Ix cachji vin̈aj Josafat yuj vin̈aj Jehú
19
Ix lajvi chiꞌ, ix meltzajxi vin̈aj Josafat chiꞌ dꞌa spalacio dꞌa Jerusalén. 2 Ix elta vin̈aj Jehú schecabꞌ Dios yuninal vin̈aj Hanani scha vin̈ rey chiꞌ, ix yalan vin̈ icha tic: ¿Tas yuj ix ach colvaj yedꞌ jun vin̈ chuc spensar chiꞌ? ¿Tas yuj vachꞌ acꞌan yedꞌ jun vin̈ ayoch ajcꞌolal dꞌa Jehová? Yuj chiꞌ toxo ix cot yoval Jehová dꞌayach. 3 Palta jun, ayto val juntzan̈xo tas vachꞌ yoch a vachꞌiloc, yujto ix a satel yechel Asera dꞌa yol a macbꞌen tic, ix acꞌanpaxoch dꞌa a cꞌol acꞌan servil Dios, xchi vin̈aj Jehú chiꞌ dꞌa vin̈.Ix acꞌchajoch ebꞌ vin̈ juez yuj vin̈aj Josafat
4 A dꞌa Jerusalén cajan vin̈aj Josafat chiꞌ, palta ay jun smodo vin̈, to sbꞌat vin̈ yil juntzan̈xo schon̈abꞌ, schacot vin̈ dꞌa Beerseba, masanto sqꞌuecꞌoch vin̈ dꞌa lum tzalquixtac dꞌa yol yic Efraín. Tzꞌecꞌ vin̈ yic syacꞌxioch sbꞌa ebꞌ anima dꞌa Jehová sDiosal ebꞌ yedꞌ ebꞌ smam yicham. 5 Ix acꞌjioch ebꞌ vin̈ juez yuj vin̈ dꞌa junjun chon̈abꞌ ayoch smuroal ay dꞌa yol yic Judá chiꞌ. 6 Ix yalan vin̈ dꞌa ebꞌ vin̈ juez chiꞌ icha tic: Scham val eyilan tas ol e cꞌulej, yujto man̈oc tas snibꞌej ebꞌ anima ol e cꞌulej, palta to a val tas snibꞌej Jehová. Ol ochn̈ej Jehová chiꞌ eyedꞌoc yic tze bꞌoan yaj yoval ebꞌ anima. 7 Yuj chiꞌ, nivanocabꞌ yelcꞌoch Jehová dꞌa e sat, scham val eyilan tas ol e cꞌulej, yujto a Jehová co Diosal, man̈ ol techaj yuuj tato ay tas man̈ vachꞌoc ol e cꞌulej, tato ay sqꞌuexan̈il anima dꞌa yol e sat, mato ol e cha qꞌuen tumin dꞌa elcꞌaltac, xchi vin̈.
8 An̈ejtonaꞌ ix sicꞌanpaxelta juntzan̈ ebꞌ vin̈ levita vin̈, ebꞌ vin̈ sacerdote yedꞌ juntzan̈ ebꞌ vin̈ yajal yaj dꞌa junjun macan̈ ebꞌ cajan dꞌa Jerusalén chiꞌ, yic tzꞌoch ebꞌ vin̈ juezal yic scꞌaybꞌaj ebꞌ anima chiꞌ yuj ebꞌ vin̈ dꞌa sley Jehová yedꞌ yic sbꞌoan yaj yoval ebꞌ anima chiꞌ ebꞌ vin̈ dꞌa Jerusalén chiꞌ. 9 Ix yacꞌancan juntzan̈ checnabꞌil tic vin̈ dꞌa ebꞌ vin̈ icha tic: A ex tic, ol eyil eyopisio tic, ayocabꞌ yelcꞌoch Jehová dꞌa e sat, tze cꞌanabꞌajani, vachꞌn̈ej tzeyutej e bꞌa. 10 Yaln̈ej tas yaj yoval ebꞌ quetchon̈abꞌ tic, ol javoc ebꞌ dꞌayex, ma yuj ebꞌ ay dꞌa juntzan̈xo chon̈abꞌ, tato aꞌ yuj junoc lolonel, ma yuj macꞌojcham anima, ma juntzan̈xo tas tzꞌel scꞌulan ebꞌ to man̈ ichaoc yalan sley Jehová, tze bꞌo yaj dꞌa ebꞌ. Scham val e cachan ebꞌ yic max och smul ebꞌ dꞌa Jehová, yic max cot yoval dꞌa eyibꞌan̈ yedꞌ dꞌa yibꞌan̈ ebꞌ. Vachꞌn̈ej tzeyutej e bꞌa, yic man̈ ol och e mul. 11 A vin̈aj Amarías sat sacerdote yaji, an̈ej vin̈ syal yalani tas ol aj sbꞌo tastac yic Jehová. Axo vin̈aj Zebadías yuninal vin̈aj Ismael, yajal yaj vin̈ dꞌa scal ebꞌ yin̈tilal Judá, an̈ej vin̈ syal yalan tas ol aj pax yic vin̈ rey yaji. Ol colvaj pax ebꞌ vin̈ levita eyedꞌoc. Tecꞌan tzeyutej e bꞌa, aqꞌuec eyip dꞌa eyopisio tic. A mach vachꞌn̈ej tas ol scꞌulej, ol ochn̈ej Jehová yedꞌoc, xchi vin̈.