E Pol to kino kiri roho bona ta Kolosi bono leta vai.

Eara na ante rara tea nata nie Pol beara ahe o buku Aposol.

Eove a too Jiu bara na teitei bata teo vaagum teo Paresii eove he mei nana tea murina bene Jisu.

O Paresii na kiikikisi kurusu bata tea murina vanenesi bona maa lo bara maa taatate tea ta Jiu ae a meha maa lo vai to paku komana riori.

E Pol na tekiteki bata ri roho bona maa tavaan to vamanamana bata bene Jisu Karisito (Aposol 8:3; 22:4).

E Pol na vamanamana mana bene Jisu Karisito,

eove he vatatana me bona,

hanana va Damaskas,

eove he tea pita bata vo Damaskas (Aposol 9:1-31).

Rerau,

mepaa vaavihi mana vo tea meha maa vaan,

eve he tea vamora bata,

bara eove he tea vaasusu bata ribona maa tavaan bene Jisu Karisito (Aposol 13:4-5; 14:1, 21-28; 15:41; 16:4-5; 17:1-2, 10-12).

Eove na taneo bona maa vaagum lotu kaakoo tea maa vaasusu to pakue.

E Pol a too Jiu rova,

eove he na teitei bata tea maa vaan tea ta Jentael mee.

Meve na nata vamataa ni nana bona maa vamanamana bara maa taatate tea ta Jentael.

Meve na ante nana tea vaasusu ribona ta Jentael bara ta Jiu,

tea tabae eve na nata vamataa ni nana bona maa vamanamana bara maa taatate teo buaku o vaagum.

O bero o aba to goe bona kiu te Pol,

rerau,

meori paa vaahovo bari inu karabusu.

E Pol na tei bona maa vuri sana inu karabusu (Aposol 16:19-39; 21:26-36; 24:27, 2 Kor 6:5; 11:23),

meve na kino bona meha maa leta teve inu karabusu.

O leta vai mee na kino ee teebona (Kol 4:3).

E Pol na vaahovo roho ori inu karabusu va Epesis,

Siisaria ae Rom.

Eara he na toku ni rara a inu karabusu va sau to teitei eve,

eove he kino bono leta vai.

Eara mee na toku rara o vinu to kino roho e Pol bono leta tea ta Kolosi.

Eori he na boha vo rien e Pol na kino bono leta vai bara o leta te Pilimon teo peho vuri koa.

Kolosi a vaan tea ta Jentael.

A ta Kolosi na vavaasunano ribono hunavaan piipiku o bero.

E Pol na kino bono leta vai kiri bona ta Jentael va Kolosi vai to vamanamana rori bene Jisu Karisito.

E Pol saka nao haa nao roho Kolosi.

E Epapras,

a meha too kiu te Sunano,

to taneo bono vaagum lotu te Jisu Karisito en Kolosi (Kol 1:7).

E Pol na kino kiri bona ta Kolosi tea tabae,

na mamaen vai vo roho naen to mene vamanamana bona maa vaasusu vai amaa piku (Kol 2:4, 8).

Eove na upehe vai roho nana bona maa lo vai to suusue bata a meha papana toro murina ori.

Amaa abana bari na suusue bata voen,

eori toro murina bona maa lo va tea taba-ani,

bara tea vasisio bona maa boni penapena (Kol 2:16).

E Pol he na vaasusu ribari voen e Jisu Karisito to rigarigaha araara,

meara toro goe tea murina amaa lo va teo munana.

Amaa lo bona to nohonoho ara raara (Kol 2:20).

Na kino kirie mee,

tea vaakikisi bono koma vamanamana teori,

bara tea vaamaaraa kiri bari bona tabae toro vamanamana ori (Kol 1:15-23).

Eve mee na sue kiri bari bona havee toro popo vaavaha vori beori murina batari bene Jisu Karisito (Kol 3:1-25).