto a ebꞌ amonita yedꞌ ebꞌ moabita chiꞌ, ix och ebꞌ yacꞌ oval yedꞌ ebꞌ ix cot dꞌa Seir chiꞌ, ix lajviel ebꞌ smasanil yuj ebꞌ. Ix lajvi chiꞌ, axon̈ej ebꞌ ix yutej sbꞌa, ix satlanel sbꞌa ebꞌ. 24 Axo yic ix cꞌoch ebꞌ vin̈ vinac yic Judá bꞌaj chequel lum tzꞌinan luum, ix yilanbꞌat ebꞌ vin̈ to a ebꞌ ajcꞌol chiꞌ latzꞌanem ebꞌ dꞌa sat lum schami, man̈xa junoc ebꞌ ixto elcani. 25 Yuj chiꞌ ix bꞌat vin̈aj Josafat yedꞌ ebꞌ soldado ajun yedꞌoc chiꞌ, yic sbꞌat sicꞌanchaan̈ ebꞌ masanil tas ix can yuj ebꞌ ajcꞌol ix cham chiꞌ. Ix ilchaj yamcꞌabꞌ yuj ebꞌ, pichul yedꞌ juntzan̈xo tas te caro stojol. Yuj chiꞌ tzijtum tas ix yicꞌ ebꞌ, palta ayto tas majxo tzacꞌvan ebꞌ yicꞌancoti. A jantac tas ix yicꞌcot ebꞌ chiꞌ, oxeꞌ cꞌual ix yacꞌ ebꞌ smolanqꞌuei.

26 Axo dꞌa schan̈il cꞌual, ix smolbꞌan sbꞌa ebꞌ dꞌa jun acꞌlic scuchan Beraca. Ataꞌ ix yal vachꞌ lolonel ebꞌ dꞌa Jehová. Yuj chiꞌ span̈anil Beraca ix sbꞌiejcan jun lugar chiꞌ yuj ebꞌ. (Beraca syalelcꞌochi aloj vachꞌ lolonel.) 27 Ix lajvi chiꞌ, dꞌa tzalajcꞌolal ix bꞌabꞌlaj vin̈aj Josafat yuj ebꞌ aj Judá yedꞌ ebꞌ aj Jerusalén, yujto a Jehová ix acꞌan jun tzalajcꞌolal chiꞌ dꞌa ebꞌ yujto ix acꞌji ganar ebꞌ ajcꞌol chiꞌ. 28 Axo ix javi ebꞌ dꞌa Jerusalén, ix bꞌat ebꞌ dꞌa stemplo Jehová yedꞌ sonal salterio, teꞌ cítara yedꞌ qꞌuen trompeta.

29 Ayic ix abꞌchaji to a Jehová ix acꞌan oval yedꞌ ebꞌ ayoch ajcꞌolal dꞌa ebꞌ israel chiꞌ, ix te xiv masanil juntzan̈xo nación dꞌa Dios chiꞌ. 30 Juncꞌolal ix yacꞌ reyal vin̈aj Josafat chiꞌ, yujto a Dios ix acꞌan juncꞌolal dꞌa scal vin̈ yedꞌ juntzan̈xo chon̈abꞌ dꞌa slacꞌanil chiꞌ.

31 Ayic 35 abꞌil sqꞌuinal vin̈aj Josafat chiꞌ ix schaanel yich vin̈ yacꞌan reyal dꞌa Judá, 25 abꞌil ix yacꞌ reyal vin̈ dꞌa chon̈abꞌ Jerusalén. Azuba sbꞌi ix snun vin̈, yisil ix vin̈aj Silhi.

32 A vin̈aj Josafat chiꞌ, vachꞌn̈ej ix yutej sbꞌa vin̈ icha ix yutej sbꞌa vin̈aj Asa smam vin̈. Masanil tas ix scꞌulej vin̈, tojoln̈ej dꞌa yichan̈ Jehová. 33 Palta a juntzan̈ lugar yic ejmelal bꞌajtac chaan̈, maj yiqꞌuel-laj vin̈, yujto man̈ masaniloc ebꞌ anima tecꞌanxo spensar yoch tzacꞌan yuj sDiosal ebꞌ yedꞌ smam yicham.

34 A jantacto yabꞌixal vin̈aj Josafat chiꞌ ayic ix el yich, masanto ix lajvi, tzꞌibꞌabꞌilcan dꞌa yumal yic vin̈aj Jehú yuninal vin̈aj Hanani, junn̈ej yajcan yedꞌ yumal yabꞌixal ebꞌ vin̈ sreyal Israel.

35 Axo dꞌa slajvubꞌal sreyal vin̈aj Josafat chiꞌ, ix sbꞌoan strato vin̈ yedꞌ vin̈aj Ocozías sreyal Israel. A jun vin̈ rey chiꞌ, te chuc spensar vin̈. 36 Ix sbꞌo juntzan̈ teꞌ barco ebꞌ vin̈ yic sbꞌat dꞌa chon̈abꞌ Tarsis. A dꞌa chon̈abꞌ Ezión-geber ix sbꞌo teꞌ ebꞌ vin̈. 37 Yuj chiꞌ, a vin̈aj Eliezer aj Maresa yuninal vin̈aj Dodava ix alan jun lolonel tic dꞌa vin̈aj Josafat chiꞌ: Yujto junn̈ej ix utej a bꞌa yedꞌ vin̈aj Ocozías, yuj chiꞌ a Jehová chocꞌ ol utanbꞌat masanil tas ix a bꞌo tic, xchi vin̈. Yuj chiꞌ, chocꞌ ix aj juntzan̈ teꞌ barco ix sbꞌo ebꞌ vin̈ chiꞌ, majxo yal-laj sbꞌat teꞌ dꞌa Tarsis chiꞌ.