E Jisu na sue bona maa taba to vaahata nana bona vuha na aba
Mt 15:1-20
7
O Paresii bara o meha papa siisia va tea lo,
to nomaa taneo Jerusalem,
na taonun taviri bene Jisu.
Maaka 7:1-23
2 Meori paa tara ribona meha papa disaepol teve,
eori he tea ani,
a kuririori he o paru.
Saka garuhu haa ori.
3 (O Paresii ae a kavara ria ta Jiu na kikira kurusu ni rori bona maa taatate tea ba suburiori.
Eori saka ante haari tea ani,
beori mei rori tea garuhu vanenesi bona kuririori.
4 Beori tavusu ma teo hum totoana,
saka ante kurusu haari tea ani,
beori mei rori tea garuhu vanenesi bona kuririori.
Eori mee na kikira kurusu ni rori bona meha maa taatate va tea garuhu kaapu,
guvi,
ae keetoro.)
5 Meo Paresii bara o siisia va tea lo paa hivi bene Jisu,
“Sovee meo disaepol tean saka murina haari bona maa taatate to hee gunaha ni ma roho a ba suburaara?
Eori toro goe tea ani bea kuririori paru nana.”
6 Me Jisu paa sue kiri bari,
“E Aesaia na paku roho bona sue varaba vai a suuna,
eove he suu piipiku ni ka roho ameam.
Eove na kino roho bono moroko te Hunavaan to boha vo naen,
‘Amaa tavaan vai na vasisio koa ni kanom anaa teo moroko teori,
evehee a vuhariori na nanaoana kahi nom anaa.
7 Eori na vaasunano pinopino koa nom anaa.
Amaa vaasusu teori amaa vakokona teo aba koa,
eori he na vaasusu ni rori bari potee bona maa lo te Hunavaan.’a
8 Eam na varakaha nia maa vamora te Hunavaan,
meam paa ato vakikisi nia maa taatate teo aba.”
9 Meve paa hivi ribari,
“Eam bene na boha vo nomen,
eam na mataa nom beam vaatei vaavaha amaa vamora te Hunavaan,
eam re murina nom amaa taatate team komana?
10 Enaa na sue vo nomen,
tea tabae e Moses na boha vo roho en,
‘Vasisio ni ere tamaman bo sinaman,’b
mepaa sue pete,
‘A aba to kaesi hata ni nana bene tamanae bo sinanae,
toro asun vamate ori.’c
11 “Evehee eam na boha vo nomen,
a aba na ante nana tea sue ki bene tamanae bo sinanae voen,
‘Enaa saka ante haa nom tea haihai ameam,
tea tabae a taba toro paa heu naan a Korban’”d (to kao vo naen a taba heehee vo te Hunavaan).
12 Meam saka vaamanaata haa ki nom ee tea paku ta taba mene haihai bene tamanae bo sinanae.
13 Eam na kaku nom a koara te Hunavaan bona maa taatate to hee gunaha ni nomeam tea maa tavaan.
Mea bero amaa kaku matapaku vai to paku nomeam.”
14 Me Jisu paa dadao haabana ribono vaagum vo teve,
mepaa sue kiri bari,
“Baitono amanaa,
kavara meam kurusu,
eam re kona voen,
15 ahiki ta taba vai to hopo nana tea aba beve ani bona to vaahata nana bona vuhanae.
Evehee a taba vai to tavusu maana vuhanae,
eve amaa taba to vaahata nana bona aba.”
16 e17 Me Jisu paa kaokahi ribono vaagum,
mepaa hovo komana inu,
meo disaepol teve paa hivi bari bono vaaviararaa vai.
18 Meve paa sue kiri bari,
“Eam mee bene saka bin kona vakisi?
Eam toro nata voen,
ahiki ta taba vai to hopo nana tea aba beve ani bona to vaahata nana bona vuhanae.
19 Ei kou saka kaakoo haana vuhanae,
evehee na kaakoo nana tea hiapa nae,
orepaa tataeana vaha ni bona.”
(E Jisu na sue vai roho nana bona maamihu taba-ani amaa tahavi tea ani.)
20 Mepaa sue pete,
“A tabae to tavusu maana vuha na aba,
eove to vaahata nana bona.
21 Tea komana vuha na aba to tavusu maana amaa vakokona vai amaa hata,
a varevaren,
a kaveru,
a asun vamate aba,
22 a rahi unun,
o matapaku va tea teki a meha aba,
o piku,
o matapaku va tea varevaren mataria maa vaagum ahiki ta pote,
a puuhio,
a moroko vahatahata rio meho aba,
a hahaara ae a babaaruu.
23 Kavara na maa matapaku vahata bona,
na tavusu maana vuha na aba.
Eve to vaahata nana bona.”
O koma vamanamana tea moon va Jentael
Mt 15:21-28
24 Mere Jisu paa kaokahi bono hum bona,
meori paa nao vo teo hum va rapana taun va Taea,
meori paa hovo tea peha inu.
E Jisu saka rake haa be ta aba kona voen,
eove na tei nana teebona.
Evehee eove saka ante haa tea varavihi.
Maaka 7:24-37
25 Mea moon paa pahin baitono ni ma bene Jisu,
a si baiko moon teve a hopo oraa.
Mepaa nao vo nao te Jisu,
mepaa vatokono moonae.
26 A moon bona a too Jentael,f
na vahuhu roho Ponisia ei Siria.
Meve paa uku ki bene Jisu,
eove re vaakao tavusu bona taun hata kahi bona baiko moon teve.
27 Me Jisu paa sue ki bona,
“O baiko toro ani vamahun momohu roho,g
ei kou saka mataa haana benaa gono a berete teo vahara baiko,
enaa repaa tasu ki riori bono kahi.”
28 Mea moon paa sue,
“Na mana nana,
Sunano,
evehee o kahi vai mee to tei rori paana teevoro na ani-ani batari bona dedevuhu taba-ani teo baiko.”
29 Me Jisu paa sue ki bona,
“Suku bono vataena tean,
a taun hata paa kaokahiu bona baiko moon tean.
Bara naonao.”
30 Mea moon paa voosu vahaa inu teve,
mepaa no vuriha bona baiko teve,
eve he a goroho tea teebana.
Paa tavusu kahi vaevuru a taun hata.
E Jisu na vatagae bona aba a kiivusu
31 Mere Jisu paa kaokahi bono hum va Taea,
meori paa kaakoo nao Saedon vo tea kopua va Galilii,
tea rijin va Dekapolis.
32 Meori paa mee ki nao bene Jisu bona aba vai a kiivusu.
Eve mee saka ante haana tea moroko vamaaraa.
Meori paa uku ki bari,
eve re vaakopo bona kurinae tea aba bona,
ore tagae.
33 Me Jisu paa mee vaavaha kahi bona bono vaagum,
mepaa vaanee hopo ni bona bua kubisi kurinae tea bua papa tainane kiivusu.
Murinae,
mepaa dovi vo kubisi kurinae,
mepaa ato bona meana otei.
34 Meve paa tara hiava vo teo suviri,
mepaa busu ni bona vuhanae,
mepaa sue ki bona,
“Epataa!”h
(to kao vo naen “Tamamata!”).
35 Mea tainanae paa pahin tamamata koa,
mepaa babaitono vahaa,
a meanae mee na taritarigaha,
mepaa moromoroko vamaaraa vahaa.
36 Me Jisu paa sibusibuhu ribona maa tavaan,
eori re goe tea sue ki ta aba bona taba to tapaku.
Na sibuhu vakikisi rova rie,
eori he na no vaaree vakisi pahi.
37 Mea maa tavaan paa vaasin viravira kurusu,
meori paa sue,
“A aba vai na paku vaamataa kurusu batana bona maamihu taba,
o kiivusu mee na vatagae rie,
meori paa babaitono vahaa,
o noomun he na kokoara vahaa.”