E Pol na kino ki roho bene Taitus bono leta vai,

e Taitus he tea tei Krit.

Eara na ante rara tea nata nie Pol beara ahe o buku Aposol.

Eove a too Jiu bara na teitei bata teo vaagum teo Paresii,

eove he mei nana tea murina bene Jisu.

O Paresii na kiikikisi kurusu bata tea murina vanenesi bona maa lo bara maa taatate tea ta Jiu ae a meha maa lo vai to paku komana riori.

E Pol na tekiteki bata ri roho bona maa tavaan to vamanamana bata bene Jisu Karisito (Aposol 8:3; 22:4).

E Pol na vamanamana mana bene Jisu Karisito,

eove he vatatana me bona,

hanana va Damaskas,

eove he tea pita bata vo Damaskas (Aposol 9:1-31).

Rerau,

mepaa vaavihi mana vo tea meha maa vaan,

eve he tea vamora bata bara eove he tea vaasusu bata ribona maa tavaan bene Jisu Karisito (Aposol 13:4-5; 14:1, 21-28; 15:41; 16:4-5; 17:1-2, 10-12).

Eove na taneo bona maa vaagum lotu kaakoo tea maa vaasusu to pakue.

O bero o aba to goe bona kiu te Pol,

rerau,

meori paa vaahovo bari inu karabusu.

E Pol na tei bona maa vuri sana inu karabusu (Aposol 16:19-39; 21:26-36; 24:27, 2 Kor 6:5; 11:23).

Eove na kino bona meha maa leta teve teebona.

E Pol na kino bono leta vai,

eove he tea tei Nikopolis (Taitus 3:12).

Saka inu karabusu haana.

E Taitus a too Jentael vai to vamanamana bene Jisu Karisito.

Eove na vavaavihi bata mi bene Pol tea kiu teve.

(Gal 2:1-3).

Eori a buaku mee to pate hae nao roho teo toro vo Krit.

Me Pol paa kaokahi ma bene Taitus teebona,

eove re kikira ni maana bona naba lotu va Krit (Taitus 1:5).

A ta Krit na teitei me bono hena hata.

Amaa tavaan na booboha bata voen,

a ta Krit o piipiku,

o aba hata ae o karahu (Taitus 1:12).

O leta vai bara o leta momohu te Pol vo te Timoti na sue nana bona maa bero amaa taba to vaapeha nana.

A peha ponisi to tavusu vabero tea lotu ei:

Amaa vaasusu vai amaa piku.

O bero o siisia na vaapino ri roho bona naba lotu bona maa vaasusu vai amaa piku.

Me Pol paa kino kiri nao bari bona maa leta teve tea vaamaaraa kiri bari bona maa vaasusu bona.

Eove na sue kiri nao bari bona maa vaasusu vai amaa omana bara totobin komana maa leta bona.

E Pol na kino ki bene Taitus,

eve re moroko pina ribona maa abana to paku rori bona maa vaasusu vai to sue nana bono vapeepee ae tea murina bona maa taatate ae lo tea ta Jiu (Taitus 1:10-16, 3:9-11).

E Pol mee na kino ki nao bene Taitus tea sue vataaree ki bona,

bono kaku aba tabae toro vianae,

eori re tavusu naba bebeera va tea lotu (Taitus 1:5-9).

Eove na sue vataaree ki nao bona,

bono kaku matapaku mataa tabae toro tei tea naba bebeera bara amaa tavaan to vamanamana rori bene Jisu Karisito (Taitus 2:1-10, 3:1-11).