O buku vai na dao riori bono ‘vaaree mataa ne Jisu Karisito a Sipoana to kino roho e Maaka.’

A aba to kino bono buku vai saka sue tavusu haa ni bene eve komano buku.

Evehee o aba o bero na boha vo rien e Jon Maaka to kino.

Eove a too Jiu to vamanamana bene Karisito.

Eara na ante rara tea nata nie Maaka beara ahe a meha maa hum va teo Niu Testamen (Aposol 12:12, 25; 13:5, 13; 15:37-39;

Kolosi 4:10;

1 Piitaa 5:13).

Eori saka nata vamataa haa ni rori bono vuri to kino roho e Maaka bono buku vai,

eori he na boha vo rien,

e Maaka na kino bono buku vai tobina 60-70 AD.

Eove na kino momohu bono buku Maaka,

me Maatiu,

Luk,

ae Jon paa kare kino bona maa buku teori.

E Maaka saka pate teitei haa me roho bene Jisu,

e Jisu he tea tei teo munana.

Eove he na gono vaasusu roho te Piitaa,

a disaepol te Jisu,

mepaa kino bona maa vahutate vai to baitonoe te Piitaa teo buku vai.

E Maaka na teitei Rom,

eove he tea kino bono buku vai.

Eve na kino kiri bona ta Jentael va Rom vai to vamanamana roho bene Jisu Karisito.

Eori saka ta Jiu haari,

me Maaka na sue vamaaraa kiri na bari bona maa taatate tea ta Jiu (Maaka 7:3-4).

A Rom na tei vananaoana kahi nana bona Israel,

ei o hum to paku roho e Jisu Karisito bona maa kiu teve.

E Maaka na kino bono buku vai teo vuri a gavaman va Rom he tea koma hata ribona maa tavaan vai to vamanamana rori bene Jisu Karisito.

Meo buku te Maaka na haihai nana tea vaakikisi ribene eori to murimurina bata bene Jisu Karisito,

eori he tatana batari bona maa siitore.

Eara na ante rara tea kiri o buku Maaka teo buaku o hum.

O hum momohu (Maaka 1:3-8:30) na sue tavusu ni nana bene Jisu.

Eara na tara vo raen,

e Jisu na vaakao tavusu ribono oraa,

bara na vatagae ribene eori o kamisi ae na paku bona maa taba vakaravi komana.

Amaa taba vai na paku e Jisu tea vataaree me karaara voen,

e Jisu e Karisito a Sipoana.

Saka aba pinopino haana,

ge saka poropita koa haana.

Ahiki.

E Jisu a Sipoana ae a Baiko te Hunavaan.

Na takino vamaaraa nana tea ves 8:29,

e Jisu he hivi ribono disaepol,

“Eam he na boha vo nomen enaa eteie?”

Me Piitaa paa sue,

“Ean e Karisito a Sipoana.”

O vabuaku o hum (Maaka 8:31–16:20) na sue nana bona pusuna nomaa te Jisu vo teo munana.

Eara pasi tara vea taba to tapaku ki bene Jisu,

eove he tea nao bata vo Jerusalem,

bara eove he tea tei teebona,

ore suguna tea mate ae sun vahaa teve.

E Jisu na sue varaba kiri bono disaepol teve voen,

eori to koma hata ni rori bari pasi asun vamateu bari,

eove repaa sun vahaa tea mate.

Amaa vuri amaa bero to sue varaba kirie bari bono moroko vai (Maaka 8:31;

9:9-10,

31; 10:33-34; 14:21, 28). Maaka 10:25 na sue vamaaraa ni nana bona pusuna nomaa te Jisu: “tea hee ni bona tootoo teve, eove re voni vaha ribona bero a aba tea maa matapaku vahata teori.”